وقۋ-اعارتۋ ءمينيسترى اسحات ايماعامبەتوۆ تۇجىرىمدامادا كورسەتىلگەن ءىس-شارالار جايلى باياندادى. اتاپ ايتقاندا, مەكتەپكە دەيىنگى تاربيەنىڭ «ويىن ارقىلى وقىتۋ» جاڭا مودەلىن ەنگىزۋ, بالاباقشالار مەن ورتالىقتار اشۋ, تاربيەشىلەردى قايتا دايارلاۋ جانە ولاردىڭ بىلىكتىلىگىن ارتتىرۋ بويىنشا جۇمىس جالعاسادى.
جەكەلەگەن پاندەر بويىنشا مەكتەپ باعدارلامالارى جەتىلدىرىلەدى. بۇل رەتتە مەكتەپتەرگە كەزەڭ-كەزەڭمەن اكادەميالىق اۆتونوميا بەرىلەتىن بولادى. سونداي-اق حالىقارالىق دەڭگەيدەگى مەكتەپتەردە قورىتىندى باعالاۋ ناتيجەلەرىن تانۋ بويىنشا جۇمىستار جۇرگىزۋ جوسپارلانۋدا. وقۋ پروتسەسىن تسيفرلاندىرۋ شەڭبەرىندە بىرقاتار جوبا ىسكە اسىرىلادى: «تسيفرلىق مۇعالىم», شاعىن كومپلەكتىلى مەكتەپتەردە جەكەلەگەن پاندەردى ونلاين وقىتۋ جانە دەربەس تسيفرلىق وقۋلىقتار ء(موبيلدى قوسىمشا).
بۇدان باسقا, ءبىلىم بەرۋدەگى قىزمەتتەردى تسيفرلاندىرۋ, وقۋشى ورىندارىنىڭ جەتىسپەۋشىلىگىن جويۋ, ەرەكشە ءبىلىم بەرۋ قاجەتتىلىكتەرى بار بالالاردى قولداۋ, جاڭا فاكۋلتاتيۆتىك پاندەردى ەنگىزۋ جانە مەكتەپتەردە قوسىمشا سەكتسيالار اشۋ, تەحنيكالىق جانە كاسىپتىك ءبىلىم بەرۋدى دامىتۋ جانە ت. ب. جۇمىستار جالعاسادى.
بۇل رەتتە عىلىم جانە جوعارى ءبىلىم ءمينيسترى ساياسات نۇربەك پەن تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين دە بايانداما جاسادى.
بايانداماشىلاردى تىڭداعان پرەمەر-مينيستر ۇسىنىلىپ وتىرعان تۇجىرىمداما بالاباقشادان باستاپ ۋنيۆەرسيتەتكە دەيىنگى وقىتۋدىڭ بارلىق دەڭگەيىندە ساپالى ءبىلىم الۋعا قولجەتىمدىلىكتى قامتاماسىز ەتۋگە باعىتتالعانىن اتاپ ءوتتى.
«قۇجاتتا بارىنشا بيىك ماقساتتاردى كوزدەيتىن نىسانالى ينديكاتورلار ايقىندالعان. 2026 جىلعا قاراي مەكتەپكە دەيىنگى ءبىلىم بەرۋ ۇيىمدارىنىڭ بارلىعى تاربيە جانە وقىتۋ ساپاسىن باعالاۋدىڭ حالىقارالىق قۇرالدارىن ەنگىزەتىن بولادى. اتا-انالار ءبىلىم بەرۋ جۇيەسىندەگى «جان باسىنا قارجىلاندىرۋ» ءپرينتسيپى بويىنشا كەز كەلگەن بالا-باقشادان ورىن تاڭداي الادى. سونىمەن قاتار قۇجاتتا بالالاردىڭ اماندىعى مەن ءال-اۋقاتى يندەكسىن جانە ينتەراكتيۆتى كارتاسىن ىسكە اسىرۋ شارالارى كوزدەلگەن», دەدى ءاليحان سمايىلوۆ.
