سالتاناتتى ءىس-شارادا قازاق ونەرىنىڭ قايراتكەرىنە ارنالعان ارنايى بۇرىش اشىلدى. ونى ەسكە الۋعا ارنالعان جيىنعا بالالارى, جاقىندارى, شاكىرتتەرى كەلدى. نۇرگۇل امانتايقىزىنا ارنالعان ارنايى بۇرىشتا دارىندى دومبىراشىعا قاتىستى قۇجاتتار جيناقتالعان. سونداي-اق اسپاپتارى, «ارناۋ» ەتنوفولكلورلىق ءانسامبلىنىڭ جەتىستىكتەرى مەن باسپاسوزدە جاريالانعان ماتەريالدار قويىلعان.
تانىمال ونەرپازدىڭ جاقىندارىنىڭ ايتۋىنشا, نۇرگۇل امانتايقىزى حالىق اقىنى, فولكلورشى, سازگەر, ابىز شاكىر ابەنوۆتىڭ كوزىن كورىپ, باتاسىن العان. باتاگوي قاريا سانالى عۇمىرىندا جانىنا سەرىك ەتكەن ءۇش ىشەكتى دومبىراسىن ونەرپاز قىزعا سىيلاعان. سودان بەرى ونەر جولىنان الىستاماي, ۇنەمى ىزدەنىسپەن كۇن كەشكەن. وسى سەبەپتى دە ايتۋلى ونەرپازدىڭ شىعارماشىلىعى قازاق مۋزىكا مادەنيەتىندە ەرەكشە ورىن الادى.
نۇرگۇل امانتايقىزى تۇڭعىش «ارناۋ» اتتى ەتنوفولكلورلىق قازاق بالالار ءانسامبلىن قۇرعان. ونەرپازدى ەسكە الۋعا ارنالعان باسقوسۋدا «ارناۋ» ءانسامبلى ۇستازدارى ۇيرەتكەن بىرنەشە كۇي ورىندادى. ءۇش ىشەكتى دومبىرانىڭ سيقىرلى ءۇنى جينالعان كوپشىلىكتىڭ جۇرەگىن ەلجىرەتتى. شاراپاتتى ءىس-شاراعا «ارناۋدىڭ» كوركەمدىك جەتەكشىسى نۇرگۇل اكىمعوجينانىڭ ءىسىن جالعاعان ۇلى جاندوس رامادانوۆ پەن قىزى ديدارا رامادانوۆا ارنايى شاقىرىلعان. ولار اناسىنىڭ ورىندالماي كەتكەن ارماندارىن, ۇلكەن ءۇمىت كۇتكەن ءىسىن جالعاستىرۋدى ماقسات ەتىپ وتىرعاندارىن جەتكىزدى.
جالپى, ءۇش ىشەكتى دومبىرانىڭ ەرەكشەلىگى: ءۇشىنشى دىبىسىنىڭ ارتىقشىلىعىندا. قوسبۇراۋداعى دومبىرادا نۇرگۇل امانتايقىزىنا دەيىن اباي قۇنانباي ۇلى, شاكارىم قۇدايبەردى ۇلى, ابايدىڭ بالاسى اقىلباي نەمەرەسى ىسىرايىل جانە شاكىر ابەنوۆ پەن جارقىن شاكارىم شەبەر ويناعان.
جۇلدىز جامەنكينا,
ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى
الماتى
