كورمەگە سۋرەتشىنىڭ 90-نان اسا تۋىندىسى قويىلدى. ونىڭ كوبى اۆتوردىڭ بيىل سالعان ەڭبەكتەرىنەن قۇرالىپ, ارنايى تاقىرىپتارعا بولىنگەن. ءار تاقىرىپتىڭ كوتەرىپ تۇرعان جۇگى جەڭىل ەمەس بولسا دا, ءبارى دە – ۇلتتىق بولمىسىمىزدى ايشىقتاعان ارناعا توعىسادى. اسىرەسە جاس تالانتتىڭ پسيحولوگيالىق پورترەتتەرى ايتار ويىنىڭ تەرەڭدىگىمەن, بوياۋىنىڭ كوركەمدىگىمەن ەرەكشەلەنەدى. ءبىز كوبىنەسە قوعامداعى كەز كەلگەن قۇبىلىستىڭ سىرتقى بەينەسىنە ءمان بەرەمىز دە, ىشكى الەمىنە ءجىتى ۇڭىلمەيمىز. نەگىزى, وسى دۇرىس پا؟ ال سۋرەتشىنىڭ وسى پورترەتتەرىن كورگەندە, سىرتقى اسەمدىككە دەگەن قۇشتارلىعىڭىز, ويىڭىز, كوزقاراسىڭىز وزگەرەدى. ءسىز ونى ەندى باسقاشا تۇيسىنەسىز. بۇل كارتينانىڭ استارىندا قازىرگى مىڭ قۇبىلعان ۋاقىتتا ادامدىق شىنايى بولمىسىمىزدى, قاسيەتىمىزدى قالاي ساقتاپ قالا الامىز دەگەن تەرەڭ فيلوسوفيالىق وي جاتىر. سۋرەتشى سونى مەڭزەيدى. سونداي-اق «اتامەكەن» اتتى تريپتيح مۇسىنىندە قازاقتىڭ قازىنالى قارياسى ارقىلى – جۇمىر جەردىڭ بەتىندە اتا-بابانىڭ قانى تامعان جەردەن ارتىق ەل جوق ەكەنىن بوياۋ تۇسىمەن كوركەم جەتكىزگەن. ال «ۋاقىت جانە قۇن» اتتى سەرياسىمەن سالعان ەڭبەكتەرىندە العاشقى ۇلتتىق تەڭگەمىزدە جاريالانعان ايتۋلى تۇلعالارىمىزدىڭ بەينەسى ايشىقتى بەينەلەنگەن. سونىمەن قاتار قازاقى وتباسىلىق قۇندىلىقتى دارىپتەگەن تۋىندىلارى دا كەلۋشىلەرگە مازمۇندى وي سالدى. مادەني ءىس-شارانىڭ اشىلۋىندا بەلگىلى سۋرەتشى سەمبىعالي سماعۇلوۆ جاس تالانتتىڭ شىعارماشىلىعى تۋرالى پاراساتتى وي قورىتتى.
«سوناۋ توقسانىنشى جىلدارداعى قيىنشىلىق كەزەڭدە بەينەلەۋ ونەرىنىڭ دامۋى كىشكەنە باسەڭدەپ قالدى. ويتكەنى وعان سول كەزدەگى كۇردەلى جاعدايدىڭ اسەرى ءتيدى دەپ ويلايمىن. ايتپەسە بەينەلەۋ ونەرىمىزگە سوناۋ الپىسىنشى جىلداردان باستاپ, لەك-لەك تالانتتى جاستار كەلىپ, ۇلتتىق ونەرىمىزدى بيىككە كوتەردى. سول ءۇردىس ازداپ ءۇزىلىپ قالعانداي بولىپ ەدى. ەندى, مىنە سول, قايتا جاندانىپ, قازىر بەينەلەۋ ونەرىنە دارىندى جاستار كوپتەپ كەلىپ جاتىر. سونىڭ بەل ورتاسىنان ورالبەك قابوكەنى كورەمىن. بۇگىن ءبىز ونىڭ ەلدى قۋانتقان كورمەسىنىڭ كۋاسى بولىپ وتىرمىز. تالانتتى سۋرەتشىنىڭ ءار جۇمىسىنان ۇلتتىق بوياۋعا باي قولتاڭباسى ايشىقتالىپ تۇرادى. ونى ەشكىمگە ۇقساتا المايسىز. ىزدەنگىش, ايتار ويى دا تەرەڭ», دەپ كورمە يەسىنە جىلى لەبىزىن ءبىلدىردى. ودان كەيىن ءسوز العان تانىمال قىلقالام شەبەرى لەيلا ماحات ورالبەكتىڭ ومىرگە وزگەشە قارايتىن سۋرەتشى ەكەندىگىن اتاپ ءوتتى. «ول حالقىمىزدىڭ تاريحى مەن سالت-ءداستۇرىن جاقسى بىلەدى. ءبىر جاعىنان, شىعارمالارىنان ونەرگە ادالدىعى كورىنەدى», دەپ لايىقتى باعاسىن بەردى.
بۇگىندە ورالبەك قابوكەنى كوزىقاراقتى قاۋىم زاماناۋي دارىندى سۋرەتشىلەردىڭ ءبىرى رەتىندە جاقسى بىلەدى. ول ت.جۇرگەنوۆ اتىنداعى قازاق ۇلتتىق ونەر اكادەمياسىن تامامداعان. بىرقاتار رەسپۋبليكالىق جانە حالىقارالىق بايقاۋدىڭ جۇلدەگەرى. 2010 جىلى «شەتەلدەگى قازاق جاستارى جانە انا ءتىلى» اتتى حالىقارالىق ونەر فەستيۆالىندە توپ جارسا, قازاق حاندىعىنىڭ 550 جىلدىق مەرەيتويىنا ارنالعان رەسپۋبليكالىق «كاسپي كوكجيەگى» اتتى سۋرەتشىلەردىڭ بايقاۋىندا باس جۇلدەنى يەلەنگەن.
ءىس-شارا سوڭىندا ورالبەك قابوكە كورمەگە قويىلعان جۇمىستارىنا قىسقاشا شولۋ جاسادى.
«بۇل كورمەنىڭ «بەينە» دەپ اتالۋى تەگىن ەمەس. ويتكەنى ول مەنىڭ شىعارماشىلىق بەينەم عانا ەمەس, قوعامداعى ءار قۇبىلىستى جان-دۇنيەمنەن سەزىنىپ وتكىزگەن بەينەلەردىڭ جيىنتىعى دەسەم بولادى. كورمەگە قويىلعان كارتينالارىمنىڭ دەنىن بيىل سالدىم. ءبىز قازىر ۋاقىتپەن جارىسىپ كۇن كەشەمىز. ءاربىر ونەر ادامى ءوزى ءومىر سۇرگەن ۋاقىتتى بەدەرلەيدى. مەن دە ۇلتتىق بەينەدەن اجىراماي, ءوز ءداۋىرىمنىڭ كەلبەتىن سومداپ, حالقىمنىڭ بولمىسى مەن ەرەكشەلىگىن بەينەلەسەم», دەگەن ماقسات-مۇددەسىن ايتا كەلىپ, وسى كورمەنى وتكىزۋگە مۇرىندىق بولعان ۇلتتىق مۋزەي ۇجىمى مەن جينالعان جۇرتشىلىققا العىسىن ايتتى.
