كورمەگە تالانتتى سۋرەتشىنىڭ كەيىنگى جىلدارى سالعان 100-دەن اسا تۋىندىسى قويىلدى. ونىڭ ىشىندە گرافيكا, كەسكىندەمە جانرىنداعى ەڭبەكتەرى مەن وزگەشە بەينەدەگى مۇسىندەرى بار. قىلقالام شەبەرىنىڭ كەز كەلگەن تۋىندىسى ۇلتتىق بوياۋعا باي. اسىرەسە كونە ءداۋىر پەن بۇگىنگى كۇندى بايلانىستىرا بەدەرلەگەن كارتينالارىنان تاريحىمىزداعى ءوز ورنى بار تۇلعالاردىڭ اسقاق رۋحى مەن ەرجۇرەك بەينەسىن كورىپ, كەۋدەڭىزدى ماقتانىش سەزىمى كەرنەيدى. سۋرەتشىنىڭ مونۋمەنتالدى جانرداعى قولتاڭباسىن دا ايرىقشا اتاپ وتكەن ءجون.
مادەني ءىس-شارا بارىسىندا اسكەري-تاريحي مۋزەي ديرەكتورى ءلاززات ءالجان قايتا جاڭعىرعان رەسپۋبليكا كۇنىمەن قاتار ءوتىپ وتىرعان كورمەنىڭ ماڭىزىن اتاپ ءوتىپ, سۋرەتشىگە جىلى لەبىزىن جەتكىزدى. ودان كەيىن كورمەگە الماتىدان ارنايى كەلگەن كورنەكتى قىلقالام شەبەرى اماندوس اقاناەۆ قازىرگى بەينەلەۋ ونەرىندە ءونىمدى ەڭبەك ەتىپ جۇرگەن سۋرەتكەردىڭ شىعارماشىلىعىنا جوعارى باعا بەرىپ, وعان قازاقستان كوركەم ونەر اكادەمياسىنىڭ التىن مەدالىن تابىس ەتتى. سونداي-اق ونەرتانۋشى ليديا دروزدوۆا كورمە يەسىنىڭ ەڭبەكتەرىندەگى ەرەكشەلىكتەرىنە توقتالىپ, قىلقالام شەبەرىنە فرانتسياداعى حالىقارالىق مونديال ارت اكادەمياسىنىڭ سەرتيفيكاتىن تاپسىردى.
«مەن امانات نازارقۇلدىڭ شىعارماشىلىعىمەن بۇرىننان تانىسپىن. ول ي.ۆ.سۋريكوۆ اتىنداعى ماسكەۋ كوركەم سۋرەت ينستيتۋتىن بىتىرگەن. قاسىبي قىلقالام شەبەرى. اسىرەسە سۋرەتشىنىڭ «سكيفتەر – كەنتاۆرلار», «بابالار رۋحى», ء«ۇش گراتسيا», «توميريس», «تۇنگى جولاۋشى», «قورقىتتىڭ ءۇش بۇلاعى» اتتى تۋىندىلارىن ۇلتتىق بەينەلەۋ ونەرىنىڭ قازىناسىنا اينالدى دەپ ايتا الامىن. بۇگىنگى كورمەگە ۇسىنىپ وتىرعان جۇمىستارى دا ەرەكشە, تابيعيلىعىمەن باۋراپ الادى», دەدى پارلامەنت سەناتىنىڭ دەپۋتاتى ابدالى نۇراليەۆ.
كورمە سوڭىندا سۋرەتشى امانات نازارقۇل شىعارماشىلىعى تۋرالى قىسقاشا ءسوز قوزعاپ, كەلگەن قاۋىمعا ريزاشىلىعىن ءبىلدىردى.
