«پروگرەسسيۆتى ەلدىڭ تاعى ءبىر ماڭىزدى بەلگىسى - ايەلدىڭ قوعامداعى مارتەبەسى. سوندىقتان ءبىز ايەلدەردىڭ قۇقىقتارىن قورعاۋعا ەرەكشە نازار اۋدارۋىمىز كەرەك. سوڭعى جىلدارى ءبىز بۇل ماسەلەدە ايتارلىقتاي جەتىستىكتەرگە جەتتىك. وتباسىلىق-تۇرمىستىق زورلىق-زومبىلىق ءۇشىن جاۋاپكەرشىلىكتى كۇشەيتۋ جانە ەڭبەك كەمسىتۋشىلىگىن جويۋ ءۇشىن كەشەندى شارالار قابىلداندى.
انا مەن بالا تاربيەسى ءۇشىن جاعداي جاقساردى. مەملەكەت جۇيەلى دەڭگەيدە ايەلدەردىڭ ساياساتقا, مەملەكەتتىك باسقارۋعا, بيزنەسكە قاتىسۋ مۇمكىندىكتەرىن كەڭەيتەدى. جاھاندىق رەيتينگتەرگە سايكەس, گەندەرلىك تەڭدىك بويىنشا قازاقستان سينگاپۋرمەن, وڭتۇستىك كورەيامەن, جاپونيامەن, بىرىككەن اراب امىرلىكتەرىمەن قاتار ازيانىڭ جەتەكشى ەلدەرىنىڭ قاتارىنا تۇراقتى كىرەدى», دەدى مەملەكەت باسشىسى.
وسى ورايدا ول ءبىزدىڭ تاريحىمىزدا ايەلدەر ارقاشان ماڭىزدى ءرول اتقارعانىن جانە قوعامدا ەرەكشە ورىن الاتىنىن ءسوز ەتتى.
« ۇلى دالانىڭ قىزدارى حالقىمىزدىڭ مادەني داستۇرلەرى مەن رۋحاني-ادامگەرشىلىك قۇندىلىقتارىنىڭ سەنىمدى ساقتاۋشىلارى بولدى. سوندىقتان پروگرەسس پەن جاسامپازدىق جولىندا تۇراقتى تۇردە العا جىلجىپ, ءبىز ايەلدەردىڭ قۇقىقتارىن شەكتەيتىن مەنتاليتەتىمىزگە جات تەندەنتسيالارعا بەرىلمەۋىمىز كەرەك», دەدى پرەزيدەنت.
