تەاتر • 17 قاراشا، 2022

گۇرجى حالقىنىڭ ىقىلاسىنا بولەندى

جاقىندا «استانا بالەت» تەاترى ارتىستەرى گرۋزيا استاناسى تبيليسيدەگى ز.پالياشۆيلي اتىنداعى وپەرا جانە بالەت تەاترىنىڭ ساحناسىندا الەم جۇرتشىلىعىنا تانىمال «سالومەيا» جانە «A Fuego Lento» ءبىر اكتىلى بالەتتەرى مەن « ۇلى دالا مۇراسى» اتتى كونتسەرتتىك باعدارلاماسىن ۇسىنىپ، گرۋزيالىق كورەرمەندەردىڭ ىستىق ىقىلاسىنا بولەندى.

ازامات ەسەنجول

«استانا بالەت» تەاترىنىڭ ديرەكتورى الەكساندر سوۆوستيانوۆ ءوز سوزىندە گاسترولدىك ساپارعا اسقان جاۋاپكەرشىلىكپەن قاراپ، كورەرمەن كوڭىلىنەن شىعاتىن باعدارلاما ۇسىنىلعانىن جەتكىزدى.

انشلاگپەن وتكەن ونەر ساپارىنىڭ العاشقى كۇنى وتاندىق بالەت ترۋپپاسى ل.شيفرين، ا.پياتستسوللو، ك.گاردەل جانە س.كوسۋگي مۋزىكاسىنا ريكاردو امارانتەن قويعان «A Fuego Lento» نەوكلاسسيكالىق بالەتى مەن وسكار ءۋالدتىڭ پەساسى جەلىسىمەن فازىل ساي مۋزىكاسىنا تەاتردىڭ باس بالەتمەيستەرى مۋكارام اۆاحري قويعان «سالومەيا» سپەكتاكلىن ساحنالاپ، قازاق بالەت ونەرىنىڭ مەرەيىن اسىردى.

«بالەت ءارتىسى ءۇشىن گاسترولدىك ساپاردىڭ ءجونى بولەك. وسى رەتتە ءتبيليسيدىڭ كونە تەاترىنىڭ ساحناسىندا ونەر كورسەتۋ – زور جاۋاپكەرشىلىك جۇكتەدى. بۇل ءبىز ءۇشىن كەزەكتى سىناق بولسا دا، ودان سۇرىنبەي وتتىك دەپ ايتا الامىن. كورەرمەندەر ارتىستەرىمىزدىڭ ونەرىنە ءدان ريزا بولدى»، دەدى تەاتردىڭ كوركەمدىك جەتەكشىسى نۇرلان كانەتوۆ.

اسىرەسە قازاقستاننىڭ ەڭبەك سىڭىرگەن قايراتكەرلەرى ايگۇل ءتاتي مەن مۋكارام اۆاحري قويعان « ۇلى دالا مۇراسى» اتتى كونتسەرتتىك باعدارلاما گرۋزيا جۇرتشىلىعىن ۇلتتىق مۋزىكامىزدىڭ اۋەزدى اۋەنىنە ۇيىتىپ، كوركەم بەينەلەر مەن حورەوگرافيا ورنەگىنە ءتانتى ەتتى.

«تەاترىمىزدىڭ بەت-بەينەسى باي كلاسسيكالىق مۇرا مەن زاماناۋي بالەت ونەرىنىڭ نەگىزىندە قالىپتاستى. سونىڭ ارقاسىندا ۇلتتىق ءبيىمىزدى ۇلكەن ساحناعا شىعارىپ، الەمگە كورسەتۋ مۇمكىندىگى تۋدى. ءبىز قازاق ءبيىن وي ەلەگىنەن وتكىزىپ، ونىڭ ۇيلەسىمدىلىگى مەن سۇلۋلىعىن اشا تۇسەتىن سونى حورەوگرافيالىق مينياتيۋرالار شىعارۋعا ەرەكشە كوڭىل ءبولىپ كەلەمىز. ۇلتتىق حورەوگرافيالىق پلاستيكا – قازاق مادەنيەتىن تانىتۋدىڭ ءبىر امالى. سول سەبەپتى، ۇلتتىق بي تەاترىمىزدىڭ بارلىق گاسترولدىك ساپارىنىڭ ءسانىن كەلتىرەدى»، دەدى ايگۇل ءتاتي.

ايتا كەتەيىك، بەكزات ونەر ورداسىنىڭ گاسترولدىك ساپارىنا مادەنيەت جانە سپورت مينيسترلىگى قولداۋ كورسەتتى.