توكيودا №261 جانە سەۋلدە №258 سايلاۋ ۋچاسكەلەرى جەرگىلىكتى ۋاقىت بويىنشا ساعات 07:00-دە اشىلعان. قازاقستاندىق كاسىپكەر سىرىمبەك تاۋ توكيو قالاسىنداعى سايلاۋ ۋچاسكەسىندە سايلاۋعا ەڭ ءبىرىنشى بولىپ داۋىس بەردى. «سايلاۋعا قاتىسۋ – ءاربىر ازاماتتىڭ بورىشى, مەملەكەت الدىنداعى پارىزى. ءبىز ءوز تاڭداۋىمىزدى جاساپ, مەملەكەتتىك ىسكە بەلسەندى ارالاسۋىمىز كەرەك. مەملەكەتىمىزدىڭ تۇراقتى دامۋى مەن ىرگەسىنىڭ بەرىك بولۋىنا اركىم ءوز ۇلەسىن قوسۋ قاجەت. مىنە, سوندىقتان دا بۇگىن كاسىپكەر رەتىندە توكيودا ىسساپارمەن ءجۇرىپ, ءوز داۋىسىمدى ەل بولاشاعى ءۇشىن بەرۋدى ءجون كوردىم», دەدى س.تاۋ.
ال وڭتۇستىك كورەيا استاناسىنداعى №258 سايلاۋ ۋچاسكەسىنە العاشقى بولىپ قازاقستاندىق يۋري تسوي كەلدى. سەۋلدە 5 جىلدان بەرى تۇرىپ جاتقان ول كاسىپكەرلىكپەن اينالىسادى. «قازاقستانداعى جاڭالىقتاردى بەلسەندى قاراپ وتىرامىن جانە ەلدەگى وڭ وزگەرىستەردى كورىپ ءجۇرمىن. سوندىقتان پرەزيدەنت سايلاۋىندا داۋىس بەرۋگە قۋانا كەلدىم», دەدى كاسىپكەر.
اتالعان ەكى ەلدەن سوڭ ۋاقىت بەلدەۋىنە بايلانىستى بەيجىڭ, شانحاي, گونكونگ, سينگاپۋر, كۋالا-لۋمپۋر, ۇلان-باتىر قالالارىندا داۋىس بەرۋ ۋچاسكەلەرى ءوز جۇمىسىن باستادى.
قازىر ەلىمىزدىڭ بىرنەشە قۇراما كومانداسى شەتەلدەردە بايراقتى باسەكەگە قاتىسىپ جاتىر. سىرتقى ىستەر مينيسترلىگىنىڭ مالىمەتىنە سۇيەنسەك, ولاردىڭ بارلىعى ەلشىلىكتەرگە بارىپ داۋىس بەرگەن. ماسەلەن, ەسكەك ەسۋدەن قازاقستان قۇراماسى تاشكەنتتە, جەڭىل اتلەتيكادان قۇراما كوماندا انتاليادا, ۇلتتىق فۋتبول قۇراما كومانداسى ابۋ-دابيدە ورنالاسقان سايلاۋ ۋچاسكەسىندە ءوز تاڭداۋلارىن جاساعان. «ماجارستانداعى ەۋروپا ايەلدەر حوككەي ليگاسىنا قاتىسۋعا كەلگەن الماتىلىق «ايسۇلۋ» كلۋبى بۋداپەشت قالاسىنداعى №243 سايلاۋ ۋچاسكەسىندە, كونكيمەن جۇگىرۋ سپورتىنان قازاقستان ۇلتتىق قۇراماسى نيدەرلاندتا داۋىس بەردى. بوكستان ماروككو ۇلتتىق قۇراماسىن جاتتىقتىراتىن بەلگىلى قازاقستاندىق باپكەر ەرىك العابەك قازاقستاننىڭ راباتتاعى ەلشىلىگى جانىنداعى سايلاۋ ۋچاسكەسىنە كەلىپ, ماڭىزدى ناۋقانعا قاتىستى», دەپ مالىمدەدى ءسىم. جالپى, ەل ازاماتتارى ماسكەۋ مەن ىستانبۇل قالالارىندا داۋىس بەرۋدە بەلسەندىلىك تانىتقان. شەتەلدەگى سايلاۋ ۋچاسكەسىنىڭ ەڭ سوڭعىسى سان-فرانتسيسكودا اشىلدى.
كەزەكتەن تىس پرەزيدەنت سايلاۋىن وتكىزۋ ءۇشىن بارلىعى 10 101 سايلاۋ ۋچاسكەسى قۇرىلعان. ونىڭ ىشىندە 68-ءى قازاقستاننىڭ 53 مەملەكەتىندەگى ديپلوماتيالىق وكىلدىگىندە ورنالاسقان.
