ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆتىڭ بايانداۋىنشا, وسى جىلى بارلىق تارتىلعان سۋدىڭ شامامەن 11,6 كم3 تۇراقتى سۋارۋعا جىبەرىلدى, ونىڭ 97%-ى وڭتۇستىكتەگى بەس وبلىسقا – الماتى, جامبىل, تۇركىستان, قىزىلوردا جانە جەتىسۋ وبلىستارىنا تيەسىلى, جالپى سۋارۋ اۋدانى 1,61 ملن گا (ەل بويىنشا 73%) بولدى.
اتالعان كەزەڭدە ترانسشەكارالىق وزەندەر باسسەيندەرىندەگى 5 322 سۋ شىعارۋ قۇرىلىستارىنا جوندەۋ جۇرگىزىلدى, 1 512 كم ماگيسترالدىق جانە شارۋاشىلىقارالىق كانالداردى رەكونسترۋكتسيالاۋ جانە مەحانيكالىق تازارتۋ جۇزەگە اسىرىلدى, سۋارۋ ءۇشىن كوللەكتورلىق-درەناجدى سۋلاردى قايتا پايدالانۋ ءۇشىن 67 سورعى قوندىرعىسى ساتىپ الىندى, 107 مىڭ گا اۋداندا سۋ ۇنەمدەۋ تەحنولوگيالارى قولدانىلدى.
2023 جىلعى ۆەگەتاتسيالىق كەزەڭگە دايىندىق ءۇشىن ارنايى جوسپار بەكىتىلدى. ونىڭ اياسىندا الدىن الا جۇمىستار باستالدى.
سونىمەن قاتار اۋىل شارۋاشىلىعى ءمينيسترى ەربول قاراشوكەەۆ, قىزىلوردا وبلىسىنىڭ اكىمى نۇرلىبەك نالىباەۆ, جامبىل وبلىسىنىڭ اكىمى نۇرجان نۇرجىگىتوۆ جانە تۇركىستان وبلىسىنىڭ اكىمى دارحان ساتىبالدى بايانداما جاسادى.
پرەمەر-مينيستر ەلىمىزدىڭ ازىق-ت ۇلىك قاۋىپسىزدىگى اۋىل شارۋاشىلىعىنا قاجەتتى سۋدىڭ جەتكىلىكتى بولۋىنا تىكەلەي بايلانىستى ەكەنىن ايتىپ ءوتتى. سەبەبى بۇگىندە تۇتىناتىن سۋدىڭ جارتىسىنان كوبى اگرارلىق سەكتورعا تيەسىلى.
وعان قوسا, اوك-ءتى سۋمەن قامتاماسىز ەتۋ سۋ جەتىسپەۋشىلىگىنە بايلانىستى جىل وتكەن سايىن قيىنداي تۇسۋدە. ءاليحان سمايىلوۆتىڭ ايتۋىنشا, بۇعان بىرنەشە فاكتور اسەر ەتىپ وتىر. اتاپ ايتساق, كورشى ەلدەردىڭ اۋماعىنان كەلەتىن سۋعا تاۋەلدىمىز, ءبىزدىڭ وڭىردە سۋدىڭ از جينالۋى, كانالدارداعى سۋدىڭ شىعىنى جوعارى, سونداي-اق سۋدى ۇنەمدەۋ تەحنولوگيالارى جەتكىلىكسىز بولىپ وتىر.
«وسىعان قاراماستان قابىلدانعان شارالاردىڭ ناتيجەسىندە بيىلعى ۆەگەتاتسيالىق كەزەڭ قالىپتى جاعدايدا ءوتتى. كورشى مەملەكەتتەردىڭ سۋ قويمالارىنان قوسىمشا سۋ جىبەرىلدى. سۋمەن قامتاماسىز ەتۋ وبەكتىلەرىندە قاجەتتى تەحنيكالىق جۇمىستار جۇرگىزىلدى. بۇل جۇمىستى ءارى قاراي جالعاستىرىپ, كەلەسى ۆەگەتاتسيالىق كەزەڭگە ارنالعان جوسپارلاردى بەكىتۋدىڭ ماڭىزى زور», دەدى ءاليحان سمايىلوۆ.
پرەمەر-مينيستر ترانسشەكارالىق سۋلار بويىنشا ۇكىمەتارالىق كەلىسىمدەردى جەتىلدىرۋ جۇمىستارىن تۇراقتى تۇردە جۇرگىزۋ, كانالدار مەن سۋ قويمالارىن جوندەۋ جانە قالپىنا كەلتىرۋ جۇمىستارىن كۇشەيتۋ, سۋارمالى جەرلەردە سۋ ۇنەمدەۋ تەحنولوگيالارىن جانە جالپى سۋدى تسيفرلىق ەسەپكە الۋدى ەنگىزۋدى ىنتالاندىرۋ كەرەك ەكەنىن ايتتى.
«اتاپ ايتقاندا, سۋدى كوپ قاجەت ەتەتىن داقىلداردى ءوسىرۋ ءۇشىن جاڭبىرلاتىپ جانە تامشىلاتىپ سۋارۋ جابدىقتارىن قولدانۋ تاجىريبەسىن كەڭەيتۋ قاجەت. سونداي-اق كوللەكتورلىق-درەناجدىق جۇيەلەر ارقىلى سۋدى قايتا پايدالانۋ تەحنولوگيالارىن كوبىرەك قولدانۋ كەرەك», دەدى ول.
ءسوز سوڭىندا ۇكىمەت باسشىسى جالپى وڭىرلەردى قاجەتتى سۋدىڭ كولەمىمەن قامتاماسىز ەتۋ ءۇشىن سۋمەن جابدىقتاۋشى ۇيىمداردىڭ جۇمىسىن ۇيلەستىرۋ قاجەت ەكەنىن اتاپ ءوتتى.
