«جالپى, قوعامىمىزدا زاڭ مەن ءتارتىپتىڭ ۇستەمدىگى بولۋى قاجەت. باسقا جولمەن ەشقانداي جۇمىس تابىستى بولمايدى, تەك بوس ءسوز بەن جالعان ۇرانداردىڭ استىندا قالامىز. ءاربىر الەۋمەتتىك ماسەلەنى قانشالىقتى كۇردەلى بولسا دا, اسىرە ساياسيلاندىرۋدىڭ قاجەتى جوق. ءبىز ءبارىمىز ءبىر مەملەكەت بولىپ, ءبىر قوعام بولىپ كەز كەلگەن تۇيتكىلدى شەشە الاتىنىمىزعا ەشقانداي كۇمان بولماۋعا ءتيىس», دەدى مەملەكەت باسشىسى.
بۇدان سوڭ, ول قازاق قاي زاماندا دا ۇلكەنىن سىيلاعان, اقساقالداردىڭ اتالى سوزىنە توقتاعانىن ەسكە سالدى.
«اۋزى دۋالى قارتتارىمىز ءاردايىم ەلدىڭ ۇيىتقىسى بولعان. «قارياسى بار ەلدىڭ قازىناسى بار» دەگەن ءسوز سودان قالعان. ءبىز حالقىمىزدىڭ يگى داستۇرلەرى مەن قازىرگى زاماننىڭ تالاپتارىن ۇيلەستىرە بىلگەنىمىز ابزال. وسى ورايدا, مەن اقساقالدار كەڭەسىنىڭ جۇمىسىن جانداندىرۋ كەرەك دەپ سانايمىن.
شىن مانىندە, ەل ىشىندە جاستارعا اقىل-كەڭەسىن ايتىپ, دۇرىس جول سىلتەيتىن داناگوي قاريالارىمىز از ەمەس. اقساقالدارىمىز وسكەلەڭ ۇرپاقتى تاربيەلەۋگە, ەل بىرلىگىن ساقتاۋعا اتسالىسىپ, ورتاق ىسكە زور ۇلەس قوسارى انىق. اقساقالدار كەڭەسى بارلىق ايماقتا بىردەي بەلسەندى ەمەس», دەدى پرەزيدەنت.
وسى رەتتە ول اقساقالدار كەڭەسىنىڭ جۇمىسىن جۇيەلەپ, جانداندىرۋ كەرەگىن ايتتى.
«بالكىم, كەڭەستەردى اسسامبلەيانىڭ جانىنا توپتاستىرۋ دۇرىس بولار ەدى. ولاردىڭ بەدەلىن كوتەرىپ, مارتەبەسىن ارتتىرۋ قاجەت. بۇدان ەش ۇتىلمايمىز», دەدى ق.توقاەۆ.
