مازمۇندى ءىس-شارانىڭ اشىلۋىندا استانا قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ الاش ارداقتىسىنىڭ شىعارماشىلىعى مەن قايراتكەرلىگى تۋرالى ءسوز قوزعاپ, ونەگەلى شارانىڭ ماڭىزىنا توقتالدى.
– ءبىز ايتۋلى تۇلعالارىمىزدىڭ ءومىر جولدارىنان تاعىلىم الىپ, جاس ۇرپاقتىڭ بويىنا دارىتىپ, ناسيحاتتاي بەرۋىمىز كەرەك. بيىل ۇلت ۇستازىنىڭ مەرەيتويى حالىقارالىق دەڭگەيدە تويلاندى. جىل سوڭىنا تامان استانا قالاسى اكىمدىگىنىڭ ۇيىتقى بولۋىمەن انكارا قالاسىندا الاش ارىسىنىڭ ەسكەرتكىش بوي كوتەرەدى دەپ جوسپارلاپ وتىرمىز. بۇگىنگى ءىس-شارانىڭ دا ءجونى بولەك. احمەت بايتۇرسىن ۇلىنىڭ ولەڭدەرىن وقىپ, مىسالدارىن ايتۋمەن قاتار ونى تەاترلاندىرىلعان قويىلىم ارقىلى كورسەتۋ بالالارعا ەرەكشە اسەر قالدىرادى, – دەي كەلىپ, سايىسقا قاتىسۋشىلارعا ساتتىلىك تىلەدى.
«قارا شاڭىراق» ۇلتتىق تاربيە بەرۋ مەكتەبىنىڭ جەتەكشىسى تۇرار شاكەننىڭ ايتۋىنشا, سايىستىڭ باستى ماقساتى – كورنەكتى تۇلعانىڭ اعارتۋشىلىق باعىتتاعى مۇراسىن ناسيحاتتاپ, جاس ۇرپاقتى انا ءتىلىمىز بەن ۇلتتىق قۇندىلىقتاردى قۇرمەتتەۋگە تاربيەلەۋ.
سايىسقا ەلوردا مەكتەپتەرىنەن 100-گە جۋىق وقۋشى قاتىسىپ, ولار «ۇلتقا قىزمەت – ءار قازاق بالاسىنا مىندەت», «ۇلت ۇستازىنا حات» دەپ اتالعان ەكى ءبولىم بويىنشا سىنعا ءتۇستى. ءبىرىنشى بولىمدە بالالار ا.بايتۇرسىن ۇلىنىڭ شىعارمالارىنان قويىلىم ازىرلەسە, ەكىنشى بولىمدە ۇلت ۇستازىنا ارناپ جازعان حاتى ارقىلى بولاشاققا كوزقاراسىن جەتكىزدى. وعان تاريح عىلىمدارىنىڭ كانديداتى يزاتحان مەدەشوۆا, ارداگەر ۇستاز قاجىمۇرات ءناسي ۇلى, استانا قالاسى تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى ايگەرىم مولدا-
باەۆا, ءبىلىم باسقارماسىنىڭ ادىسكەرى ءاليا جاڭاباەۆا جانە «قارا شاڭىراق» ۇلتتىق تاربيە بەرۋ مەكتەبىنىڭ جەتەكشىسى تۇرار شاكەن قازىلىق ەتتى.
سونىمەن, ۇلت ۇستازىنىڭ شىعارمالارىن دارىپتەگەن سايىستىڭ باس جۇلدەسىن اباي قۇنانباي ۇلى اتىنداعى №87 مەكتەپ-گيمنازياسى جەڭىپ الدى. ءبىرىنشى ورىندى جۇمەكەن ناجىمەدەنوۆ اتىنداعى №93 مەكتەپ-ليتسەيى يەلەنسە, ەكىنشى ورىن ءنازىر تورەقۇلوۆ اتىنداعى №35 مەكتەپ-ليتسەيگە بۇيىردى. ال ءۇشىنشى ورىندى احمەت بايتۇرسىن ۇلى اتىنداعى «binom school» مەكتەپ-ليتسەيى قاناعات تۇتتى. سونداي-اق مۇحتار اۋەزوۆ اتىنداعى №86 مەكتەپ-گيمنازياسى «كورەرمەن كوزايىمى» اتالىمىمەن ماراپاتتالدى.
