قازان ايىنىڭ باسىندا بولعان بۇل وقيعانىڭ زەرتتەلمەگەن تۇستارى كوپ.
پاتريوت جانە ادىلدىك ءۇشىن كۇرەسۋشى. ەربول مۇسابالانوۆتى تۋعان-تۋىستارى مەن دوستارى ءدال وسىلاي ەسكە الادى. ءومىرىنىڭ 23 جىلىن اسكەري قىزمەتكە ارناعان ازامات ءوزىنىڭ شىنشىلدىعىنان باسشىلىققا ۇناماي قالعان دەيدى تۋىستارى. بۇل تۋرالى قوشتاسۋ حاتىندا دا ايتىلعان.
«مەنىڭ ولىمىمە قاباقوۆتى, ءىلياسوۆتى – تىكەلەي ونىڭ كومانديرى – ەكىنشى دارەجەلى ستارشينا ءماجيتوۆتى كىنالاۋىڭىزدى سۇرايمىن», دەپ جازعان مارقۇم.
باسشىلىق تاراپىنان بولعان قىسىم تۋرالى ەربول جاقىندارىنا بىرنەشە رەت ايتقان. جەتىگەن اسكەري قۇرىلىمىندا جۇمىس ىستەگىسى كەلمەگەندىكتەن, ءۇش اي بويى الماتىداعى باسقا بولىمگە اۋىسپاق بولىپتى. قۇجاتتارىن جيناعانىمەن, باسشىلارى قول قويماعان.
ء«بىز بورالدايداعى كادر بولىمىنە قوڭىراۋ شالدىق. ول «ماعان ەشتەڭە بايلانىستى ەمەس, باسشى قالاي دەيدى, سولاي بولادى» دەدى. قۇجاتتارىن دا وتكىزبەي قويعان. كەيىن وزىنەن سۇراماي, سىرتىنان سەرەبريانسككە اۋىسۋ تۋرالى بۇيرىق شىعارعان», دەدى اعاسى ءۋاليحان.
سەرجانت قايتىس بولعان كۇنى, 6 قازاندا ونى اۋدارۋ تۋرالى بۇيرىق شىعادى. جاقىندارىنىڭ ايتۋىنشا, بۇل سۋيتسيدكە سەبەپ بولعان.
ودان بولەك, بىرنەشە كۇن بۇرىن ەربول مۇسابالانوۆ ۇيىندە اسكەري بولىمدەگى جەمقورلىق تۋرالى اقپارات ساقتالعان قاتتى ديسك بارىن تۋىستارىنا ايتقان. بۇل تۋرالى الدىن الا ءۇشىنشى تاراپ تا بىلگەن بولۋى كەرەك, 11 قازان جاقىندارى تەرگەۋشىمەن بارعاندا مۇسابالانوۆتىڭ ۇيىنە بوگدە ادامدار كىرىپ تىنتىگەنىن اڭعارعان. قاتقىل ديسك سول كۇيى تابىلمادى.
قازىرگى تاڭدا ەكىنشى ساناتتاعى سەرجانت ەربول مۇسابالانوۆتىڭ ولىمىنە قاتىستى قك 201-بابى ء«وزىن ءوزى ولتىرۋگە دەيىن جەتكىزۋ» بويىنشا ءىس قوزعالعان.