ول مەملەكەت باسشىسىنىڭ تاپسىرماسىنا سايكەس مەكتەپتەردە جايلى جانە قاۋىپسىز ورتا قۇرۋ ماقساتىندا «جايلى مەكتەپ» ۇلتتىق جوباسى ازىرلەنىپ جاتقانىن ەسكە سالدى. شاعىن كومپلەكتىلى مەكتەپتەردە ءبىلىم بەرۋ ساپاسىن جاقسارتۋ ءۇشىن ء«موبيلدى مۇعالىم», «وقۋ ۇلگەرىمى تومەن مەكتەپتەرگە مىقتى مەكتەپتەردىڭ قامقورلىعى», «قامقور جانۇيا» جوبالارى ەنگىزىلۋدە.
سونىمەن قاتار 2025 جىلعا قاراي جاڭا قۇرىلىس ستاندارتتارى بويىنشا جالپى سانى 840 مىڭ ورىنعا ارنالعان مەكتەپتەر سالۋ جوسپارلانعان.
«تۇجىرىمدامانىڭ بارلىق جوسپارلارى, سايىپ كەلگەندە, بالالاردىڭ ساپالى جانە جان-جاقتى دامۋىن قامتاماسىز ەتۋى كەرەك. سوندىقتان بالالاردىڭ بويىنداعى ءبىلىم ناتيجەسىن باعالاۋدىڭ بارلىق دەڭگەيدە مويىندالعان ادىستەمەلەرىن ەنگىزۋگە ەرەكشە نازار اۋدارۋ قاجەت», دەدى پرەمەر-مينيستر.
ونىڭ ايتۋىنشا, جاستاردى كاسىپكەرلىك داعدىلارىنا وقىتۋ ءۇشىن كوللەدجدەر, ونىڭ ىشىندە اۋىلدىق كوللەدجدەر جانىنان شاعىن يننوۆاتسيالىق كاسىپورىندار قۇرىلادى. بۇل كوللەدج تۇلەكتەرىنىڭ 75%-ىن وقۋ بىتىرگەننەن كەيىن بىردەن جۇمىسقا ورنالاستىرۋعا مۇمكىندىك بەرەدى. سونداي-اق جەتەكشى جوعارى وقۋ ورىندارىن زەرتتەۋ ۋنيۆەرسيتەتتەرىنە ترانسفورماتسيالاۋ جۇرۋدە, سونداي-اق بەدەلدى شەتەلدىك ۋنيۆەرسيتەتتەر فيليالدارىنىڭ سانى دا ارتادى.
2026 جىلعا قاراي باكالاۆرلار ستيپەندياسىنىڭ مولشەرى 2 ەسەگە, ماگيسترانتتار مەن دوكتورانتتاردىڭ ستيپەندياسى 1,5 ەسەگە ارتادى.
ءاليحان سمايىلوۆ جوسپارلانعان ءىس-شارالاردى ىسكە اسىرۋ ءبىلىم بەرۋ ساپاسىن جاقسارتۋعا جانە قازاقستاننىڭ حالىقارالىق ءبىلىم بەرۋ رەيتينگتەرىندەگى كورسەتكىشتەرىن ارتتىرۋعا مۇمكىندىك بەرەتىنىن ايتتى.
ۇسىنىلعان تۇجىرىمداما داۋىس بەرۋ ارقىلى بەكىتىلگەننەن كەيىن پرەمەر-مينيستر وقۋ-اعارتۋ, عىلىم جانە جوعارى ءبىلىم مينيسترلىكتەرىنە مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ, ونىڭ ءىس-شارالارىن ۋاقىتىلى ورىنداۋدى قامتاماسىز ەتۋدى, سونىمەن قاتار تۇجىرىمدامانى ء«بىلىمدى ۇلت» ۇلتتىق جوباسىمەن, «جايلى مەكتەپ» جوباسىمەن ۇيلەستىرۋ جونىندە شارالار قابىلداۋدى تاپسىردى.
تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى ءبىلىم بەرۋ ۇيىمدارىن ساپالى ينتەرنەتپەن قامتاماسىز ەتۋ جونىندە شارالار قابىلداۋى قاجەت.
