كىتاپ تۇساۋكەسەرىنە ساپار بايجانوۆتىڭ جارى كۇلاش بەيسەنبەكقىزى, پارلامەنت ءماجىلىسىنىڭ دەپۋتاتى ساۋىتبەك ءابدىراحمانوۆ, ەۇۋ جۋرناليستيكا جانە ساياساتتانۋ فاكۋلتەتىنىڭ دەكانى ساق قايرات ءومىرباي ۇلى مەن ۇجىم وكىلدەرى, قارىمدى جۋرناليست سايراش ابىشقىزى قاتىستى. جيىن بارىسىندا ساپار بايجانوۆقا قاتىستى جىلى ەستەلىكتەر ايتىلىپ, جۋرناليستيكاعا قوسقان ەڭبەگى مەن ومىرلىك ونەگەسى ءسوز بولدى.
«الىپتاردىڭ ءىزىن باسىپ, قازاق جۋرناليستيكاسىنا ۇلكەن قولتاڭبا قالدىرعان, وزىندىك دارا جول سالعان, تىلشىلىكتەن باستاپ جۋرناليستيكانىڭ ساتىلارىنان ورلەپ, باس رەداكتور دەڭگەيىنە كوتەرىلگەن ساپار بايجانوۆ اعامىزدىڭ شىعارماشىلىعىنا ارنالعان كىتاپتىڭ تۇساۋكەسەر راسىمىنە جينالىپ وتىرمىز. بۇل كىتاپ ەندىگى جەردە جاس جۋرناليستەردى دايىنداۋعا قىزمەت ەتەتىن بولادى. اعامىزدىڭ باي تاجىريبەسىن, ومىرلىك, شىعارماشىلىق ۇلكەن ونەگەسىن ۇيرەنىپ, كەلەسى بۋىنعا اماناتتاۋ وسى وتىرعان ءبارىمىزدىڭ مىندەتىمىز», دەدى فاكۋلتەت دەكانى ساق قايرات ءومىرباي ۇلى.
بۇدان سوڭ, ساق قايرات, كۇلاش بەيسەنبەكقىزى, ساۋىتبەك ءابدىراحمانوۆ سالتاناتتى تۇردە كىتاپتىڭ لەنتاسىن قيدى. الماتىدان ارنايى كەلگەن كۇلاش بەيسەنبەكقىزى كىتاپ اۆتورى عاليا اقسەيىتكە ءوز ءىلتيپاتىن ءبىلدىردى.
«مەن عالياعا وتە ريزامىن. ساپار بايجانوۆتى 10 جىل زەرتتەپ, ديسسەرتاتسياسىن جاقسى قورعاپ شىقتى. ەندى مىنە, سول ەڭبەكتىڭ ارقاسىندا مونوگرافياسى جارىق كورىپ وتىر. ساپار بايجانوۆتىڭ جازىپ كەتكەن 22 ۇلكەندى-كىشىلى كىتابىمەن جاقىن تانىسۋ عالياعا وڭاي سوقپاعانى انىق», دەدى كۇلاش بەيسەنبەكقىزى.
سونىمەن قاتار تالانتتى ستۋدەنتتەر ءان ايتىپ, كۇي شەرتتى.
ايتا كەتەيىك, جازۋشى ساپار بايجانوۆ «حالىقتار دوستىعى», «قۇرمەت بەلگىسى» وردەندەرىنىڭ يەگەرى. 1973-1983 جىلدار ارالىعىندا قازىرگى «ەگەمەن قازاقستان» گازەتىنىڭ رەداكتورى بولعان.
سالتانات كەنجەباي,
ەۇۋ 3- كۋرس ستۋدەنتى
