شىمكەنت قالاسىنىڭ پوليتسەيلەرى جاڭا باعدارلاما ارقىلى قۇقىق بۇزۋشىلىقتاردى انىقتاپ, جول ۇستىندە ءجيى تىركەلەتىن زاڭ بۇزۋ دەرەكتەرىنىڭ الدىن الىپ كەلەدى. ماسەلەن, ءساۋىر ايىنان باستاپ باعدارلاما كومەگىمەن شىمكەنتتە 175 460 اكىمشىلىك قۇقىق بۇزۋشىلىق انىقتالعان. ونىڭ ىشىندە جالعان مەملەكەتتىك ءنومىر تاعىپ جۇرگەن – 69, اۆتوكولىك تەرەزەسىن كۇڭگىرتتەپ العان – 5853, ءتيىستى رۇقساتسىز قايتا جابدىقتالعان كولىك قۇرالىن باسقارعان 1430 جۇرگىزۋشىگە اكىمشىلىك حاتتاما تولتىرىلدى.
جولدىڭ قارسى بەتىنە شىققان – 302, باعدارشامنىڭ تىيىم سالىنعان تۇسىنە (سيگنالىنا) ءوتىپ كەتكەن – 1266, جاياۋ جۇرگىنشىگە باسىمدىق بەرمەگەن – 798, كولىك قۇرالىن باسقارۋعا قۇقىعى جوق 955 جۇرگىزۋشى بەلگىلى بولدى. سونداي-اق باسقارۋ قۇقىعىنان ايىرىلعان – 43, وزگە دە قۇقىق بۇزۋشىلىقتار بويىنشا 164744 حاتتاما تولتىرىلىپ, 3905 اۆتوكولىك ايىپ تۇراعىنا جەتكىزىلدى.
ءىىم دەرەكتەرىنە سۇيەنسەك, «قاۋىپتى جۇرگىزۋشى» باعدارلاماسىنىڭ كومەگىمەن جىل باسىنان بەرى 8076-دان استام جول قوزعالىسى ەرەجەسىن بۇزعان 2350 جۇرگىزۋشى ۇستالعان ەكەن.
ايتا كەتەيىك, ىشكى ىستەر ءمينيسترىنىڭ تاپسىرماسىمەن ىسكە قوسىلعان باعدارلامادا «قاۋىپتى جۇرگىزۋشى» ءموبيلدى قوسىمشا دا ازىرلەنگەن. قوسىمشادا «سەرگەك» بەينەكامەرالارى, ءىىم جەدەل باسقارۋ ورتالىقتارى مەن ءموبيلدى قوسىمشالارىنىڭ مۇمكىندىكتەرى بىرىكتىرىلگەن. پوليتسيا قىزمەتكەرلەرى پلانشەتتەرى ارقىلى جۇرگىزۋشىنىڭ قازىرگى ورنى تۋرالى مالىمەتتى كورە الادى.
