ءىس-شاراعا مەملەكەت جانە قوعام قايراتكەرلەرى, باق باسشىلارى مەن وكىلدەرى, بەلگىلى شەتەلدىك جانە وتاندىق عالىمدار, جۋرناليستيكا فاكۋلتەتىنىڭ پروفەسسورلارى, وقىتۋشىلارى مەن ستۋدەنتتەرى قاتىستى.
كونفەرەنتسيا اياسىندا ۇلتتىق يدەولوگيا, اقپاراتتىق قاۋىپسىزدىك, قازىر بەلسەندى قولدانىسقا ەنگەن جاڭا مەديا ترەندەرىنە قاتىستى وزەكتى ماسەلەلەر قاراستىرىلىپ, جۋرناليستىك ءبىلىم بەرۋدىڭ بۇگىنگى كەلبەتى مەن ەرتەڭگى بەينەسى تالقىلاندى.
كونفەرەنتسيانى ۋنيۆەرسيتەت رەكتورى جانسەيىت تۇيمەباەۆ اشتى. ول ءوز سوزىندە قازاقستاننىڭ حالىق جازۋشىسى, مەملەكەت جانە قوعام قايراتكەرى شەرحان مۇرتازانىڭ سىڭىرگەن ەڭبەگىن ەل پرەزيدەنتى قاسىم-جومارت توقاەۆ جوعارى باعالاعانىن ەرەكشە اتاپ ءوتتى.
بەلگىلى اقىن, مەملەكەتتىك سىيلىقتىڭ لاۋرەاتى نۇرلان ورازالين, پروفەسسور قانسەيىت ابدەز ۇلى, قىرعىز رەسپۋبليكاسى ۇعا ش.ايتماتوۆ اتىنداعى ءتىل جانە ادەبيەت ينستيتۋتىنىڭ ديرەكتورى ابدىلجان اقماتاليەۆ, جازۋشى-پۋبليتسيست «انا ءتىلى» گازەتىنىڭ باس رەداكتورى قالي سارسەنباي, پارلامەنت ءماجىلىسىنىڭ دەپۋتاتتارى دارحان مىڭباي مەن جاناربەك ءاشىمجان بايانداما جاسادى. قوناقتار ەستەلىكتەرىمەن ءبولىسىپ, شەرحان مۇرتازانىڭ قايتالانباس تۇلعا, ۇلى جازۋشى, پۋبليتسيست, تەڭدەسى جوق شەبەر اۋدارماشى ەكەنىن اتاپ ءوتتى.
كونفەرەنتسيا قاتىسۋشىلارىنا شەرحان مۇرتازانىڭ شىعارماشىلىعى تۋرالى دەرەكتى فيلم كورسەتىلدى. سونداي-اق ءىس-شارا بارىسىندا قازاقستان رەسپۋبليكاسى سەناتىنىڭ توراعاسى ماۋلەن اشىمباەۆتىڭ, الماتى قالاسىنىڭ اكىمى ەربولات دوساەۆتىڭ قۇتتىقتاۋ حاتتارى وقىلدى. ال شەرحان مۇرتازانىڭ بەس كىتاپتان تۇراتىن «قىزىل جەبە» رومانىن تارجىمالاعان تۇرىك جازۋشىسى, عالىم جانە اۋدارماشى اشۋر وزدەمير ونلاين فورماتتا قۇتتىقتاۋ جولدادى.
جيىن اياسىندا ءال-فارابي اتىنداعى قازۇۋ-دىڭ جۋرناليستيكا فاكۋلتەتىندە شەرحان مۇرتازا اتىنداعى اۋديتوريانىڭ اشىلۋ سالتاناتى مەن تۇساۋكەسەرى ءوتتى. كورنەكتى مەملەكەت قايراتكەرى, حالىق جازۋشىسى جانە ءجۋرناليستىڭ ءومىرى مەن قىزمەتى تۋرالى مول ماعلۇمات بەرەتىن زاماناۋي تەحنولوگيالارمەن جابدىقتالعان وقۋ زەرتحاناسى اشىلدى.
جازۋشى-ءجۋرناليستىڭ ءومىرى مەن شىعارماشىلىعى بولاشاق جۋرناليستەرگە ۇلگى-ونەگە بولىپ, زاماناۋي تەحنيكامەن جابدىقتالعان وقۋ زالى شاكىرتتەردىڭ شەبەرلىگىن شىڭداۋعا, جازۋ ماشىعىن قالىپتاستىرۋعا ۇلكەن كومەگىن تيگىزەرى ءسوزسىز دەپ ويلايمىز.
سافۋرا بورىباەۆا,
ءال-فارابي اتىنداعى قازۇۋ
جۋرناليستيكا جانە كوممۋنيكاتسيا جونىندەگى يۋنەسكو كافەدراسى
