بيىلعى جىلدىڭ ناۋرىز ايىندا پرەزيدەنت قاسىم-جومارت توقاەۆ قازاقستان حالقىنا جولداۋىندا اكىمدەر مەن ولاردىڭ ورىنباسارلارىنا پارتيا فيليالدارىندا لاۋازىم يەلەنۋگە زاڭ جۇزىندە تىيىم سالۋ قاجەت ەكەنىن ايتقان ەدى. مەملەكەت باسشىسىنىڭ تاپسىرماسى اياسىندا قاراشا ايىنىڭ باسىندا زاڭنامالىق اكتىلەرگە ءتيىستى تۇزەتۋلەر ەنگىزىلدى.
بۇدان بىلاي بارلىق دەڭگەيدەگى اكىمدەر «AMANAT» پارتياسىنىڭ وبلىستىق, قالالىق جانە اۋداندىق فيليالدارىنىڭ توراعاسى لاۋازىمىن اتقارمايدى. سونداي-اق اكىمدەر پارتيانىڭ ءتيىستى فيليالدارىنداعى ساياسي كەڭەس بيۋروسى مەن ساياسي كەڭەستەرىنىڭ قۇرامىنا كىرمەيدى.
«بۇل شارا ەل پرەزيدەنتى قاسىم-جومارت توقاەۆ جاريالاعان ساياسي رەفورمالار باعىتىن ىسكە اسىرۋدىڭ قيسىندى جالعاسى سانالادى. بۇل قادام پارتيالىق باسەكەلەستىككە سەرپىن بەرەتىنىنە سەنىمدىمىز. اسىرەسە, ءماجىلىس پەن بارلىق دەڭگەيدەگى ءماسليحاتتاردا وتەتىن الداعى سايلاۋ اياسىندا بۇل شەشىم وتە وزەكتى», دەپ ءتۇسىندىردى پارتيانىڭ اتقارۋشى حاتشىسى اسحات ورالوۆ.
