كانديدات اتاپ وتكەندەي, قوعامداعى كوپ ماسەلەنىڭ ءتۇپ-تامىرى وتباسىدان تارايدى. بالالاردىڭ ۇلگەرىمى, تۇلعا رەتىندە قالىپتاسۋى, سۋيتسيد, تۇرمىستىق زورلىق-زومبىلىق, انالار مەن قاريالارعا قاتىستى پروبلەمالاردىڭ بارلىعى وتباسىنداعى تاربيەگە بارىپ تىرەلەدى. قازىر وتباسى ماسەلەسى ءتۇرلى ۆەدومستۆولاردىڭ اراسىندا «شاشىراپ» ءجۇر. ونىڭ ايتۋىنشا, وتباسى ماسەلەلەرىمەن الەۋمەتتىك قورعاۋ, اعارتۋ, عىلىم جانە جوعارى ءبىلىم, دەنساۋلىق ساقتاۋ, ىشكى ىستەر مينيسترلىكتەرى, اكىمدىكتەر مەن وزگە دە ورگاندار اينالىسادى.
«وتباسى جانە دەموگرافيا ماسەلەلەرىمەن اينالىسىپ جۇرگەن قۇزىرەتتى ۆەدومستۆولاردىڭ اراسىندا ءوزارا بايلانىس جوق. وتباسى ينستيتۋتىن بۇلايشا قولداۋ مۇمكىن ەمەس. وتباسى مەن وتباسى مۇشەلەرى بۇل مينيسترلىكتەر ءۇشىن ينديكاتور عانا. مىسالى, نەكە تۇراقسىزدىعى ەش تراگەديا ەمەس, بازاداعى جازبانىڭ وزگەرۋى عانا. مەمورگانداردىڭ ەشقايسىسى ازاماتتارعا «وتباسى», «وتباسى مۇشەسى» دەگەن تۇتاس ۇعىممەن قارامايدى, جەكەلەگەن ادام رەتىندە عانا قارايدى. ال بىزگە ەڭ الدىمەن وتباسى ماڭىزدى. ونىڭ تۇتاستىعى, باقىتتى بولۋى ماڭىزدى», دەدى كانديدات.
