الماتى قالاسى ەۋرازيالىق ەكونوميكالىق وداقتىڭ قارجىلىق ورتالىعى بولادى

استانا. 30 مامىر. الماتى قالاسىن ەۋرازيالىق ەكونوميكالىق وداقتىڭ قارجىلىق ورتالىعى رەتىندە قالىپتاستىرۋ جۇمىستارىن جەدەلدەتۋ قاجەت. پرەزيدەنت جوعارى ەۋرازيالىق ەكونوميكالىق كەڭەستىڭ وتىرىسىندا وسىلاي دەدى. بۇل تۋرالى «قازاقستان جاڭالىقتارى» حابارلادى. نۇرسۇلتان نازارباەۆ: «ءبىز ەۋرازيالىق ەكونوميكالىق كوميسسيا ماسكەۋدە ورنالاسادى جانە وداقتىڭ ورتالىعى بولادى دەپ كەلىستىك. ارينە, باسقا دا ۇسىنىستار بولدى. ال مينسكىدە ەۋرازيالىق سوت ورنالاسادى, وندا ءبىزدىڭ وداقتىڭ قۇقىقتىق ماسەلەلەرى شەشىمىن تابادى. ال الماتىدا 2025 جىلدان باستاپ وداقتىڭ قارجى نارىعىن رەتتەيتىن مەملەكەتۇستى ورگانى ورنالاسادى», – دەدى. مەملەكەت باسشىسى وسى ىسكە بايلانىستى وداقتىڭ قارجى نارىعىن رەتتەۋشى ورگاننىڭ قۇرىلۋىن كۇتپەستەن-اق الماتىنى ەۋرازيالىق ەكونوميكالىق وداقتىڭ قارجى ورتالىعى رەتىندە قالىپتاستىرا بەرۋدى ۇسىندى. جولدىباي بازار. دەرەككوز: «قازاقستان جاڭالىقتارى». فوتو: Almaty.all.biz.