اپات كەزىندە جەر استىندا 106 ادام بولعان. ولاردىڭ 101-ءى دەرەۋ ەۆاكۋاتسيالاندى. وقيعا ورنىنان شىعا الماعان بەس ادام قازا تاۋىپ, تاعى تورتەۋى زارداپ شەكتى.
قازا تاپقان كەنشىلەردىڭ ءتىزىمى:
1.بويچەنكو دميتري يگورەۆيچ, 1991 جىلى تۋعان, جەراستى بۇرعىلاۋ قوندىرعىسىنىڭ ءماشينيسى. جۇمىس ءوتىلى - 8 جىل. اناسى قالدى.
2. سانجاروۆ اندرەي پاۆلوۆيچ, 1980 جىلى تۋعان, جەراستى بۇرعىلاۋ قوندىرعىسىنىڭ ءماشينيسى. جۇمىس ءوتىلى - 21 جىل. اتا-اناسى مەن ەكى بالاسى قالدى.
3. ينكين دەنيس اناتولەۆيچ, 1984 جىلى تۋعان, جەراستى بۇرعىلاۋ قوندىرعىسىنىڭ ءماشينيسى. جۇمىس ءوتىلى - 13 جىل. اكەسى, جۇبايى, قىزى جانە اسىراۋىنداعى تاعى ءبىر ادام قالدى.
4. قاشكەي ارمان قادىرجان ۇلى, 1993 جىلى تۋعان, جەراستى بۇرعىلاۋ قوندىرعىسىنىڭ ءماشينيسى. جۇمىس ءوتىلى - 8 جىل. اتا-اناسى قالدى.
5. ەلتىبەكوۆ مارعۇلان سەرىك ۇلى, 1996 جىلى تۋعان, بۇرعىلاۋ قوندىرعىسى ءماشينيسىنىڭ كومەكشىسى. جۇمىس ءوتىلى - ەكى اي. اكەسى قالدى.
ەسكە سالا كەتسەك, بۇگىن تۇنگى ساعات 03:03-تە لەنين اتىنداعى شاحتادا گازدى درەناجدى ۇڭعىمالاردى بۇرعىلاۋ كەزىندە كەنەتتەن مەتان شىعارىلدى.
پوليتسيا «تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ» بابى بويىنشا تەرگەۋدى باستادى.
«ارسەلورميتتال تەمىرتاۋ» اق كومىر دەپارتامەنتىنىڭ ديرەكتورى ارمان قالىقوۆ قازا تاپقاندار مەن زارداپ شەككەندەردىڭ وتباسىلارىنا كومەك كورسەتىلەتىنىن حابارلادى.
قازاقستان پرەزيدەنتى قاسىم-جومارت توقاەۆ شاحتاداعى اپات سالدارىنان قازا تاپقان قىزمەتكەرلەردىڭ تۋىستارى مەن جاقىندارىنا كوڭىل ايتۋ جەدەلحاتىن جولدادى.
شاحتاداعى وقيعاعا بايلانىستى توتەنشە جاعدايلار ءمينيسترى يۋري يلين اپات ورنىنا بارىپ, ارنايى كوميسسيا جۇمىسىن باستادى.
