بالانىڭ اتا-اناسى اۋرۋدىڭ العاشقى بەلگىلەرىن نارەستەنىڭ قاتتى مازاسىزدىعى مەن سىلبىرلىعىنان, السىزدىگىنەن كەيىن بايقاعان. سونىمەن قاتار نارەستەنىڭ باسىنىڭ ۇلكەيىپ, ەڭبەگىنىڭ ىسىنگەنى بايقالادى. وسىدان كەيىن بالانىڭ اناسى نەۆروپاتولوگقا بارادى. ءارى قاراي دارىگەر ميدىڭ نەيروسونوگرافياسىنا جانە كت-عا جىبەرىپ, وندا گيدروتسەفاليا بەلگىلەرى, ورتاشا كلينيكالىق دەكومپەنساتسيا ساتىسىندا ميدىڭ وڭ جاق قارىنشاسىنىڭ كولەمدى ىسىگى انىقتالادى.
سابيگە العاشقى «ۆەنتريكۋلوپەريتونەالدى شۋنتتاۋ» وتاسى الماتى قالاسىنىڭ №2 قبا-دا جاسالدى. دارىگەرلەر كونسيليۋمىندا ەكىنشى وتانى ۇلتتىق نەيروحيرۋرگيا ورتالىعىندا جاساۋ جوسپارلانعان بولاتىن.
بالالار نەيروحيرۋرگياسى بولىمشەسىنىڭ مەڭگەرۋشىسى ع.ءى.ولەڭباي اتاپ وتكەندەي, وتانىڭ كۇردەلىلىگى, وسى جاستاعى بالا ءۇشىن ىسىك جەتكىلىكتى دارەجەدە ۇلكەن (4*3 سم.) جانە فۋنكتسيونالدى ماڭىزدى ايماقتا بولعاندىعىندا ەدى. سونىمەن قاتار وتا كەزىندە قان جوعالتۋ قاۋپى جوعارى, سوڭى اۋىر اسقىنۋلارعا, ءتىپتى ولىمگە دەيىن اپارۋى مۇمكىن بولدى. ىسىك تۋا بىتكەن جانە نارەستە قۇرساقتا جاتقاندا پايدا بولعان, بۇل سيرەك كەزدەسەتىن قۇبىلىس.
ء«بىز ميكروحيرۋرگيالىق ارالاسۋ جۇرگىزدىك, وڭ جاق قارىنشانىڭ ارتقى ءمۇيىزىنىڭ قارىنشاىشىلىك ىسىگىن الىپ تاستادىق, بۇل جەردە بارلىق زاماناۋي ادىستەر قولدانىلدى. سونداي-اق قىزمەتكەرلەردىڭ جوعارى بىلىكتىلىگى مەن ءبىزدىڭ ورتالىقتىڭ وتا بلوگىنىڭ زامانۋي جابدىقتالۋى وتانىڭ ءساتتى اياقتالۋىندا ماڭىزدى ءرول اتقاردى. نەيروحيرۋرگيالىق ناۆيگاتسيالىق جۇيەنىڭ باقىلاۋىمەن ءبىز ىسىككە اسا دالدىكپەن شىعىپ, ونى تولىعىمەن الىپ تاستاي الدىق. قازىرگى ۋاقىتتا نارەستەگە وتادان كەيىنگى ەم جۇرگىزىلۋدە, ول اناسىمەن بىرگە پالاتادا», دەدى نەيروحيرۋرگ دارىگەر عابيت ءىلياس ۇلى ولەڭباي.
انەستەزيولوگ دارىگەرلەردىڭ دە جوعارى كاسىبي دەڭگەيىن اتاپ وتكەن ءجون. مۇنداي كىشكەنتاي جاستا وتا ءاردايىم انەستەزيا بەرۋدىڭ ۇلكەن قيىندىقتارىمەن قاتار جۇرەدى. قان اينالۋىن, تىنىس الۋدى مۇقيات باقىلاۋ, انەستەزيانى وتە مۇقيات ەسەپتەۋ, بالانىڭ ءومىرى ءۇشىن ۇلكەن جاۋاپكەرشىلىك – وسىنىڭ ءبارى نەيروحيرۋرگيا ورتالىعىنىڭ كوپسالالى كومانداسىنىڭ موينىنا ءتۇستى.
وتانى جوعارى ساناتتى بىلىكتى نەيروحيرۋرگ-دارىگەر, بالالار نەيروحيرۋرگياسى بولىمشەسىنىڭ مەڭگەرۋشىسى, «ۇعو» اق پروفەسسورى عابيت ءىلياس ۇلى ولەڭباي مەن نەيروحيرۋرگ-دارىگەر ساپاربەك بازارباي ۇلى سەيتبەكوۆ جاسادى. سونداي-اق وتا بارىسىندا انەستەزيولوگ-رەانيماتولوگ دارىگەر ايگۇل قايىرقىزى جاندەلدينوۆا, ترانسفۋزيولوگ دارىگەر ەربول ناعاشپاي ۇلى قۋانىشەۆ جانە وتا مەيىرگەرى ءمادينا راحماتۋللاقىزى قاتىستى.
