قوعام • 23 قاراشا، 2022

قايسار قىز

264 رەت كورسەتىلدى

ەستۋ، سويلەۋ قابىلەتىندە تۋعانىنان كەمىستىك بولسا دا، قوعاممەن ارالاسۋ مۇمكىندىگى شەكتەلمەگەن رۋحى بيىك ەرەكشە جانداردىڭ تاڭداعان سالاسىندا جەتكەن جەتىستىكتەرى تالايدى سۇيسىنتەدى. وسىنداي ساۋلەلى جاننىڭ ءبىرى – اينۇر ساينوۆانىڭ اتى-ءجونى جانە كاسىبى جاقىندا وتكەن ق.توقاەۆ جاقتاستارىنىڭ سايلاۋالدى فورۋمىندا جۇرتشىلىقتى ەلەڭ ەتكىزدى.

سول فورۋمدا پرەزيدەنتتىڭ الدىندا قولداۋ كورسەتىپ، ءسوز سويلەگەن تاڭداۋلى توپتىڭ قاتارىنان «Sensitive» ەستىمەيتىن بيشىلەر تەاترىنىڭ ءارتىسى اينۇر ساينوۆا دا كورىندى. سۋردواۋدارما ارقىلى تىلەكتەستىگىن جەتكىزگەن ونىڭ سوزىنە جينالعان قاۋىم ريزاشىلىعىن ءبىلدىردى.

سودان كەيىن اينۇرمەن حابارلاسىپ، كەڭىنەن پىكىرلەسۋدىڭ مۇمكىندىگى تۋدى. سالاسىنداعى جەتىستىكتەر جونىندە ءبىراز اڭگىمەلەگەن ول ءسوز ورايى كەلگەندە ومىرىنە سەرىك ەتكەن ونەردىڭ ەلىمىزدە دامۋىنا، ءوزى قۇرالپاس جاندارعا جاسالعان جاعدايعا قاتىستى پىكىرىن ءبىلدىردى.

اينۇر بەيبىتقىزى س.مۇقانوۆ اتىنداعى قازاق سازدى-دراما تەاترىندا 2020 جىلدان باستاپ ءارتىس بولىپ جۇمىس ىستەيدى ەكەن. سونداي-اق ول – وسى تەاتردىڭ ىشىنەن قۇرىلعان «Sensitive» بي تەاترىنىڭ ءبيشىسى. بۇل انسامبلدىڭ قۇرىلعانىنا 16 جىل بولىپتى. ونىڭ قاتارىنا اينۇر 2016 جىلى قوسىلعان ەكەن.

«ماسكەۋدە ميميكالىق قيمىل تەاترى بار. ءبىزدىڭ پەتروپاۆلدا دا جانە ەلىمىزدىڭ باس­قا قالالارىندا وسىنداي تەاتر اشىلعا­نىن قالايمىن. سوندا سپەكتاكلدەردە «ەستى­مەي­تىن اكتەرلەر» ءجيى بوي كورسەتىپ، كوكجيەگى كەڭەيە تۇسەر ەدى. قازاقستان – جىلدان-جىل­عا ءوسىپ، وركەندەپ كەلە جاتقان ەل، بىراق ءالى دە ەستىمەيتىن ەل دەۋگە بولادى. ويتكەنى ەرەك­شە ادامداردىڭ ءۇنى ەستىلمەي جاتادى. ولار پىكىرىنە قۇلاق اسقانىن قالايدى، كوبىرەك مۇمكىندىكتەر العىسى كەلەدى. ەرەكشە بالا بولۋ جانە ءريتمدى سەزىنىپ العا ۇمتىلۋ قاجەت الەمدە ءومىر ءسۇرۋ وتە قيىن»، دەيدى كەيىپكەرىمىز.

راسىندا، مۋزىكانى قۇلاعىمەن ەمەس، جانىمەن سەزىنەتىن مۇنداي ونەرپازداردىڭ تالانتىنا ءتانتى بولاسىڭ. ارينە، ونەر جولى بولعان سوڭ شەبەرلىگىڭدى قاشاندا شىڭداپ وتىرۋ قاجەت. بىلايعى ادامعا وڭاي سوقپايتىن بۇل سالانىڭ سوقپاق جولى مۇمكىندىگى شەكتەۋلى جاندارعا تىپتەن سالماق تۇسىرەتىنى انىق. بىراق ولار بۇل قيىندىقتان قاشپاي، جان قالاۋى مەن ارمان-ماقساتى ءۇشىن العا ۇمتىلۋدان تانبايدى. بۇل رەتتە مەملەكەت تاراپىنان ەرەكشە ادامداردىڭ ءبىلىمىن جەتىلدىرۋدى، قولداۋدى كۇشەيتە ءتۇسۋى كەرەك. مىسالى، اينۇر بەيبىتقىزى ءبىلىم وردالارىندا سۋردواۋدارماشىلاردىڭ جەتىسپەيتىندىگىنەن، تىپتەن جوقتىعىنان قۇلاعىنىڭ، ءتىلىنىڭ مۇكىسى بار جاندار تالاي كەدەرگىگە تاپ بولىپ وتىرعانىن العا تارتتى.

