كوللاجدى جاساعان زاۋرەش سماعۇل, «EQ»
«جاڭا ادامدار» كوپ ۇزاماي «جاستار رۋحى» جاستار قاناتى, قازاقستان جاستار كونگرەسى, ستۋدەنتتەر اليانسى, «جاسىل ەل» جۇمىسشى جاستار جاساقتارى, اۋىل جاستارىنىڭ وداعى سەكىلدى كوپكە تانىس ىرگەلى ۇيىمداردىڭ قاتارىنان تابىلاتىنىنا سەنىمدى. ويتكەنى قۇرىلعانىنا كوپ ۋاقىت وتە قويماسا دا, بىردەن پرەزيدەنتپەن كەزدەسۋ وتكىزىپ, ويلارى مەن الداعى ماقسات-مۇراتتارىن ورتاعا سالدى.
قازىردە «جاڭا ادامدار» قوزعالىسىنىڭ قۇرامىندا 150 بەلسەندى جاس بار. ولاردىڭ ءاربىرى بۇل جوباعا ءوز يدەيالارىمەن كەلىپ, ۇيىمنىڭ مۇشەسى اتانعان. اتالعان ۇيىمنىڭ قۇرىلۋ تاريحى دا قىزىق. الدىمەن ءبىر توپ جاس جينالىپ, مەملەكەت باسشىسىنىڭ ادىلەتتى قازاقستاندى قۇرۋ تۋرالى تەزيسىن تالقىلاپ, پىكىر تالاستىرعان.
– بۇل تالقىلاۋ وسى جىلدىڭ تامىز ايىندا وتكەن ەدى. العاش رەت ءبىراز جاستىڭ باسىن قوسقان جيىن ۇيىمداستىردىق. وندا ءبىز پرەزيدەنت قاسىم-جومارت توقاەۆتىڭ ادىلەتتى قازاقستان قۇرۋ تۋرالى باستاماسىن ءسوز ەتتىك. جاڭا قازاقستان, ادىلەتتى قازاقستان دەگەن تۇجىرىمدامالاردى تالداپ, وزىمىزشە ساراپتاما جاسادىق. ۇكىمەتتەگى قىزمەتكەرلەردىڭ, دەپۋتاتتاردىڭ سويلەگەن سوزدەرىن, پىكىرلەرىن دە وي ەلەگىنەن وتكىزدىك. سول كەزدە شەنەۋنىكتەردىڭ پرەزيدەنتتىڭ ءسوزىن ءبىرشاما ۇزاق, ءتىپتى قاراما-قايشىلىقپەن تۇسىنەتىنىن بايقاپ, تاڭعالدىق. بۇدان سوڭ «جاڭا قازاقستان» دەگەن ۇعىمدى ءوزىمىز قالاي تۇسىنەتىنىمىزدى ۇسىنۋدى ءجون كوردىك. جاڭا قازاقستان وزىمىزدەن, بىرەۋگە تاۋەلدىلىكتەن باس تارتۋدان باستالادى ەمەس پە؟! جاڭا قازاقستان – بۇل ەلىمىزدەگى 19 ميلليون حالىقتىڭ ءوز ومىرىنە دەگەن كوزقاراسىنىڭ وزگەرۋى. وسىلايشا, باسقوسقان بارشا جاستاردىڭ ويى ءبىر جەردەن شىقتى, بىرتە-بىرتە ءبىزدىڭ پىكىرتالاسىمىزعا جاڭا ادامدار قوسىلا باستادى, – دەيدى «جاڭا ادامدار» جاستار قوزعالىسىنىڭ كوشباسشىسى اسەل بادەنوۆا.
بەلسەندىلەردىڭ سانى جۇزدەن اسقاندا ۇيىمنىڭ باعدارلامالىق قۇجاتى ازىرلەنگەن. اسەلدىڭ ايتۋىنشا, قۇجات جاقىن ارادا جاريالانىپ, كوپشىلىكتىڭ تالقىسىنا سالىنادى.
ءبىر ايتا كەتەرلىگى, «جاڭا ادامدار» وكىلدەرى ەركىن, ويلارىن, ۇسىنىس-پىكىرلەرىن بۇكپەسىز اشىق جەتكىزەدى. جاس ورەندەردىڭ ويعا العان باستاما, جوسپارلارىن ەش قىمسىنباستان ورتاعا سالىپ, پىكىرتالاسقا تۇسۋگە دايىن ەكەنىن بىردەن اڭعارۋعا بولادى. جاڭا قازاقستان, ادىلەتتى قازاقستان قۇرۋ تالپىنىستارىندا جىگەر مەن باتىلدىق بايقالادى. ولار ءتىپتى «جاڭا, ادىلەتتى قازاقستاندى مەملەكەتتىك قىزمەتشىلەر جانە دەپۋتاتتارمەن بىرگە قۇرعىمىز كەلەدى», دەپ مەملەكەتتىك قىزمەتكە ارالاسقىسى كەلەتىندىكتەرىن دە جاسىرمادى.
