ەۋرازيالىق ەكونوميكالىق وداق قۇرۋ تۋرالى شارتتى راتيفيكاتسيالاۋ قاجەت

استانا. 29 مامىر. مەملەكەت باسشىسى ەۋرازيالىق ەكونوميكالىق وداق قۇرۋ تۋرالى كەلىسىم-شارتتى راتيفيكاتسيالاۋ ۋاقىتىن بىرىزدەندىرۋدى ۇسىندى. بۇل تۋرالى «قازاقپارات» حابارلادى. استانادا ءوتىپ جاتقان جوعارى ەۋرازيالىق ەكونوميكالىق كەڭەس ۇستىندە نۇرسۇلتان نازارباەۆ: «قۇجاتقا قول قويعاننان كەيىن, ونى پارلامەنتتەرىمىزدە راتيفيكاتسيالاۋ قاجەت. سوندىقتان, ءبىزدىڭ دەپۋتاتتىق كورپۋستارىمىزدىڭ الدىندا قازىرگى كەزدەگى ەڭ ماڭىزدى ءارى كەڭ اۋقىمدى حالىقارالىق قۇجاتتاردىڭ ءبىرى بولىپ سانالاتىن ءبىزدىڭ بۇگىنگى كەلىسىم-شارتىمىزدى بەكىتۋدە ۇلكەن جۇمىس كۇتىپ تۇر», – دەدى. سونداي-اق, ول: «مەن بۇل جۇمىستىڭ ۋاقىتىن ءۇش ەلدە دە بىرىزدەندىرىپ, وداقتىڭ 2015 جىلدىڭ 1 قاڭتارىندا تولىق جۇمىسقا كىرىسۋىن قامتاماسىز ەتۋدى ۇسىنامىن», – دەدى. مەملەكەت باسشىسى كەدەن وداعىنا مۇشە ەلدەردىڭ پارلامەنتتەرىندە بىرىگىپ جۇمىس ىستەۋدىڭ مول تاجىريبەسى بار ەكەنىن اتاپ ءوتتى. پرەزيدەنت: «ءبىزدىڭ پارلامەنتتەرىمىزدە ءبىر ۋاقىتتا راتيفيكاتسيالاۋ تاجىريبەسى بار. سوندىقتان, مەنىڭ ويىمشا, دەپۋتاتتارىمىز بۇل قىزمەتتى ابىرويمەن اتقارىپ شىعادى, بۇل جولدا ءبىز ولارعا بارلىق قۇجاتتاردى دايىنداۋدا كومەكتەسەمىز», – دەدى. جولدىباي بازار. دەرەككوز: «قازاقپارات». فوتو: ورىنباي بالمۇرات.