بۇگىن وبلىس اكىمى نۇرلىبەك نالىباەۆتىڭ توراعالىعىمەن اكتيۆ وتىرىسى ءوتتى. باسقوسۋعا ارنايى سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ۇلان ساركۋلوۆ كەلدى.
وتىرىستا وبلىس اكىمى وسى كەزگە دەيىن سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىسى بويىنشا دەپارتامەنتىنىڭ باسشىسى قىزمەتىن اتقارىپ, سىبايلاس جەمقورلىققا قارسى ءىس-قيمىل اگەنتتىگىنىڭ ارنايى دەپارتامەنتى باسشىسىنىڭ ورىنباسارى لاۋازىمىنا تاعايىندالعان رۋستام اقمىرزاەۆتىڭ ناتيجەلى ەڭبەگىن اتاپ ءوتتى.
جيىندا ۇلان ساركۋلوۆ سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىسى بويىنشا جاڭا دەپارتامەنت باسشىسى قىزمەتىنە تاعايىندالعان مىرزالى سەرىكجان قۋانىشبەك ۇلىن تانىستىردى.
ايماق باسشىسى جاڭا باسشىنىڭ قىزمەتىنە ساتتىلىك تىلەپ, بىرلەسىپ ناتيجەلى جۇمىس اتقاراتىنىنا سەنىم ءبىلدىردى.
سەرىكجان مىرزالى 1979 جىلى سەمەي وبلىسىندا دۇنيەگە كەلگەن. ىشكى ىستەر مينيسترلىگىنىڭ قاراعاندى جوعارعى مەكتەبىن «قۇقىقتانۋ» ماماندىعى بويىنشا بىتىرگەن. ەڭبەك جولىن 1999 جىلى ىشكى ىستەر ورگاندارىندا باستاعان.
1999 - 2002 جىلدارى ىشكى ىستەر ورگاندارىندا ابىرويلى ەڭبەك ەتتى.
2002 - 2012 جىلدارى پروكۋراتۋرا ورگاندارىندا قىزمەت اتقارعان.
ال, 2012 - 2016 جىلدارى قارجى پوليتسياسى جانە سىبايلاس جەمقورلىققا قارسى قىزمەت ورگاندارىندا باسشىلىق لاۋازىمداردا جوعارى دەڭگەيدە جۇمىس ىستەي ءبىلدى.
سەرىكجان قۋانىشبەك ۇلى 2016 – 2022 جىلدارى قر باس پروكۋرورىنىڭ كومەكشىسى, باسقارما باستىعى, وسكەمەن قالاسىنىڭ پروكۋرورى لاۋازىمدارىندا لايىقتى دەڭگەيدە قىزمەت اتقاردى.
2022 جىلدىڭ اقپان ايىنان باستاپ وسى كەزگە دەيىن سىبايلاس جەمقورلىققا قارسى ءىس-قيمىل اگەنتتىگىنىڭ قوستاناي وبلىسى بويىنشا دەپارتامەنتىنىڭ باسشىسى قىزمەتىندە بولدى.