پرەزيدەنت الدىندا ءسوز سويلەگەن قوزعالىستىڭ مۇشەسى ريزابەك راشيت ءوزى سەكىلدى جاستاردىڭ مەملەكەتتىك قىزمەتشىلەرگە كومەك بەرگىسى كەلەتىنىن ايتقان ەدى. ء«بىزدىڭ باستى ماقساتىمىز – شەنەۋنىكتەر مەن دەپۋتاتتارعا كومەكتەسۋ عانا ەمەس, ولارمەن بىرگە ادىلەتتى قازاقستان قۇرۋ», دەدى «جاڭا ادامدار» وكىلى. ال قاسىم-جومارت توقاەۆ: «شەنەۋنىكتەرگە كومەكتەسۋدىڭ قاجەتى جوق شىعار, ويتكەنى ولار ءوز جۇمىسىن ىستەۋى كەرەك. بىراق مەملەكەتتىك, ۇلتتىق قۇندىلىقتاردى, قوعامداعى دۇرىس ۇعىمداردى قالىپتاستىرۋ جاستاردىڭ ياعني, سىزدەردىڭ قولدارىڭىزدان كەلەدى دەپ ويلايمىن. قالاي الساق تا قازاقستان – ازاماتتىق قوعام دامىعان ەل. سوندىقتان ازاماتتىق قوعامدا پىكىرتالاستاردىڭ بولۋى زاڭدىلىق, وسى پىكىرتالاستار ارقىلى ءسىز بىرىنشىدەن مەملەكەتكە پايدا كەلتىرە الاسىز, ەكىنشىدەن ءوزىڭىزدى دالەلدەۋگە بولادى. قالاي دەسەك تە, ءبىز اشىق قوعامعا بەت بۇرىپ كەلەمىز», دەپ جاستاردىڭ بۇل يدەياسىنا وي قوستى.
قوزعالىس جەتەكشىسىنىڭ ايتۋىنشا, ۇيىمنىڭ ماقساتى – پرەزيدەنت ق.توقاەۆ باستاعان ەلدەگى وزگەرىستەردى ىسكە اسىرۋ.
– «مۇنى قالاي جاساۋعا بولادى؟» دەسەڭىزدەر, ول ءۇشىن ءبىز جاڭا قازاقستاندى قۇرۋ پروتسەسىنە ەلىمىزدىڭ مىڭداعان جاس ۇل-قىزىن تارتقىمىز كەلەدى. ولاردىڭ ءوز وتانى تۋرالى تۇسىنىكتەرىن وزگەرتۋگە ىقپال ەتىپ, ەل ەرتەڭى بولار ورەننىڭ قۇندىلىقتارىن ەڭبەكقورلىققا, پراگماتيزمگە جانە كاسىپكەرلىككە قايتا بەيىمدەگىمىز كەلەدى. وسىلايشا, مىڭداعان ادامعا جۇزدەگەن, مىڭ جانە ميلليونداعان جاڭا جاس قوسىلارىنا سەنىمدىمىز. سوندا عانا پرەزيدەنت باستاعان وزگەرىستەر ەندى توقتامايدى, ناقتى وزگەرىستەر بولادى. ءبىزدىڭ ماقساتىمىز – قازاقستاننىڭ ءاربىر ازاماتىنىڭ دامۋى مەن دەربەستىگى. سوندىقتان وسى وزگەرىستى الدىمەن وزىمىزدەن باستاپ وتىرمىز, – دەدى اسەل بادەنوۆا.
جاقىن ارادا «New People» توبى ەلوردادا ءوز كامپۋسىن اشۋدى جوسپارلاپ وتىر. وندا جاستار كوشباسشىلىق پەن ساياسات سالاسىن زەرتتەپ, زەردەلەيدى. كىل جاستاردان قۇرىلعان توپ بەينەفيلم, ءتۇرلى جوبالار, كوشە اكتسيالارىن ۇيىمداستىرادى.
