بۇل سايلاۋدى ارالىق سايلاۋ دەۋگە بولادى. ويتكەنى بۇل پرەزيدەنت مەرزىمىنىڭ ورتاسىندا وتەدى. ولار بۇل سايلاۋدا وكىلدەر پالاتاسىن, سەناتتىڭ ۇشتەن ءبىرىن, بىرقاتار شتاتتاعى زاڭ شىعارۋشى ورگاندار مەن گۋبەرناتورلاردى تاڭدايدى.
امەريكادا ءبارى پرەزيدەنتكە بايلانىستى ەمەس. ساياسي جۇيە كوبىنە پرەزيدەنت جاقتاستارىمەن شەشىلەدى. سايلاۋشىلار باسقا سايلانبالى قىزمەتتەردى – كونگرەسس مۇشەلەرى, سەناتورلار, گۋبەرناتورلار جانە شتاتتىڭ زاڭ شىعارۋشى ورگانىنىڭ مۇشەلەرىن سايلايدى.
سايلاۋ قالاي وتەدى؟
ەكى پارتيا سايلاۋشىلارىنىڭ دەموگرافياسى ءجىتى زەرتتەلەدى. ياعني ولاردىڭ تۇراتىن جەرى, جاسى, جىنىسى مەن ناسىلدىك قۇرامى, تابىس دەڭگەيى مەن ءبىلىم دەڭگەيى سارالانىپ, ولارعا اناليز جاسالادى.
كەلەسى بۇل سيپاتتامالاردىڭ بارلىعى كارتا بەتىنە تۇسىرىلەدى. كوبىنە قالالاردا دەموكراتتار, اۋىلدىق جەرلەردە رەسپۋبليكاشىلدار باسىم بولىپ, ال قالا ماڭىنداعى اۋداندار ناعىز شەشۋشى ءرول اتقارىپ جاتادى.
مۇنىڭ استارىندا ۇلكەن ساياسات جاتىر. ويتكەنى بۇل اقپاراتتارمەن قارۋلانعان مەملەكەت ساياساتكەرلەرى ءوز پارتياسىنا ءتيىمدى جاقتاردى قاراستىرىپ, سايلاۋ وكرۋگتەرىنىڭ شەكارالارىن انىقتاۋعا تىرىسادى. ياعني بۇل شەكارالاردى كەز كەلگەن جولمەن سالۋعا بولادى: كونسەرۆاتيۆتى شتاتتا, ۇلكەن قالانى بىرنەشە اۋدانعا ءبولىپ, ولاردى اۋىلدىڭ ۇلكەن بولىكتەرىنە قوسۋعا بولادى. وسىلايشا قالا تۇرعىندارىنىڭ داۋىسى سول اۋدان بولىگىنە تيەسىلى بولادى. ليبەرالدى شتاتتا, كەرىسىنشە, قالالىق وكرۋگكە اۋىلدىق جەرلەردى قوسۋعا بولادى. بىراق اۋىل تۇرعىندارىنىڭ داۋىسى قالالىق سايلاۋشىلاردان باسىم تۇسپەيتىندەي ەتىپ جاسايدى. بۇل تاجىريبەنىڭ عىلىمي اتاۋى دجەرريمەندەرينگ دەپ اتالادى.
بۇل تۇستا باستى نازارعا الاتىن جايت - ءار تاراپتىڭ ۇستانىمى. ماسەلەن دەموكراتتار امەريكاداعى ينفلياتسيانىڭ جوعارى كورسەتكىشتەرىنىڭ تۇسىندا ەكونوميكالىق ساياساتتان گورى باسقا تاقىرىپتارعا نازار اۋداردى. مىسالى, ابورت تاقىرىبىنا. سونداي-اق قارۋ ساۋداسىنا شەكتەۋ قويۋدى جاقتادى. ال حالىقتى قازىر ەلدىڭ ەكونوميكالىق جاعدايى كوبىرەك الاڭداتىپ وتىر. بۇل دەگەنىمىز حالىق رەسپۋبليكاشىلداردى تاڭداۋى مۇمكىن.
رەسپۋبليكاشىلدار جەڭىسكە جەتكەن جاعدايدا وكىلدەر پالاتاسىنداعى بارلىق جەتەكشى ورىنداردى الىپ, ونىڭ كۇن ءتارتىبىن تولىعىمەن وزگەرتەدى.