جارمەڭكەگە وبلىس اكىمىنىڭ ءبىرىنشى ورىنباسارى مارات تاسماعانبەتوۆ, قالا باسشىسى رۋسلان اڭباەۆ بارىپ, ساۋدا-ساتتىقتىڭ بارىسىن كورىپ, ازىق-ت ۇلىك باعالارىمەن تانىستى.
قاز-قاتار تىگىلگەن شاتىرلاردىڭ سورەسىندە ەت-ءسۇت ونىمدەرىنەن باسقا جەمىس-كوكونىس, بال سياقتى ونىمدەر دە بار. ءتىپتى ءتۇرلى جەمىستەردىڭ تۇقىمدارى دا ساتىلدى. قىزىلجارلىقتار دا بۇل كۇنى ارزانداۋ ازىق-ت ۇلىك تاۋارلارىن الۋعا تايلى-تاياعىمەن اسىعىپ جەتتى.
جارمەڭكە جايلى اقپارات بەرگەن وبلىستىق اۋىل شارۋاشىلىعى باسقارماسىنىڭ باستىعى مەيرام مەڭدىباەۆ ونىمدەردىڭ قالا بازارلارىنان كەم دەگەندە 15-20 پايىزعا ارزان ەكەنىن ايتتى. «ويتكەنى بۇل جەردە دەلدالدار جوق, وندىرۋشىلەر تۇتىنۋشىلارمەن تىكەلەي بايلانىسىپ تۇر. سوندىقتان ەكى جاق تا رازى», دەدى ول.
شىنىندا دا, ونىمدەر قالا دۇكەندەرى مەن بازارلارعا قاراعاندا اجەپتاۋىر ارزان. «جۇمىرتقانىڭ باعاسى دۇكەندەردە شارىقتاپ كەتتى, 10 داناسى 500 تەڭگەدەن جوعارى, كەيبىر دۇكەندەردە ودان دا قىمبات. ال مۇندا 350 تەڭگەگە دە الۋعا بولادى ەكەن», دەيدى قالا تۇرعىنى سالتانات جاقىپوۆا. ەت پەن ءسۇت ونىمدەرىنە دە قاتىستى سونداي پىكىرلەردى بايقاپ قالدىق. بازارداعى باعا 3 مىڭنان كەم بولماسا, مۇندا سەمىز جىلقى ەتىن 2 700, سيىر ەتىن 1 800, قوي ەتىن 2 200 تەڭگەگە ساتىپ الۋعا بولادى. ۇن, قاراقۇمىق جارماسى سياقتىلاردىڭ باعاسى دا بازارعا قاراعاندا الدەقايدا ارزان.
اۋىلدىقتار تاماق ونىمدەرىن عانا ەمەس, مال ازىعىن دا اكەلىپتى. جەكەمەنشىك قوراسىندا شاعىن مال ۇستايتىن قالالىقتار مەن قالا ماڭىنداعى ۇلكەن ەلدى مەكەن تۇرعىندارى ءۇشىن بۇل ۇلكەن ولجا بولدى. سالماعى 3 تسەنتردەي بولاتىن ءشوپ وراماسىن 5 مىڭ, سابان وراماسىن 2 مىڭ تەڭگەگە الىپ جاتقان تۇرعىنداردى دا كوردىك. «مال ازىعى ءۇشىن جەتكىزىلگەن 60 ورام ءشوپ پەن 40 ورام ساباندى پىشاق ءۇستى ساتىپ الىپ كەتتى», دەيدى مامليۋت اۋداندىق اۋىل شارۋاشىلىعى ءبولىمىنىڭ باسشىسى مۇرات قوجاەۆ.
وسىنداي جارمەڭكەلەر الداعى ۋاقىتتا دا قالادا سەنبى سايىن ۇيىمداستىرىلىپ تۇرادى. ولار جەرگىلىكتى وكىمەتكە قارايتىن «شاپاعات», «داريا», «التىن ارمان» بازارلارىندا وتەدى.
پەتروپاۆل
