الدىمەن قوناقتار مەكتەپ مۇراجايىنداعى تۇركى الەمىنىڭ ايتۋلى تۇلعاسىنىڭ ساياسي كوزقاراسىنىڭ قالىپتاسۋىنا اسەر ەتكەن تاريحي وقيعالار مەن شەتەلدە ەميگراتسيادا جۇرگەن كەزەڭدەگى قوعامدىق قىزمەتى تۋرالى بايانداعان دەرەكتەرمەن تانىستى. ودان سوڭ قايراتكەردىڭ ءومىرى مەن ساياسي جولى جانە تۇركىستان, تۇركيا, فرانتسيا ەلدەرىندەگى تاعدىرى مەن سوندا كورگەن قيىندىقتارى تۋرالى جازعان تۋىندىسىنان ءۇزىندى تاماشالادى.
ءىس-شارا دوڭگەلەك ۇستەل ءماجىلىسى فورماتىندا وتكەندىكتەن مەكتەپ وقۋشىلارى قوناقتارمەن ەركىن اڭگىمەلەسىپ, ولارعا ۇلت كۇرەسكەرىنىڭ ءومىرى مەن ساياسي قىزمەتى تۋرالى سۇراقتارىن قويىپ, تۇشىمدى جاۋاپ الدى.
– مۇستافا شوقاي تۇركى دۇنيەسىنىڭ ۇلى تۇلعاسى سانالادى. ونىڭ دالەلى رەتىندە, بيىل تۇركيانىڭ مادەنيەت مينيسترلىگى «تۇركيانىڭ 100 ۇلى تۇلعاسى» ارنايى سەرياسىن باستادى. وسى سەريانىڭ العاشقى تومدىعىنا مۇستافا شوقاي ەنىپ وتىر. سونىمەن قاتار فرانتسيادا قايراتكەرگە ەسكەرتكىش قويىلىپ, ساياباق اشىلدى. سوندىقتان ءبىز وسىنداي ۇلى تۇلعالارىمىزدى ۇلىقتاي بىلسەك, ونىڭ ەلىمىز ءۇشىن دە, ۇرپاعىمىز ءۇشىن رۋحاني پايداسى زور بولادى, – دەدى شوقايتانۋشى عالىم ابدۋاقاپ قارا.
سونداي-اق نۇرتورە ءجۇسىپ, قازىبەك يسا, ابدىجالەل باكىر جانە تاعى باسقا دا زيالى قاۋىم وكىلدەرى ارداقتى ازاماتتىڭ قايراتكەرلىگى مەن كۇرەسكەرلىگى تۋرالى پاراساتتى وي قوزعادى. سودان كەيىن تاعىلىمدى شارا مەكتەپ ۇجىمى دايىنداعان ادەبي-سازدى كەشكە ۇلاسىپ, وندا وقۋشىلار كورنەكتى تۇلعا ومىرىنەن شاعىن كورىنىس قويىپ, ونىڭ جارى ماريا شوقايدىڭ مونولوگىن وقىدى. كەش سوڭىندا اتالعان ءبىلىم ورداسىنا مۇستافا شوقاي ەسىمىنىڭ بەرىلۋىنە بايلانىستى شىعارعان مەكتەپتىڭ جاڭا ءانۇرانى ورىندالدى.
