ساۋدا جانە ينتەگراتسيا مينيسترلىگىنىڭ حابارلاۋىنشا, زەرتتەۋدىڭ نەگىزگى باعىتى – ساۋدا راسىمدەرىن جەڭىلدەتۋ جانە ەكسپورتتى ىلگەرىلەتۋ. ساراپشىلاردىڭ پىكىرىنە قاراعاندا, ساۋدا راسىمدەرىن جەڭىلدەتۋدەگى شاعىن جەتىستىكتەردىڭ ءوزى دامۋدىڭ كەز كەلگەن دەڭگەيىندەگى ەلدەردە شاعىن جانە ورتا بيزنەستى ەكسپورتتاۋشىعا اينالدىرۋ مۇمكىندىگىن 3 پايىزعا دەيىن جەدەلدەتۋى مۇمكىن. كەدەندىك راسىمدەردى اۆتوماتتاندىرۋ سياقتى سالالار شوب كاسىپورىندارىنىڭ ەكسپورتىن 4,4-6,5 پايىزعا دەيىن ارتتىرماق.
سوڭعى سەگىز ايداعى گەوساياسي وزگەرىستەرگە جانە ءداستۇرلى لوگيستيكالىق تىزبەكتەردىڭ ۇزىلۋىنە قاراماستان, ورتالىق ازياداعى ساۋدا بايلانىستارى بەرىك بولىپ قالا بەرەدى. 2022 جىلدىڭ 8 ايىندا قازاقستاننىڭ ورتالىق ازيا ەلدەرىمەن تاۋار اينالىمى 4,8 ملرد دوللاردى قۇراعان. بۇل وتكەن جىلدىڭ سايكەس كەزەڭىمەن سالىستىرعاندا 26,8 پايىزعا جوعارى.
ورتالىق ازيا ەلدەرىنە ءۇش جالپى ءۇردىس ءتان. بۇل – وڭىرىشىلىك ساۋدانى كۇشەيتۋ, ترانسشەكارالىق قاعازسىز ساۋداعا كوشۋدى قوسا العاندا, ساۋدا راسىمدەرىن وڭايلاتۋ جانە ەكسپورتتى قولداۋدىڭ تولىققاندى ەكوجۇيەسىن قالىپتاستىرۋ.
ەىدۇ ساراپشىلارى ءوز جۇمىسىندا ورتالىق ازيا ەلدەرىندەگى ساۋدا راسىمدەرىن جەڭىلدەتۋدى 11 ينديكاتور بويىنشا باعالادى. ەىدۇ ساۋدا ساياساتى بولىمشەسىنىڭ, ساۋدا جانە اۋىل شارۋاشىلىعى ءبولىمىنىڭ تالداۋشىسى سيلۆيا سورەسكۋ قازاقستاننىڭ اشىقتىعى مەن بولجامدىلىعى, كەدەندىك راسىمدەردى اۆتوماتتاندىرۋ, باجدار مەن الىمدار سياقتى كوپتەگەن پوزيتسيا بويىنشا كورسەتكىشتەرى ورتا دەڭگەيدەن جوعارى جانە وڭىردەگى كورشىلەردەن وزىق ەكەنىن اتاپ ءوتتى. قۇجاتتاردى ۇسىنۋعا قويىلاتىن تالاپتاردى وڭتايلاندىرۋ, ولاردى ەلەكتروندى تۇردە بەرۋ جانە ساۋدا سالاسىندا ء«بىر تەرەزە» قىزمەتىن قۇرۋ سالاسىندا ايتارلىقتاي پروگرەسكە قول جەتكىزىلگەن. سونداي-اق سەمينار بارىسىندا ول ساۋدا راسىمدەرىن وڭتايلاندىرۋ ءۇشىن كۇش سالۋدىڭ نەگىزگى ماسەلەلەرى مەن پەرسپەكتيۆالىق نۇكتەلەرىن دە ايتتى.
قازىر سالالىق ۆەدومستۆو ساۋدا راسىمدەرىن وڭايلاتۋ بويىنشا بەلسەندى جۇمىس جۇرگىزۋدە جانە ورتالىق ازيا ەلدەرىمەن ساۋدا ىنتىماقتاستىعىن دامىتۋعا ەلەۋلى كوڭىل ءبولىپ جاتىر.
ەسكە سالىپ وتەيىك, جوبانىڭ ەكىنشى كەزەڭى ورتالىق ازيا ەلدەرى اراسىنداعى ساۋدا قاتىناستارىن نىعايتۋعا باعىتتالعان. جوبانىڭ ماقساتى ورتالىق ازيانىڭ التى ەلىنە – قازاقستان, قىرعىزستان, تاجىكستان, تۇرىكمەنستان, وزبەكستان, اۋعانستانمەن ساۋدا بايلانىستارى مەن حالىقارالىق ينتەگراتسيانى كەڭەيتۋ ءۇشىن ءوز مۇمكىندىكتەرىن بارىنشا پايدالانۋعا جاعداي جاسايتىن ساياسات پەن قۇرالدار بويىنشا تالدامالىق جانە پراكتيكالىق باسشىلىقتى بەرۋ. جوبانى ەىدۇ ساۋدا جانە ينتەگراتسيا مينيسترلىگىمەن جانە «QazTrade» اق-مەن ىنتىماقتاستىقتا ىسكە اسىرۋدا. جوبانىڭ ۇزاقتىعى – 2 جىل.
