وسك مۇشەسى اناستاسيا ششەگورتسوۆا كانديداتتاردىڭ ۇگىت-ناسيحات جۇمىستارىن كانديدات ءوزى بەلگىلەپ, سەنىم بىلدىرگەن ادامدار عانا جۇزەگە اسىرا الاتىنىن ءتۇسىندىردى.
«سوندىقتان بۇل جاعدايدا كانديدات سەنىم بىلدىرگەن ادام دەباتقا قاتىسا الادى. شتاب ورتالىقتارى بىزگە دەباتقا قاتىساتىن كانديداتتار ءتىزىمىن ۇسىندى. ءبىز سەنىمحاتقا قارادىق. مىندەتتەرگە تولىق سايكەس كەلەدى. ناقتى ءتىزىم بەكىتىلدى», دەدى ا.ششەگورتسوۆا.
11 قاراشادا «حابار» تەلەارناسىندا وتەتىن تەلەدەباتقا قاتىسۋشىلاردىڭ ءتىزىمى بەلگىلى بولدى.
«دەباتقا قاراقات ابدەن, نۇرلان اۋەسباەۆ, جيگۋلي دايراباەۆ, مەيرام قاجىكەن, ەرلان قوشانوۆ (قاسىم-جومارت توقاەۆتىڭ وكىلى رەتىندە), سالتانات تۇرسىنبەكوۆا قاتىسادى. دەبات 4 راۋندتا وتەدى. ءبىرىنشىسى – سايلاۋالدى باعدارلامانىڭ تۇساۋكەسەرى, ەكىنشىسى – پىكىرتالاس, وندا قاتىسۋشىلار قارسىلاستارىنا ەكى سۇراقتان قويادى, سونىمەن قاتار ەكى سۇراققا جاۋاپ بەرەدى. سۇراقتى قۇراستىرۋعا 30 سەكۋند, جاۋاپ بەرۋگە ەكى مينۋت ۋاقىت بەرىلەدى. ءۇشىنشى تۋر – سايلاۋشىلاردىڭ سۇراقتارى. ءار ۇمىتكەرگە ءبىر سۇراق قويىلىپ, جاۋاپ بەرۋگە ەكى مينۋت بەرىلەدى. ءتورتىنشى تۋر – سايلاۋشىلارعا ۇندەۋ, ۋاقىتى - ەكى مينۋتقا دەيىن», دەپ ءتۇسىندىردى قر وسك مۇشەسى.
قازاقستاندا كەزەكتەن تىس پرەزيدەنت سايلاۋى 20 قاراشاعا بەلگىلەنگەن.
