تاريحتان تاعىلىم – وتكەنگە تاعزىم

استانادا “پوستكەڭەستىك كەڭىستىكتەگى تاريح عىلىمى: ءوزارا ارىپتەستىك جاعدايى جانە بولاشاعى” اتتى حالىقارالىق دوڭگەلەك ۇستەل بولىپ ءوتتى. اتالعان شارا وسى جىلدىڭ 27-30 مامىر ارالىعىندا وتكىزىلەتىن حالىقارالىق جوبا اياسىندا ۇيىمداستىرىلدى. جوبانى ۇيىمداستىرعان – قازاقستان حالقى اسسامبلەياسى مەن تمد-عا قاتىسۋشى ەلدەر مەملەكەتارالىق گۋمانيتارلىق بايلانىس قورى. قازاقستان مەن رەسەي عالىمدارى ازىرلەگەن جوباعا تمد ەلدەرى مەن اقش, تۇركيا سياقتى ەلدەر عالىمدارى دا قاتىستى. دوڭگەلەك ۇستەلدى وتكىزۋدىڭ ماقساتى عالىمداردىڭ تاريحتى قايتا ەكشەۋدەن وتكىزۋ ارقىلى بۇرمالاۋشىلىققا جول بەرمەۋ جانە دەموكراتيالىق قوعام جاعدايىندا توتاليتارلىق كەزەڭدى سىني تۇرعىدان قايتا پايىمداۋ بولىپ تابىلادى. قر بعم مەملەكەت تاريحى ينستي­تۋتىنىڭ ديرەكتورى, تاريح عىلىمدارىنىڭ دوكتورى, پروفەسسور بۇركىتباي اياعاننىڭ پىكىرىنە قاراعاندا, عالىمدار وزگە ەلدەردىڭ شامىنا تيەتىن اقپاراتتاردى تاراتا سالماي, تاراپتاردى قاناعاتتاندىراتىن ورتاق نۇكتەدە توعىساتىنداي ءبىر تەتىك ىزدەۋلەرى قاجەت. حالىقارالىق ماڭىزدى شاراعا رمگۋ رەكتورى, رعا كوررەسپوندەنت-مۇشەسى, تاريح عىلىمدارىنىڭ دوكتورى ە.ي.پيۆوۆار, م.سينان اتىنداعى ىستامبۇل ۋنيۆەر­سي­تەتىنىڭ پروفەسسورى ابدۋلۋاحاپ قارا, كولۋمبيا ۋنيۆەرسيتەتىنىڭ پروفەسسورى رافيز ابازوۆ, تاراس شەۆچەنكو اتىنداعى كيەۆ ۇلتتىق ۋنيۆەرسيتەتىنىڭ پروفەسسورى ۆ.ي. سەرگيچۋك, م.لومونوسوۆ اتىنداعى ممۋ كەڭەستىك داۋىردەن كەيىنگى كەڭىستىكتى زەرتتەۋ جونىندەگى اقپاراتتىق-ساراپتامالىق ورتالىعىنىڭ باس ديرەكتورى ا.ۆ.ۆلاسوۆ جانە وزگە دە عالىمدار قاتىستى. اسقار تۇراپباي ۇلى.