سايلاۋ ۋچاسكەسىندە 8 بايقاۋشى تىركەلگەن بولسا, مۇندا بارلىعى 1656 سايلاۋشى بار ەكەن. نەمەرەسىن ەرتكەن اجەلەرگە دەيىن ءجۇر. «سايلاۋشىلار بەلسەندىلىگى قالىپتاعىدان جوعارىراق», دەيدى ر.ابىشەۆ.
بالالار مەن جاسوسپىرىمدەر كىتاپحاناسىندا ورنالاسقان №577 سايلاۋ ۋچاسكەسىندەگى كوميسسيا توراعاسى ماپرۋزا جۇماباەۆا, ەقىۇ-دان ەكى بايقاۋشى كەلگەنىن, ولاردىڭ ەشقانداي ەسكەرتۋ جاساماعانىن, سايلاۋ پروتسەسىنە وڭ پىكىر ايتقانىن جەتكىزدى. مۇندا داۋىس بەرۋگە كەلگەن ادامدارعا ىستىق تاماق ساتاتىن ورىن دا دايىندالعان ەكەن. سەگىز كوشەنىڭ 1 633 سايلاۋشىسىن قامتيتىن سايلاۋ ۋچاسكەسىنە كۇندىزگى ساعات 11.00 شاماسىندا 300-دەن ارتىق سايلاۋشى كەلىپ, داۋىس بەرىپ ۇلگەرگەن.
قالانىڭ قاق ورتاسىنداعى, س.مۇقانوۆ اتىنداعى وبلىستىق امبەباپ كىتاپحاناعا ورنالاسقان №586 سايلاۋ ۋچاسكەسىندە 1281 سايلاۋشى تىركەلگەن. سايلاۋ كوميسسياسىنىڭ توراعاسى گالينا ميتروفانوۆا حالىقتىڭ كوبى تۇستەن كەيىن كەلگەنىن ايتادى. بۇل ايماقتا كىلەڭ مەملەكەتتىك ورگاندار مەن كاسىپورىن-مەكەمەلەردىڭ وفيستەرى ورنالاسقاندىقتان تۇرعىن ءۇي سانى ازداۋ. ءبىز اڭگىمەگە تارتقان مۇرات الىبەكوۆ دەگەن ازامات ءوزىنىڭ تاڭداۋىن جاساعانىن, ەندى سونى بەكىتۋگە داۋىس بەرۋگە كەلگەنىن ايتتى. «اۋىلعا اسىعىس كەتىپ بارا جاتىر ەدىم, الايدا شارۋا ەشقايدا قاشپاس. ءوزىمنىڭ سەنگەن كانديداتىمنىڭ وتكەنى كەرەك», دەدى جىگىت اعاسى.
سولتۇستىك قازاقستان وبلىسى
