قازاقستان ەلشىسى

رەسەي جاراتىلىستانۋ عىلىمدارى اكادەمياسىنىڭ شەتەلدىك اكادەميگى

قازاقستان رەسپۋبليكاسىنىڭ رەسەي فەدەراتسياسىنداعى ەلشىسى مارات ءتاجين رەسەي جاراتىلىستانۋ عىلىمدارى اكادەمياسىنىڭ (راەن) قۇرمەتتى شەتەلدىك اكادەميگى اتاعىنا يە بولدى. ديپلوم تاپسىرۋ ءراسىمى كەشە ماسكەۋدە رەسەي فەدەراتسياسى پرەزيدەنتىنىڭ جانىنداعى رەسەي حالىق شارۋاشىلىعى جانە مەملەكەتتىك قىزمەت اكادەمياسىنىڭ عيماراتىندا بولىپ ءوتتى. راەن اكادەمياسى پرەزيدەنتىنىڭ ءبىرىنشى ورىنباسارى ليديا يۆانيتسكايا ماراپاتتاۋ ءراسىمى بارىسىندا قازاقستان-رەسەي ىنتىماقتاستىعىنىڭ جوعارى دەڭگەيىن اتاپ ءوتىپ, وسى ۇدەرىستە عىلىمنىڭ ەرەكشە ورىن الاتىنىنا نازار اۋداردى. ونىڭ پىكىرىنشە, م.تاجينگە بەرىلگەن شەتەلدىك اكادەميك اتاعى ەلشىنىڭ ەكى ەل عالىمدار قاۋىمداستىقتارى اراسىنداعى بايلانىستاردى نىعايتۋعا قوسقان ەلەۋلى ۇلەسىنىڭ, سونداي-اق, دوكتور جانە اكادەميك رەتىندە سوتسيولوگيا عىلىمىن دامىتۋعا سىڭىرگەن زور ەڭبەگىنىڭ بەلگىسى. «بۇگىنگى وقيعا, بىرىنشىدەن, مەملەكەتتەر باسشىلارى نۇر­سۇلتان ءابىش ۇلى نازارباەۆ جانە ۆلاديمير ۆلادي­ميروۆيچ پۋتين بەلگىلەپ بەرگەن قازاقستان-رەسەي بايلا­نىس­تارىنىڭ كەڭ اۋقىمىن كورسەتەدى. مەن وسىندا, ەۋرا­زيا­لىق ىقپالداستىقتىڭ دامۋىنا ارنالعان قازاقستان پرەزيدەنتىنىڭ م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە جاقىندا وقىعان ءدارىسى بارىسىندا ايتقا­نىنداي, عالىمدار قاۋىمداستىعى مەن رەسەي قوعامى ەۋرازيالىق ەكونوميكالىق وداق يدەياسىن قولدايتىنىن كورىپ وتىرمىن», دەدى ءوزىنىڭ سوزىندە م.ءتاجين.