كوميتەت توراعاسى مۇحتار قۇل-مۇحاممەد دوڭگەلەك ۇستەلدە قازاقستان ارمياسىندا اسكەري قىزمەتشىلەردىڭ قازا بولۋىنىڭ جيىلەپ كەتكەنىنە مەملەكەت باسشىسى نازار اۋدارىپ وتىرعانىن اتاپ ءوتتى.
سەناتور قالىپتاسقان جاعدايعا باقىلاۋ جاساۋدى كۇشەيتۋ جانە اسكەري قىزمەتشىلەردىڭ قوردالانعان كۇردەلى ماسەلەلەرىن شەشۋدە بىرلەسكەن كۇش-جىگەرگە قارقىن بەرۋدىڭ ماڭىزدىلىعىن اتاپ ءوتتى.
«بۇل وقيعالاردىڭ سەبەپتەرىن انىقتاپ الىپ, اسكەردەگى اسكەري قىزمەتشىلەردىڭ زاڭسىز ارەكەتتەرىن جويۋ كەرەك. الداعى ۋاقىتتا مۇنداي كەلەڭسىز كورىنىستەردىڭ الدىن الۋ ءۇشىن زاڭنامالىق دەڭگەيدە شارالار قابىلداۋ قاجەت», دەدى مۇحتار قۇل-مۇحاممەد.
سەناتور سەرگەي ەرشوۆ وتىرىس بارىسىندا تاعى ءبىر ماسەلەنى قوزعادى. دەپۋتاتتىڭ ايتۋىنشا, قازىر كەلىسىمشارت بويىنشا قىزمەت ەتەتىن اسكەري قىزمەتشىلەردىڭ ەلىمىزدىڭ قارۋلى كۇشتەرىنەن جاپپاي كەتۋى تىركەلۋدە. كەلىسىمشارت بويىنشا قىزمەت ەتەتىن اسكەري قىزمەتشىلەر قارۋلى كۇشتەردىڭ جالپى سانىنىڭ 70 پايىزىن قۇرايدى. سەناتور ءتيىستى الەۋمەتتىك قولداۋدىڭ جوقتىعى مەن جالاقىنىڭ تومەندىگى وسىنداي جاعدايدىڭ ورىن الۋىنا سەبەپ دەپ ەسەپتەيدى.
«الەمدەگى تۇراقسىز گەوساياسي جاعداي مەن كادر الەۋەتىنىڭ ۇلعايۋى قاۋپىن ەسكەرە وتىرىپ, اسكەري قىزمەتشىلەردىڭ الەۋمەتتىك قامسىزداندىرۋ دەڭگەيىن ارتتىرۋ كەرەك دەپ سانايمىن. مەملەكەت باسشىسى 2019 جىلعى 1 قىركۇيەكتە پارلامەنت پالاتالارىنىڭ بىرلەسكەن وتىرىسىندا سويلەگەن سوزىندە اسكەري قىزمەتتىڭ بەدەلىن ارتتىرۋدى, قارۋلى كۇشتەردى ماتەريالدىق تۇردە جاراقتاندىرۋ جانە وتانىنا ادال, كاسىبي دايىندىقتان وتكەن وفيتسەرلەر مەن اسكەري قىزمەتشىلەر قۇرامىمەن قامتاماسىز ەتۋ قاجەتتىگىن اتاپ ءوتتى», دەدى سەناتور ەرشوۆ.
ەلىمىزدىڭ باس اسكەري پروكۋرورى داستان سەكەنوۆ, قورعانىس ءمينيسترىنىڭ ورىنباسارى سۇلتان كامالەتدينوۆ, دەنساۋلىق ساقتاۋ ءمينيسترىنىڭ ورىنباسارى بەيبىت ەسەنباەۆ جانە تاعى باسقا ءسوز العاندار دا قارۋلى كۇشتەر سالاسىنداعى جاعدايدى جاقسارتۋ جونىندە ۇسىنىس ايتتى.
