قازاقستان جول عىلىمي-زەرتتەۋ ينستيتۋتىنىڭ پرەزيدەنتى ارمان الىباەۆا مەملەكەت باسشىسى حالىققا ارناعان جولداۋىندا يندۋستريا جانە ينفراقۇرىلىمدىق دامۋ مينيسترلىگىنە ەلىمىزدەگى اۆتوموبيل جولدارىنىڭ ساپاسىن ارتتىرۋ بويىنشا اۋقىمدى مىندەتتەر جۇكتەگەنىن اتاپ ءوتتى. وسىعان بايلانىستى جول سالاسىندا قىزمەت ەتىپ جۇرگەن وتاندىق عالىمدارعا جاڭا تەحنولوگيالاردى ازىرلەۋ, سونىمەن بىرگە يننوۆاتسيالىق ماتەريالداردى, اۆتوجولدار مەن كوپىرلەردى جوندەۋ, ولاردىڭ قۇرىلىسى جانە جوبالاۋ ادىستەرىن ترانسفەرتتەۋ, سىناقتان وتكىزۋ جانە جۇيەلەۋ جونىندەگى جۇمىستى كۇشەيتۋ تاپسىرىلدى.
– جولداردىڭ ساپاسى كوبىنەسە قۇرىلىس ماتەريالدارىنا بايلانىستى بولادى. سوندىقتان قازاقستان جول عىلىمي-زەرتتەۋ ينستيتۋتى جاڭا تەحنولوگيالار مەن جول-قۇرىلىس ماتەريالدارىنىڭ بىرىڭعاي بازاسىن ازىرلەۋدە. وعان كارەرلەردەن الىنعان سىنامالاردى زەرتحانالىق زەرتتەۋ جانە تاجىريبەلىك ۋچاسكەلەردە جاڭا تەحنولوگيالاردى سىنامالاۋ ناتيجەلەرىن ەنگىزۋ جوسپارلانىپ وتىر. كارەرلەردىڭ گەوگرافيالىق اقپاراتتىق جۇيە كارتاسى, ولاردىڭ قورلارىنىڭ ساپالىق جانە ساندىق كورسەتكىشتەرى بار جول-قۇرىلىس ماتەريالدارىنىڭ ءتىزىلىمى, سونداي-اق ولاردى ەلدىڭ بەلگىلى ءبىر كليماتتىق ايماقتارىندا قولدانۋ جونىندەگى ۇسىنىستارى بار جاڭا تەحنولوگيالار رەيتينگى قالىپتاستىرىلاتىن بولادى, – دەيدى ا.الىباەۆا.
سونداي-اق ول جولداردىڭ قۇرىلىسى جانە جوندەۋ جۇمىستارى بويىنشا جوبالىق-سمەتالىق قۇجاتتاما ازىرلەۋ كەزىندە جوبالاۋ ۇيىمدارى تەك بىرىڭعاي بازاعا ەنگىزىلگەن جول-قۇرىلىس ماتەريالدارى مەن تەحنولوگيالارىن عانا پايدالانۋعا مىندەتتى ەكەنىن ايتتى.
– قازىر جوبالارعا عىلىمي ساراپتاما جۇرگىزۋگە جانە جول سالاسى عىلىمىن دامىتۋعا قۇرىلىس-مونتاجداۋ جۇمىستارىنىڭ قۇنىنان 0,5 پايىز ءبولۋ ماسەلەسى زەردەلەنۋدە. وسىلايشا, جوبالار مەن قۇرىلىس نىساندارىندا جاڭا تەحنولوگيالاردىڭ قولدانىلۋى باقىلاۋدا بولادى, – دەدى ول.
تاقىرىپتىق سەمينار بارىسىندا اسفالتتى, تسەمەنتبەتون جابىندارىن جوندەۋ, قالپىنا كەلتىرۋ جانە قايتا وڭدەۋدىڭ جاڭا تەحنولوگيالارى مەن ادىستەرىنىڭ كەڭ اۋقىمى قامتىلدى. سپيكەرلەر اۆتوموبيل جولدارىن كۇتىپ ۇستاۋ جانە جوندەۋ سالاسىنداعى يننوۆاتسيالىق ازىرلەمەلەر جانە ولاردى تاجىريبە بارىسىندا قولدانۋ تۋرالى ايتىپ بەردى. قاتىسۋشىلاردىڭ نازارىنا پليتالاردىڭ شوگۋى مەن سىنىقتاردى جوندەۋ, جابىننىڭ دەفورماتسيالىق تىگىستەردى گەرمەتيزاتسيالاۋدى قالپىنا كەلتىرۋ, جول تاڭبالارىنىڭ ساقتالۋىن قامتاماسىز ەتۋ, سونداي-اق كوكتايعاق تۋرالى الدىن الا حابارلاۋ جۇيەسى, يكەمدى بەتون توسەنىشتەرىن قولدانا وتىرىپ, جولدار مەن كوپىرلەردىڭ بەتكەيلەرىن نىعايتۋ تەحنيكاسى ۇسىنىلدى.
مۇنداي فورماتتاعى سەمينارلاردى قازاقستاننىڭ بارلىق وڭىرىندە وتكىزۋ جوسپارلانىپ وتىر.
