«قولداۋلارىڭىزعا كوپ راحمەت! مەنى كۇتىپ الۋعا كەلگەن بارشا جانكۇيەرگە العىس ايتامىن. ءوز ەلىمە امان-ەسەن جەتكەنىمە قۋانىشتىمىن. سونىمەن قاتار بارشا قازاقستاندىققا العىس ايتامىن. الداعى ۋاقىتتا الماتى قالاسىندا وتەتىن الەم چەمپيوناتىنا قىزۋ دايىندالامىز», دەدى ابزال اجىعاليەۆ.
سونىمەن قاتار ەلگە ۇلكەن جەتىستىكپەن ورالعان سپورتشىلارىمىزدى اۋەجايدان استانا قالاسى اكىمىنىڭ ورىنباسارى ەسەت بايكەن, قالالىق سپورت باسقارما باسشىسىنىڭ ورىنباسارى ەركەعالي كوربوزوۆ جانە سپورت سالاسىنىڭ بىرقاتار باسشىسى دا گۇل شوقتارىمەن كۇتىپ الدى.
جاڭا ماۋسىمداعى العاشقى ءىرى حالىقارالىق جارىس قازاقستان كومانداسى ءۇشىن ءساتتى ءوتتى. بۇل سايىستا قازاقستاندىق سپورتشىلار الەمدىك دەڭگەيدە جوعارى ورىندارعا شىعۋعا دايىن ەكەندىكتەرىن كورسەتتى.
ەسكە الساق, شورت-ترەكتەن قازاقستان ەرلەر قۇراماسى كانادانىڭ مونرەال قالاسىندا وتكەن الەم كۋبوگىنىڭ العاشقى كەزەڭىندە ەستافەتادا ەكىنشى ورىن العان بولاتىن. بۇل كۆارتەتتە مارە سىزىعىن وڭتۇستىك كورەيا ءبىرىنشى بولىپ قيدى (7:01.850). ال ءبىزدىڭ ۇلتتىق قۇرامانىڭ ناتيجەسى: 7:07.972 مىناداي. قولا مەدال كاناداعا بۇيىردى.
ال, وسى قۇراما اقش-تىڭ سولت-لەيك-سيتي قالاسىندا وتكەن الەم كۋبوگىنىڭ 2-كەزەڭىندە قازاق ەلىنە كۇمىس مەدالدى سىيلاعان بولاتىن. وسى تۇستا ابزال اجىعاليەۆتىڭ 500 مەتر قاشىقتىقتا ونەر كورسەتۋىن ەرەكشە اتاۋعا بولادى. جەرلەسىمىز جارىستا تەك كانادالىق ماكسيم لاۋننان قالىپ كەتتى. ۇزدىك ۇشتىكتى وڭتۇستىك كورەيالىق لي جۋن سو تۇيىندەگەن بولاتىن.
