كۋرستىڭ نەگىزگى مىندەتى – اپاتقا ۇشىراعان اۋە كەمەسىنىڭ ەكيپاجىنا كومەك كورسەتۋدەگى جەكە قۇرامنىڭ داعدىلارى مەن ماشىعىن جەتىلدىرۋ. ودان بولەك زارداپ شەككەندەرگە العاشقى مەديتسينالىق كومەك كورسەتۋ جانە ولاردى ەۆاكۋاتسيالاۋ ماسەلەلەرى دە پىسىقتالدى. ەكيپاج مۇشەلەرى جارالىلاردىڭ جاراسىن تازارتىپ تاڭۋ, تاسىمالداۋ داعدىلارىن جەتىلدىردى. امان قالۋدى وقىتۋدىڭ ماڭىزدى باعىتى – اۋە كەمەسىنىڭ ورنالاسقان جەرىن انىقتاۋ كەزىندە توپوگرافيالىق باعدارلاۋ نەگىزدەرىن قايتالاۋ, اسكەري قىزمەتشىلەردىڭ اۆياتسيالىق اپاتتىق ىزدەستىرۋدە باسشىلىقپەن بايلانىس ءۇشىن ۋلترا قىسقا تولقىندى راديوستانسانى پايدالانۋ.
– بۇل داعدىلاردىڭ ءبارىن تەك ۇشۋ قۇرامى عانا ەمەس, ەكيپاجدىڭ ءاربىر مۇشەسى مەڭگەرۋى قاجەت. ساباق بارىسىندا جەكە قۇرام توپتارعا ءبولىندى. امان قالۋ بويىنشا جاتتىعۋلار جارىس رەجىمىندە وتكىزىلدى. ويتكەنى ءدال وسى ءادىس شتاتتان تىس جاعداي تۋىنداعان كەزدە پراكتيكالىق داعدىلاردى قولدانۋدا جاقسى ناتيجە بەرەدى, – دەپ ءتۇسىندىردى ەلوردالىق اۆياتسيالىق بازا كومانديرىنىڭ ۇشۋ قاۋىپسىزدىگى جونىندەگى ورىنباسارى, پودپولكوۆنيك تالعات تۇرعامباەۆ.
امان قالۋ – اۆياتسيالىق بولىمشەلەردىڭ جەكە قۇرامىن دايىنداۋداعى ماڭىزدى ەلەمەنتتەردىڭ ءبىرى. مۇنداي كەشەندى جاتتىعۋلار جۇيەلى تۇردە جۇرگىزىلىپ, اسكەري قىزمەتشىلەردى ءارتۇرلى مەتەوجاعدايلارداعى ىقتيمال داعدارىستىق جاعدايلارعا دايىنداۋعا كومەكتەسەدى.
