قور تاراتقان اقپاراتقا سۇيەنسەك, زەينەتاقى جيناقتارىن الۋ قارقىنى تومەندەپ كەلە جاتىر. مىسالى, 2022 جىلدىڭ قازان ايىندا 7,5 ملرد تەڭگە سوماسىنا 2 993 ءوتىنىش ورىندالدى. سالىستىرۋ ءۇشىن ايتار بولساق, 2021 جىلدىڭ قازان ايىندا 87,8 ملرد تەڭگە سوماسىنا 35 434 ءوتىنىش ورىندالعان ەدى.
ورىندالعان وتىنىشتەردىڭ ەڭ كوبى الماتى قالاسىنىڭ (17,61 پايىز), استانا قالاسىنىڭ (14 پايىز), ماڭعىستاۋ وبلىسىنىڭ (10,33 پايىز) تۇرعىندارى تاراپىنان جولدانعان.
«سالىمشىلار (الۋشىلار) وزدەرىنىڭ جيناقتارىن پايدالاناتىن ماقساتتاردى تالداي وتىرىپ, كەلەسى نەگىزگى باعىتتاردى اتاپ وتۋگە بولادى. كوبىنەسە (بارلىق وتىنىشتەردىڭ شامامەن 36%) ازاماتتىق-قۇقىقتىق مامىلەلەر بويىنشا مەنشىككە تۇرعىن ءۇي ساتىپ الۋ (تۇپكىلىكتى ەسەپ ايىرىسۋ) جانە جەكە تۇرعىن ءۇي سالۋ (مەنشىگىندە جەر ۋچاسكەسى بولعان جاعدايدا) ءجيى تىركەلدى. وتىنىشتەردىڭ 21 پايىزدان استامى سالىمشىلاردىڭ (الۋشىلاردىڭ) تۇرعىن ءۇي قۇرىلىس جيناقتارى باعدارلامالارى بويىنشا زەينەتاقى قاراجاتىن پايدالانۋى ءۇشىن ورىندالدى. وتىنىشتەردىڭ تاعى 21 پايىزى ودان ءارى جيناقتاۋ ءۇشىن تۇرعىن ءۇي قۇرىلىس جيناق اقشاسىنا سالىمدى تولىقتىرۋ ماقساتىندا ورىندالدى. وتىنىشتەردىڭ شامامەن 20 پايىزى تۇرعىن ءۇي ساتىپ الۋعا (ونىڭ ىشىندە يسلام بانكىنىڭ قارجىلاندىرۋى شەڭبەرىندە) يپوتەكالىق تۇرعىن ءۇي قارىزىن الۋ ءۇشىن باستاپقى جارنانى ەنگىزۋگە, يپوتەكالىق تۇرعىن ءۇي قارىزى بويىنشا بەرەشەكتى تولىق جانە ءىشىنارا وتەۋگە جانە ونى قايتا قارجىلاندىرۋعا باعىتتالدى», دەلىنەدى قور دەرەگىندە.
اتاپ وتەرلىگى, ۋاكىلەتتى وپەراتورلاردان سالىمشىلاردىڭ (الۋشىلاردىڭ) جەكە زەينەتاقى شوتتارىنا (جزش) شامامەن 456,3 ملرد تەڭگە قاراجات قايتارىلدى. سەبەبى سۇرانىم يەسىنىڭ ءوتىنىشى جانە وزگە دە سەبەپتەرمەن قازاقستاندىقتار بىرجولعى زەينەتاقى تولەمدەرىن بەلگىلەنگەن مەرزىمدە تۇرعىن ءۇي جاعدايىن جاقسارتۋعا پايدالانباعان.
سونىمەن قاتار بجزق ەمدەلۋگە بەرىلگەن 311,1 ملرد تەڭگەگە 395 730 ءوتىنىشتى ورىندادى. بۇل رەتتە الۋعا بولاتىن ورتاشا سوما – شامامەن 0,8 ملن تەڭگە. 2022 جىلدىڭ قازان ايىندا شامامەن 3 ملرد تەڭگە سوماسىنا 2 362 ءوتىنىش ورىندالعان (سالىستىرۋ ءۇشىن: وتكەن جىلدىڭ اتالعان ايىندا – 10,8 ملرد تەڭگە سوماسىنا 12 462 ءوتىنىش).
كوبىنەسە (وتىنىشتەردىڭ 96 پايىزدان استامى) قازاقستاندىقتار وزدەرىنىڭ جيناقتارىن مەديتسينالىق ماقساتتاردا ستوماتولوگيالىق قىزمەتتەرگە جۇمساپتى. وتىنىشتەردىڭ تەك 2,8 پايىزى وفتالمولوگيالىق قىزمەتتەردى الۋ ماقساتىندا ورىندالعان. قالعان مەديتسينالىق باعىتتارعا زەينەتاقى جيناقتارىنىڭ 1 پايىزدان استامى قولدانىلدى.
2022 جىلدىڭ 1 قاراشاسىنداعى جاعداي بويىنشا, ينۆەستيتسيالىق پورتفەلدى باسقارۋشىلارعا (يپب) 8,7 ملرد تەڭگە اۋدارىلىپ, بجزق 5 891 ءوتىنىشتى ورىندادى. بۇل رەتتە بىرەگەي ءوتىنىش بەرۋشىلەردىڭ جالپى سانى – 3 379 ادام. بۇل ءوز جيناقتارىنىڭ ءبىر بولىگىن بىرنەشە باسقارۋشى كومپانياعا بەرۋگە شەشىم قابىلداعان سالىمشىلار بار ەكەنىن بىلدىرەدى. اۋدارىمنىڭ ورتاشا سوماسى – 1,5 ملن تەڭگە.