– ءبىزدىڭ توبىمىزعا تۇيىندەمە مەن «مەن جاڭا قازاقستاندى قالاي كورەمىن؟» تاقىرىبىندا شىعارماشىلىق جۇمىسىن جىبەرگەن كەز كەلگەن قازاقستاندىق جاس قوسىلا الادى. بۇگىنگى تاڭدا قوزعالىستا ءبىزدىڭ يدەيالارىمىزبەن بولىسەتىن 150 بەلسەندى بار. 2022 جىلدىڭ 14 قازانىن «جاڭا ادامدار» قوزعالىسىنىڭ ناعىز تۋعان كۇنى دەپ ەسەپتەيمىز. پرەزيدەنتپەن كەزدەسۋدە ماقسات-مىندەتتەرىمىزدى ايتىپ, مەملەكەت باسشىسىنىڭ 100 پايىز قولداۋىنا يە بولدىق. پرەزيدەنت الماتىداعى ساپارىندا ءبىزدىڭ كەزدەسۋىمىز تۋرالى ايتىپ, سويلەگەن سوزدەرىمىزدى ەسىنە العانى – ءبىز ءۇشىن ۇلكەن قۋانىش ءارى ۇلكەن ابىروي, – دەدى ۇيىم كوشباسشىسى.
– كەشە مەن «جاڭا ادامدار» جاستار قوزعالىسىنىڭ وكىلدەرىمەن كەزدەستىم. جاستار ادىلەتتى قازاقستاندى قۇرۋ يدەياسىمەن شابىتتاندىردى. ولار جاڭا ەلدى قاجىرلى ەڭبەككە, وتان تاعدىرىنا بەلسەنە قاتىسۋعا نەگىزدەلگەن قۇندىلىقتار جۇيەسى جاڭارتىلعان ادامدار قۇرۋعا ءتيىس ەكەنىنە سەنىمدى.
– قازىرگى جاستار باسقاشا. ماعان ۇنايتىنى, قازىرگى جاستاردىڭ كوبى مەملەكەتتەن كومەك كۇتپەي, كەرىسىنشە, ءوز ەلىنە پايدالى بولعىسى كەلەدى. ارينە, قازاقستان – الەۋمەتتىك مەملەكەت, ءبىز ءوز ازاماتتارىمىزدى, اسىرەسە الەۋمەتتىك وسال توپتارعا ارقاشان قولداۋ كورسەتەتىن بولامىز. بىراق ءوز ءال-اۋقاتى ءۇشىن جاۋاپكەرشىلىكتى مەملەكەتكە دە, قوعامعا دا اۋدارۋ مۇمكىن ەمەس.
كۇنى بويى ديۆاندا جاتىپ نەمەسە سمارتفوندا ماقساتسىز ۋاقىت وتكىزۋ ارقىلى جەتىستىككە جەتە المايسىز. مەملەكەت بارلىعىن قولىنان ۇستاپ, وقۋعا نەمەسە جۇمىسقا ورنالاستىرا المايدى. ەشبىر ەلدە مۇنداي نارسە جوق. شەتەلدىك ءبىر ءىرى مۇناي-گاز كومپانياسى ازاماتتارىمىزعا لايىقتى جالاقىمەن ۆاحتالىق ادىسپەن جۇمىس ىستەۋ ءۇشىن ارنايى 1000 ورىن ءبولدى. وكىنىشكە قاراي, بۇل ۇسىنىسقا 50 ادام جاۋاپ بەردى. مۇنىڭ سەبەبى ەشكىم جۇمىس ىستەۋ ءۇشىن باسقا جەرلەرگە بارعىسى كەلمەيدى. وسى ۋاقىتتا كوپتەگەن وزگە ەلدىڭ تۇرعىندارى ەش ويلانباستان شەتەلدەرگە بارىپ, كەز كەلگەن جۇمىسقا كىرىسەدى.
ەلىمىزدىڭ ورتالىق جوعارى وقۋ ورىندارىندا ءبىلىم الۋ ءۇشىن مەملەكەت تاراپىنان كەيبىر وڭىرلەرگە ارنايى گرانتتار ءبولىنىپ جاتىر. 10 مىڭ گرانتتىڭ تورتتەن بىرىنەن ازى يگەرىلدى. مەملەكەت ازاماتتاردى جۇمىسپەن دە, گرانتپەن دە قامتاماسىز ەتەدى, تەك وسى مۇمكىندىكتەردى پايدالانۋ كەرەك, – دەدى پرەزيدەنت الماتىداعى ساپارىندا.
«جاڭا ادامدار» جاستار قوزعالىسى پرەزيدەنتپەن جۇزدەسۋلەرىن مەملەكەت باسشىسىنىڭ جاستارعا دەگەن سەنىمىنىڭ بەلگىسى دەپ سانايدى. «پرەزيدەنتتىڭ ءۇمىتىن اقتاماۋعا قۇقىعىمىز جوق. الداعى ۋاقىتتا جوسپارىمىز دا, تىندىرار جۇمىسىمىز دا كوپ. بارلىق ەل بويىنشا كامپۋستارىمىزدى اشامىز. كەلەسى جازدا پرەزيدەنتپەن تاعى دا كەزدەسىپ, قاسىم-جومارت توقاەۆقا تابىستارىمىز تۋرالى ايتىپ بەرەتىن بولىپ كەلىستىك», دەدى اسەل بادەنوۆا.
