«قازىر ءبىز تولەمدەرگە ءوتىنىش بەرۋ بەلسەندىلىگىنىڭ تومەندىگىن كورىپ وتىرمىز. 2022 جىلدىڭ 11 قاراشاسىنداعى جاعداي بويىنشا, 1,8 ملن ادام ءوتىنىش بەرگەن. بۇل وتەماقى الۋعا ءوتىنىش بىلدىرگەندەردىڭ جالپى سانىنىڭ 35 پايىزىنان از», دەيدى ءا.وتەمباەۆ.
قدكبق باسشىسى وتەماقى باعدارلاماسىنىڭ شارتتارى مەن مەرزىمدەرى تۋرالى ايتتى.
«2022 جىلدىڭ 23 اقپانىنا دەيىن تەڭگەمەن دەپوزيت اشقان قازاقستاندىق بانكتەردىڭ سالىمشىلارى مەملەكەتتەن 10 پايىز كولەمىندە وتەماقى الۋعا قۇقىلى ەكەنىن ەسكە سالعىم كەلەدى. ول ءۇشىن دەپوزيت اشىلعان بانككە ءوتىنىش بەرىپ, سول ارقىلى تولەمدى الۋعا كەلىسىمىڭىزدى راستاۋىڭىز قاجەت. بۇل 2023 جىلدىڭ 1 قاڭتارىنا دەيىن جاسالۋى كەرەك. سونداي-اق دەپوزيتتى 2023 جىلدىڭ 24 اقپانىنا دەيىن ساقتاۋ ماڭىزدى. سونىمەن قوسا وتەماقى جىل ىشىندە دەپوزيتتە بولاتىن ەڭ تومەنگى سوما ءۇشىن ەسەپتەلەتىنىن اتاپ وتكىم كەلەدى», دەدى ول.
ءسوز سوڭىندا ءادىل وتەمباەۆ سالىمشىلاردى تولەمدەردى الۋ قۇقىعىن بەلسەندى پايدالانۋعا شاقىردى.
«سالىمشىلاردىڭ تولەمگە ءوتىنىش بەرۋگە ءبىر جارىم اي ۋاقىتى قالدى, بانككە ءوتىنىش بەرۋدى جىل سوڭىنا دەيىن قالدىرماۋدى ۇسىنامىن. ونىڭ ۇستىنە بۇل قيىن ەمەس, كوپتەگەن قازاقستاندىق ەكىنشى دەڭگەيلى بانك بۇل ۇدەرىستى ونلاين تۇردە ۇيىمداستىردى. دەپوزيت اشىلعان بانكتىڭ ءموبيلدى قوسىمشاسى بولسا جەتكىلىكتى. تولىق اقپارات الۋ ءۇشىن ءسىز ارقاشان وسى بانكتەرگە حابارلاسا الاسىز», دەدى قور باسشىسى.
ەسكە سالايىق, قازاقستاننىڭ دەپوزيتتەرگە كەپىلدىك بەرۋ قورىندا تولەمدەر 2023 جىلدىڭ 23 اقپانىنان كەيىن جۇزەگە اسىرىلادى.
