ەۋرازيالىق ەكونوميكالىق وداققا ءىرى ەكونوميكالىق ويىنشىلار قىزىعۋشىلىق تانىتۋدا

استانا. 29 مامىر. بۇگىندە ءبىز بىرلەسىپ, ەكونوميكالىق دامۋدىڭ قۋاتتى, تارتىمدى ورتالىعىن, 170 ميلليوننان استام حالىقتى بىرىكتىرەتىن ءىرى وڭىرلىك نارىقتى قۇرۋدامىز. رەسەي پرەزيدەنتى ۆلاديمير پۋتين ەۋرازيالىق ەكونوميكالىق وداق قۇرۋ تۋرالى شارتقا قول قويۋ بارىسىندا وسىلاي دەدى. بۇل تۋرالى akorda.kz حابارلادى. ۆلاديمير پۋتين: «الەمدىك ارەنادا حالىقارالىق قۇقىق سۋبەكتىسىنە تولىق كولەمدە يە جانە دۇنيەجۇزىلىك ساۋدا ۇيىمى ۇستانىمدارىنا ساي جاڭا ەكونوميكالىق ۇيىم پايدا بولادى. وداقتىڭ ۇلتۇستىلىك ورگاندارىنا جەكەلەگەن وكىلەتتىلىكتەردى بەرۋ ءبىزدىڭ ەلدەرىمىزدىڭ ەگەمەندەگىنە تۇبەگەيلى زيان تيگىزبەيتىندىگى ماڭىزدى», – دەدى. سونداي-اق, ول ەۋرازيالىق ەكونوميكالىق وداققا الەمدەگى ءىرى ويىنشىلار قىزىعۋشىلىق تانىتىپ وتىرعانىن دا اتاپ ءوتتى. بۇدان بولەك, رەسەي پرەزيدەنتى: «ەۋرازيالىق ەكونوميكالىق وداق ەلدەرىندە دامىعان ونەركاسىپ, يندۋستريالىق بازا, قۋاتتى كادرلىق, ينتەللەكتۋالدىق, مادەني الەۋەت بار. گەوگرافيالىق جاعدايىمىز بىزگە تەك وڭىرلىك قانا ەمەس, جاھاندىق تا ماڭىزى بار كولىك-لوگيستيكالىق باعدارلار قالىپتاستىرۋعا, ەۋروپا مەن ازيانىڭ اۋقىمدى ساۋدا جولدارىن وزىمىزگە «باعىندىرۋعا» مۇمكىندىك بەرەدى. وسىنىڭ بارلىعى – ءبىزدىڭ بىرلەستىگىمىزدىڭ باسەكەگە قابىلەتتىلىگىنىڭ, ونىڭ جەدەل وزگەرىپ جاتقان ءارى كۇردەلى الەمدەگى قارقىندى دامۋىنىڭ كەپىلى, – دەدى. جولدىباي بازار. دەرەككوز: akorda.kz. فوتو: ورىنباي بالمۇرات.