ءبىزدىڭ قايدا وقىعانىمىزدى, بۇعان دەيىن قانداي جۇمىستار جاساعانىمىزدى سۇرادى. ارىپتەسىم تيمۋر ەرمۇحامەتوۆ ەكەۋمىز مۇمكىندىگىنشە بۇعان دەيىن جاساعان جۇمىستارىمىز تۋرالى قىسقاشا ايتىپ بەردىك. مەملەكەت باسشىسى بىزدەن «جەكە شەبەرحانالارىڭ بار ما؟» دەپ سۇرادى. ءبىز بار ەكەندىگىن ايتتىق. «بۇل جۇمىس ماعان قاتتى ۇنادى, ءاربىر دەتالىنا مۇقيات كوڭىل ءبولىپ جاساعان ەكەنسىڭدەر. قانشاما جۇمىستاردى كورىپ ءجۇرمىن, كەيبىر مۇسىندەرگە كوڭىلىم تولمايتىنى راس. ال سىزدەرگە كوپ راحمەت, جۇمىستارىڭ تابىستى بولسىن!» دەدى. مەملەكەت باسشىسىنىڭ بۇل باعاسى ءبىزدىڭ شابىتىمىزعا قانات بىتىرگەندەي بولدى. بۇيىرسا الداعى ۋاقىتتا بۇدان دا جاقسى جۇمىستار ىستەۋگە تىرىسامىز.
ارينە, ءار تۇلعاعا ارنالعان ەسكەرتكىش سول تۇلعانىڭ كەلبەتىمەن قوسا, ىشكى جان-دۇنيەسىن دە اشۋى ءتيىس. ال ول ءۇشىن ۇلكەن ىزدەنىس كەرەك.
ۇلت ۇستازىنا قويىلعان ەسكەرتكىشكە كەلەر بولساق, ءمۇسىن قولادان قۇيىلعان, تۇعىرى گرانيت تاستان جاسالعان. بيىكتىگى – 3,5 مەتر, تۇعىرى – 1,5 مەتر, جالپى بيىكتىگى 5 مەتر بولادى. الاش ارىسى احمەت اتامىزدى بىلمەيتىن كىسى جوق شىعار. ۇلت ۇستازىنىڭ بەينەسىن جاساۋدا ول كىسىنىڭ مۇراعاتتارداعى سۋرەتتەرىن قارادىق, جاس كەزىندەگى, قارتايعان شاعىنداعى بەينەلەرىن ىزدەدىك. ءومىر جولى تۋرالى قايتالاپ وقىپ شىقتىق. بۇل سالادا 10 جىلدان بەرى جۇمىس ىستەپ كەلە جاتىرمىز. بۇعان دەيىن دە كوپتەگەن تۇلعانىڭ ەسكەرتكىشىن جاساۋعا اتسالىستىق. ءبارى دە جۇرتتىڭ كوڭىلىنەن شىققان تۋىندىلار.
ماسەلەن, بۇعان دەيىن الماتىدا اشارشىلىق قۇرباندارىنا قويىلعان ەسكەرتكىشتىڭ بەينەسىن جاسادىق. استانا قالاسىنا قويىلعان ءابۋ ناسىر ءال-فارابي, الماتىدا نۇرتاس وڭداسىنوۆ, ءشامشى قالداياقوۆتىڭ ەسكەرتكىشتەرى – ءبىزدىڭ تۋىندىلار. جاقىندا تاراز قالاسىندا قويىلعان شەرحان مۇرتازا اتامىزدىڭ ەسكەرتكىشى دە ءبىزدىڭ ەڭبەك. تۇلعالارعا ارنالعان تۋىندىنىڭ ءساتتى شىعۋى, ونىڭ سىرتقى كەلبەتى عانا ەمەس, ىشكى جان-دۇنيەسىنە تەرەڭ ۇڭىلگەندىگىمىزدەن بولار. ويتكەنى ءبىز ءوزىمىز كىرىسىپ, جاسايتىن تۇلعانىڭ ومىرىمەن تولىق تانىسامىز, وقىپ زەرتتەيمىز, سۋرەتتەرىن, بەينەماتەريالدارىن اقتارامىز, سول ارقىلى ەسكەرتكىشكە مىنەزىن, جان-دۇنيەسىن سىڭىرۋگە تىرىسامىز.
ايدوس بۇركىتباەۆ,
ءمۇسىنشى
