«جول اكتيۆتەرىنىڭ ۇلتتىق ساپا ورتالىعى» رمك اتىراۋ وبلىستىق فيليالىنىڭ ساپا جانە مەملەكەتتىك ەسەپ ءبولىمىنىڭ باسشىسى نۇرلان ءجانتۋريننىڭ مالىمەتىنشە, جىل سايىن اسفالت توسەلگەن جولدىڭ جايىنا تەكسەرۋ جۇرگىزىلىپ كەلەدى. بيىلعى جىل باسىنان بەرى 74 جولعا 848 رەت تەكسەرۋ جۇرگىزىلىپتى.
– ءبىزدىڭ فيليالدىڭ ينجەنەرلەرى جولداردى تەكسەرۋ كەزىندە 302 اقاۋدى انىقتادى. ونىڭ ىشىندە 65 ورەسكەل اقاۋ بار. جول قۇرىلىسىن جۇرگىزەتىن مەكەمەلەر پايدالانىپ وتىرعان ماتەريالداردان 1 470 سىناما الىنىپ, فيليال زەرتحاناسىندا تەكسەرىلدى. ناتيجەسىندە, 218 سىنامانىڭ جول ساپاسى جونىندەگى ستاندارتقا ساي ەمەستىگى بەلگىلى بولدى. ورەسكەل اقاۋدىڭ ءبىرى قايتا جاڭعىرتۋ جۇمىستارى ءجۇرىپ جاتقان «اقتوبە – اتىراۋ – رف شەكاراسى» رەسپۋبليكالىق جولىندا انىقتالىپ وتىر, – دەيدى نۇرلان جانتۋرين.
ونىڭ ايتۋىنا قاراعاندا, ورەسكەل كەمشىلىك اتىراۋ قالاسىنداعى بالىقشى شاعىن اۋدانىنان زاروسلىي ەلدى مەكەنىنە دەيىنگى ارالىقتا قايتا جاڭعىرتىلىپ جاتقان 5,7 شاقىرىم جول بويىندا انىقتالىپتى. اتالعان جولدا اسفالتبەتون جابىندىسىنىڭ تومەنگى قاباتى بۇزىلىپ, شوگىپ كەتكەنى بايقالعان. ءتىپتى اسفالتبەتون جابىندىسىنىڭ تومەنگى قاباتى بىركەلكى بىرىكپەگەن. انىقتالعان كەمشىلىكتەردىڭ باسىم بولىگىندە نورماتيۆتىك-تەحنيكالىق قۇجاتتار دا, ءتىپتى قۇرىلىس نىساندارىندا تەحنيكالىق قاداعالاۋشى دا بولماعان. يساتاي اۋدانىنىڭ ورتالىعى – اققىستاۋداعى 16,3 شاقىرىم, ح.ەرعاليەۆ اۋىلىندا كۇردەلى جوندەۋ ءجۇرىپ جاتقان 8,6 شاقىرىم جول مەن جاياۋ جۇرگىنشىلەر جولى, قۇرمانعازى اۋدانىنداعى «7 رازەزد – اسان – ازعىر – بالقۇدىق – سۇيىندىك» جولىنىڭ 0-36 شاقىرىمداعى ارالىعى, قىزىلقوعا اۋدانىنىڭ ساعىز اۋىلىنداعى 6,8 شاقىرىمدىق جول قۇرىلىسى تەحنيكالىق قاداعالاۋشىنىڭ باقىلاۋىنسىز جۇرگىزىلگەن. اققىستاۋداعى 16,3, ماحامبەت اۋدانىنىڭ سارىتوعاي اۋىلىنداعى 10,9 شاقىرىم جول قۇرىلىسى نورماتيۆتىك-تەحنيكالىق قۇجاتسىز سالىنعان.
ال اتىراۋ قالاسىنان رەسەي فەدەراتسياسىنىڭ شەكاراسىنا دەيىن قاتىنايتىن جولدىڭ قۇرىلىسى 185 رەت تەكسەرىلىپ, 61 اقاۋ انىقتالعان. الايدا جول قۇرىلىسىنداعى 17 اقاۋ ءالى جويىلار ەمەس.
– مەملەكەت باسشىسىنىڭ ءوزى رەسەيگە قاتىنايتىن جولدىڭ قۇرىلىسىنا نازار اۋدارىپ وتىر. سول سەبەپتەن, جول ساپالى سالىنۋى كەرەك. جوباعا سايكەس ۇزىندىعى 2 شاقىرىم جول نەگىزىنىڭ جوعارى قاباتىنا 5-40 فراكتسيالى قارا قيىرشىقتاس توسەلۋگە ءتيىس. بىراق بۇل جەرگە 0-40 فراكتسيالى قارا قيىرشىقتاس توسەلگەن. ءبىزدىڭ ماماندار كەرن الۋ كەزىندە جول جابىندىسىنىڭ تومەنگى قاباتىنا توسەلگەن اسفالتبەتوننىڭ قالىڭدىعى تالاپقا سايكەس كەلمەيتىنى, اسفالتبەتون توسەۋدە جىكتەرىنىڭ تەگىستىگى ساقتالماعانى انىقتالدى, – دەپ ءمالىم ەتتى ن.جانتۋرين.
