Qazaq Air قىزمەت كورسەتەتىن جولاۋشىلار رەيسى 2 قاراشادان باستاپ ىسكە كىرىستى. بۇل كۇنى ەلوردادان شىققان العاشقى ۇشاق پاۆلودار اۋەجايىنا كەلىپ قوندى. بۇعان دەيىن اتالعان باعىتتاعى اۋە بايلانىسىن ءتۇرلى كومپانيالار جۇزەگە اسىرىپ, سوڭىندا جولاۋشىلار اعىنى ازايدى دەگەن سەبەپپەن توقتاپ قالعان ەدى. مەملەكەت باسشىسى قاسىم-جومارت توقاەۆ جۋىقتا وڭىرىمىزگە جۇمىس ساپارىمەن كەلگەندە استانا مەن كەرەكۋدى قوساتىن اۋە رەيسىن قالپىنا كەلتىرۋ تۋرالى تاپسىرما بەردى. پرەزيدەنتتىڭ تاپسىرماسى, وسىلايشا, اي وتپەي جاتىپ ومىرشەڭ ەتىلگەنىنە كۋا بولىپ وتىرمىز. ەندى ءوڭىر ازاماتتارى باس قالاعا تەك اۆتوكولىكپەن نەمەسە پويىزبەن عانا ەمەس, ۇشاقپەن دە جەتە الادى. اۋە كەمەسىنىڭ كەستەنى تۇراقتى ساقتاۋى مەملەكەت بيۋدجەتىنەن سۋبسيديالانباق.
«پاۆلودار اۋەجايى» اق باسقارما توراعاسى ەسكەندىر جانداۋلەتوۆتىڭ ايتۋىنشا, ءبىر باعىتقا ساتىلاتىن بيلەتتىڭ قۇنى – 10 مىڭ تەڭگە. «15 جاسقا دەيىنگى بالالارعا جەڭىلدىك قاراستىرىلعان, بيلەت قۇنىنا 20 كيلوگرامعا دەيىنگى باگاج جانە 5 كيلوگرامعا دەيىنگى قول جۇگىن تەگىن الىپ ءجۇرۋ كىرەدى. استانادان ۇشۋ ۋاقىتى ساعات 15.05-تە. ۇشاق پاۆلودارعا 16.05-تە قونىپ, 16.35-تە كەلگەن جاعىنا ۇشىپ كەتەدى. ياعني ەكى ورتاعا اۋە كەمەسى شامامەن 1 ساعاتتاي ۋاقىت جۇمسايدى», دەيدى اۋەجاي باسشىسى.
اۋەجايداعىلار جولاۋشىلار ءنوپىرى العاشقى كۇننەن-اق بايقالعانىن اتاپ ءوتتى. ءبىر اپتانىڭ بيلەتتەرى ءبىر كۇندە ساتىلىپ كەتكەن. جالپى رەيس دۇيسەنبى, سارسەنبى, جۇما جانە جەكسەنبى كۇندەرى قىزمەت كورسەتەدى. جولاۋشىلاردى Bombardier Q400 ۇشاعى تاسىمالدايدى, وعان 76-دان 82-گە دەيىن ادام سىيادى.
ايتا كەتەلىك, پاندەميا كەزەڭىندە ۇشاق بيلەتىنىڭ قۇنى 12-40 مىڭ تەڭگە ارالىعىندا بولىپ كەلگەن. ءومىردىڭ بارلىق سالاسى قىمباتتاپ جاتقان كەزەڭدە بۇل باعىتتاعى اۋە رەيسىمەن ءجۇرۋ قۇنى نەبارى 10 مىڭ تەڭگەنى قۇراۋى ءوڭىر حالقىن قۋانتىپ وتىر. بۇگىندە پاۆلوداردان استاناعا جۇمىس بابىمەن ءجيى باراتىن, ۆاحتالىق اۋىسىم ءۇشىن ەلوردا ارقىلى ۇشاتىن ازاماتتار اۋە كەمەسىنىڭ ءتيىمدى بولاتىنىن ايتادى.
پاۆلودار
