جاڭا جۇمىس ءتارتىبى بەكىتىلدى

“نۇر وتان” پارتياسىنىڭ ورتالىق اپپاراتىندا “قازاقستان رەسپۋبليكاسىنىڭ 2010-2014 جىلدارعا ارنالعان  ۇدەمەلى يندۋستريالىق-يننوۆاتسيالىق دامۋ” مەملەكەتتىك باعدارلاماسىنىڭ جۇزەگە اسى­رىلۋ بارىسىن تالقىعا سالعان پارتياارالىق كەڭەستىڭ  ءىX وتىرىسى ءوتتى, دەپ حابارلادى پارتيانىڭ ءباسپاسوز قىزمەتى. جيىنعا ساياسي پارتيالار جەتەكشىلەرى, پارلامەنت دەپۋتاتتارى, يندۋستريا جانە جاڭا تەحنولوگيالار, قارجى  مينيس­تر­لىكتەرى, ساراپتاما قاۋىمداستىعى مەن باق وكىلدەرى قاتىستى. باعدارلاماعا سايكەس الداعى 5 جىلدا ءۇش ماڭىزدى ماسەلە ءوز شەشىمىن تابۋعا ءتيىس. ولار: مۇناي مەن مەتالل وڭدەۋدەن بارىنشا كوپ پايدا تابۋ;  تۇرعىنداردى ماڭىزدى جوبالارعا تارتۋ ارقىلى قازاق­ستان­دىق­تار­دىڭ يگىلىگىن جانە ەڭبەك ونىمدىلىگىن ارتتىرۋ;  ترانزيتتىك مۇمكىندىكتى پايدالانۋ. وسى ماسەلەلەردى شەشۋ ءۇشىن 12 نەگىزگى سالا انىقتالدى. جيىن قورىتىندىسى بويىنشا ۇكىمەتكە ۇسىنىستار قابىلدانىپ, پارتياارالىق كەڭەستىڭ جاڭا جۇمىس ءتارتىبى بەكىتىلدى.