اتالعان جول قۇرىلىسىنا پايدالانىلىپ جاتقان ماتەريالداردان الىنعان 523 سىناماعا ساراپتامانىڭ ناتيجەسى دە كوڭىل قۋانتارلىقتاي ەمەس. ساراپتاما قورىتىندىسىمەن 74 سىنامانىڭ نورماتيۆتىك تالاپقا ساي ەمەستىگى بەلگىلى بولعان. ناقتىلاي ايتقاندا, قارا قيىرشىقتاستىڭ, قيىرشىقتاستىڭ تۇيىرشىك قۇرامى, كەرن كەسكىندەرىنىڭ تىعىزدىعى, سۋعا قانىعۋ كوەففيتسيەنتى نورما تالابىنا قايشى بولىپ وتىر.
«جول اكتيۆتەرىنىڭ ۇلتتىق ساپا ورتالىعى» رمك اتىراۋ وبلىستىق فيليالىنىڭ ينجەنەرى مەيىرحان بەكەسوۆتىڭ ۋاجىنە سۇيەنسەك, جول ساپاسىنىڭ ناشارلاۋىنا اسەر ەتەتىن بىرنەشە سەبەپ بار. سونىڭ ءبىرى – اۋىر جۇك كولىكتەرىنىڭ بەلگىلەنگەن مولشەردەن الدەقايدا ارتىق جۇك تاسىمالداۋى. ماسەلەن, «اتىراۋ –يندەر» جولىمەن اۋىر جۇك كولىكتەرى ءجيى قاتىنايدى. ويتكەنى يندەر اۋدانىنىڭ اۋماعىنان الىناتىن قۇرىلىس ماتەريالدارى اتىراۋ قالاسىنا وسى جولمەن تاسىمالدانادى.
– جول ساپاسىنىڭ بۇزىلۋىنا ستاتيستيكالىق تالداۋ جۇرگىزىپ كوردىك. سوعان سايكەس تالداۋ ناتيجەسى اتىراۋ وبلىسىندا اسفالتتىڭ 35 پايىزى جۇك كولىكتەرىندەگى اۋىر سالماقتىڭ سالدارىنان تەز توزاتىنىن كورسەتىپ وتىر. سول سەبەپتەن, جول ساپاسىن ساقتاۋ ءۇشىن جىلدىڭ ءار مەزگىلىندە اۋىر جۇك كولىكتەرىنە باقىلاۋ ءىس-شارالارى كۇشەيتىلەدى. ەرەجەگە سايكەس اۋىر جۇك كولىكتەرىنىڭ سالماعى 8 توننادان اسقان جاعدايدا ايىپپۇل سالىنادى, – دەيدى مەيىرحان بەكەسوۆ.
جاقىندا فيليال ماماندارى اتىراۋ وبلىسى بويىنشا كولىكتىك باقىلاۋ ينسپەكتسياسى, وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ وكىلدەرىمەن بىرگە جۇك كولىكتەرىنىڭ سالماعىنا تەكسەرۋ جۇرگىزدى. تەكسەرۋ كەزىندە كولىك باقىلاۋ ينسپەكتورلارى بىرنەشە جۇك كولىگىن توقتاتىپ, ارنايى قۇرىلعىمەن سالماعىن ولشەدى. قۇم تيەگەن كەيبىر جۇك كولىكتەرىنىڭ سالماعى شەكتى مولشەردەن 3-5 تونناعا اسىپ كەتكەن.
– كولىك يەلەرىنە اكىمشىلىك قۇقىق بۇزۋشىلىق تۋرالى كودەكسىنىڭ 571-بابىنىڭ 6-بولىمىمەن اكىمشىلىك حاتتاما تولتىرىلىپ, ايىپپۇل سالىندى. جىل باسىنان بەرى جول بويىندا زاڭ بۇزعان 62 مىڭنان استام كولىك يەلەرىنە سالىنعان ايىپپۇل 46 ملن تەڭگەنى قۇرادى, – دەيدى ينسپەكتسيا مامانى تالعات جانتەمىروۆ.
مىنە, جول ساپاسىن باقىلايتىن ورتالىق فيليالىنىڭ ماماندارى انىقتاعان اقاۋ مەن كەمشىلىكتىڭ ءبىر پاراسى وسىنداي. بۇدان جول قۇرىلىسىن جۇرگىزەتىن مەردىگەر مەكەمەلەردىڭ نورماتيۆتىك-تەحنيكالىق قۇجاتتى دا, تەحنيكالىق قاداعالاۋشىنى دا قاجەت ەتپەيتىنى اڭعارىلىپ وتىر. جول قۇرىلىسىنا پايدالاناتىن ينەرتتى ماتەريالداردىڭ ساپاسىنا ءمان بەرىلمەيدى. دەمەك مەردىگەرلەر مەن شامادان تىس اۋىر سالماقتى جۇك تيەيتىن كولىك يەلەرى وزىمبىلەمدىكتى ۇستانىپ وتىر. جول ساپاسىنىڭ تومەندىگى مەن تەز توزۋىنىڭ باستى سەبەبى وسىندا جاتقان جوق پا؟
اتىراۋ وبلىسى