«مۇگەدەكتىگى بار شىعارماشىل جاس­تاردى جۇيەلى قولداۋ قاجەت. بۇل – حورەو­گرافيا، ىم-يشارامەن ورىنداۋ، اكتەرلىك شەبەرلىك پاندەرى بويىنشا شەبەرلىك ساباقتارى، كونكۋرس-فەستيۆالدار. مۇندايدا كوزبوياۋشىلىقتان ادا بولىپ، ءىس-شارالاردى ۋاقىتشا ەمەس، جىل سايىن، مۇمكىن وڭىرلىك، رەسپۋبليكالىق، حالىقارالىق ىرىكتەۋلەر تۇرىندە وتكىزىپ تۇرۋ كەرەك. سوندا عانا مۇگەدەكتىگى بار جاستاردىڭ ورىنداۋشىلىق شەبەرلىگى مەن كاسىبيلىگى وسەدى، ىنتا-جىگەرى، ۇمتىلىسى بولادى. وسىناۋ باستامالارعا ازاماتتىق قوعام دا بەلسەندى اتسالىسۋ قاجەت. وكىنىشتىسى، بىزدە ءبىر رەتتىك جوبالارعا كوبىرەك ءمان بەرىلەدى. سوندىقتان جوبالاردىڭ تۇراقتى بولعانىن قالايمىز. سونىمەن قاتار وسى ساناتتاعى شىعارماشىل جاستار ماماندىقتارى بويىنشا وقىعىسى كەلەدى، ءارى قاراي ءوز جولىن جالعاستىرۋدى كوزدەيدى. بىراق ولار جوعارى وقۋ ورىندارىنا وقۋعا تۇسە المايدى. ويتكەنى قاراپايىم عانا وقۋدا كومەكتەسەتىن سۋردواۋدارماشىلار جوق. ەگەر بۇل مامانداردىڭ قىزمەتى اقىلى بولعان كۇننىڭ وزىندە، ونىڭ ءار ساعاتىنا تولەيتىندەي بىزدە مۇمكىندىك جوق. وسىندايدا قالايشا تەڭ دارەجەدە ءبىلىم الۋعا بولادى دەگەن وي كەلەدى. الايدا ەۋروپا ەلدەرىندە، ءتىپتى رەسەيدە دە وسىنداي مىندەتتىڭ ۇدەسىنەن شىعىپ وتىرعان ءبىلىم بەرۋ جۇيەسى بار»، دەيدى ا.ساينوۆا.

سالاسىنداعى ءبىراز جايتتان حاباردان ەتكەن كەيىپكەرىمىز وسى ۋاقىتقا دەيىن جەتكەن جەتىستىكتەرىنە توقمەيىلسىمەي، ءالى تالاي اسۋدى باعىندىرعىسى كەلەدى ەكەن. سونىڭ ءبىرى – بولاشاقتا ءوزىن فيلمدەردە نەمەسە سەريالداردا باستى رولدەن كورۋ. لايىم، ويلاعانى ورىندالىپ، تالانتىن شىڭداۋدا قاجىرلى ەڭبەك ەتىپ جۇرگەن اينۇردىڭ تالابىنا نۇر جاۋسىن دەگەن تىلەكتەستىگىمىزدى بىلدىرەمىز.

سوڭعى جاڭالىقتار

سوت جۇيەسىن جەتىلدىرۋ

ساياسات • بۇگىن، 00:06

ماقتاشىلاردىڭ مۇڭى

ەكونوميكا • كەشە

ۋاقىت تالابى

قوعام • كەشە

كۇرەسكەر گەينە

ادەبيەت • كەشە

اجالدى جەڭگەن اسپان

ادەبيەت • كەشە

اعاش كوشەتى ەگىلدى

ايماقتار • كەشە

قاسقىر

ونەر • كەشە

ۇقساس جاڭالىقتار