وتكەن ايدا كۆازيمەملەكەتتىك سەكتور سۋبەكتىلەرى 528,6 ملن دوللار كولەمىندە ۆاليۋتالىق ءتۇسىمدى ساتقان. ايتا كەتەيىك, اتالعان سەكتورداعى كومپانيالار ەكىنشى دەڭگەيلى بانكتەر ارقىلى ۆاليۋتا نارىعىندا ساتۋدى ءوز بەتىنشە جۇزەگە اسىرادى.
«ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن ۆاليۋتا ساتۋ قازان ايىندا 362 ملن دوللاردى قۇرادى. ۇلتتىق قوردان ساتۋ ۇلەسى جالپى ساۋدا-ساتتىق كولەمىنىڭ 15 پايىزىن جانە كۇنىنە 30 ملن دوللاردان اسپايتىن مولشەردە بولدى. ۇلتتىق قوردان ۆاليۋتانى ساتۋ جونىندەگى وپەراتسيالاردى جۇزەگە اسىرۋ كەزىندە ۇلتتىق بانك نارىقتىق ترەندتى قالىپتاستىرۋعا ارالاسپاۋ قاعيداتىن ۇستانىپ, «price-taker» قالپىندا قالاتىنىن اتاپ وتكەن ءجون. وسىلايشا, ۆاليۋتا نارىعىنداعى قازىرگى جاعدايلاردى ساقتاۋ ماقساتىندا ۇلتتىق بانك ۆاليۋتانى ساتۋعا ءوز وتىنىمدەرىن بەرمەگەنىمەن, نارىققا قاتىسۋشىلار بەرگەن بۇرىننان بار وتىنىمدەردى قاناعاتتاندىرادى. بۇل تاجىريبە ۇلتتىق قوردان ۆاليۋتا نارىعىنا وپەراتسيالاردىڭ تيگىزەتىن اسەرىن بارىنشا ازايتۋعا مۇمكىندىك بەرەدى», دەلىنگەن حابارلامادا.
سونداي-اق قازان ايىندا ۇلتتىق بانك ۆاليۋتالىق ينتەرۆەنتسيالار جۇرگىزبەگەن. سونىمەن بىرگە بجزق زەينەتاقى اكتيۆتەرى مەن سەنىمگەرلىك باسقارۋداعى باسقا قورلار ءۇشىن شەتەل ۆاليۋتاسىن ساتىپ الۋ نەمەسە ساتۋ بويىنشا وپەراتسيالاردى دا جۇزەگە اسىرماعان.
«قىسقا مەرزىمدى پەرسپەكتيۆادا تەڭگەنىڭ قۇبىلمالىلىعى گەوساياسي جاعدايدىڭ وزگەرۋىنە, ىشكى قاتىسۋشىلاردىڭ كۇتۋلەرىنە جانە الەمدىك نارىقتارداعى احۋالعا بايلانىستى بولادى. ۇلتتىق بانك تەڭگەرىمسىزدىكتىڭ جيناقتالۋىن بولدىرمايتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجىمىن ۇستانۋدى جالعاستىرادى», دەپ مالىمدەدى ۇلتتىق بانك وكىلدەرى.
