سىرتقى ىستەر مينيسترلىگىنىڭ مالىمدەۋىنشە, قازاقستاننىڭ قىتايداعى ەلشىسى شاحرات نۇرىشەۆ تيانتسزين قالالىق پارتيا تۇراقتى كوميتەتىنىڭ مۇشەسى, ءبىلىم ىستەرى كوميتەتىنىڭ حاتشىسى ۆان سيۋيمەن كەلىسسوزدەر جۇرگىزگەن. كەزدەسۋ بارىسىندا ءبىلىم جانە عىلىم سالاسىنداعى ەكىجاقتى ىنتىماقتاستىقتىڭ وزەكتى ماسەلەلەرى قارالىپ, وسى جىلدىڭ 14 قىركۇيەگىندە قازاقستان پرەزيدەنتى قاسىم-جومارت توقاەۆ پەن قحر توراعاسى سي تسزينپين اراسىندا قول جەتكىزىلگەن بىرقاتار ماسەلەنى ىسكە اسىرۋ جولدارى تالقىلاندى. اتاپ ايتقاندا, ش.نۇرىشەۆ قازاقستاندىق تاراپتىڭ قحر توراعاسىنىڭ ەلىمىزدە كاسىپتىك ءبىلىم بەرۋ سالاسىنداعى حالىقارالىق جوباسى – «لۋ بان شەبەرحاناسىن» ىسكە اسىرۋ تۋرالى باستاماسىن قولداپ وتىرعانىن جەتكىزدى.
بۇل رەتتە قازاقستان ەل اۋماعىندا ءتۇرلى الەمدىك تەحنيكالىق جوعارى وقۋ ورىندارىنىڭ فيليالدارىن اشۋ تۋرالى باستامالاردى بىرىكتىرىپ, ولاردى ىسكە اسىرۋ جولدارىن ازىرلەۋدى ۇسىندى. وسى ماقساتتا قازاقستان ەلشىسى جاقىن ارادا ەكى ەلدىڭ مۇددەلى مەملەكەتتىك ورگاندارى مەن ۋنيۆەرسيتەتتەرى اراسىنداعى كەلىسسوزدەردى ۇيىمداستىرۋعا باستاماشى بولدى.
ءوز كەزەگىندە ۆان سيۋي عىلىم مەن ءبىلىم سالاسى قازاقستان مەن قىتاي اراسىنداعى ىنتىماقتاستىقتىڭ سەرپىندى باعىتتارىنىڭ ءبىرى ەكەنىن اتاپ ءوتىپ, قىتاي تاراپىنىڭ ونى ودان ءارى كەڭەيتۋگە دايىن ەكەنىن ايتتى. ول «لۋ بان شەبەرحاناسى» حالىقارالىق جوباسىمەن تانىستىرىپ, تيانتسزين كاسىپتىك ۋنيۆەرسيتەتىنىڭ قازاقستاننىڭ جوعارى وقۋ ورىندارىمەن پراكتيكالىق ىنتىماقتاستىققا دايىندىعىن اتاپ ءوتتى. ەندى ەكى تاراپ قول جەتكىزىلگەن كەلىسىمدەردى ىسكە اسىرۋعا كىرىسپەك.
«لۋ بان شەبەرحاناسى» – قىتايدىڭ كاسىپتىك ءبىلىم بەرۋ سالاسىنداعى حالىقارالىق ىنتىماقتاستىق جوباسى. وسىدان 2,5 مىڭ جىل بۇرىن ءومىر سۇرگەن قىتايدىڭ ۇلى شەبەرى جانە ونەرتاپقىشى لۋ باننىڭ ەسىمىمەن اتالاتىن جوبانىڭ ماقساتى – كاسىپتىك-تەحنيكالىق ءبىلىم بەرۋ ورتالىقتارىن بىرلەسىپ قۇرۋ ارقىلى شەتەلدىك تەحنيكالىق وقۋ ورىندارىنا بىلىكتى كادرلار دايارلاۋعا كومەك كورسەتۋ. بۇگىنگى تاڭدا الەمنىڭ 19 ەلىندە 20 «لۋ بان شەبەرحاناسى» جۇمىس ىستەيدى.
قازاقستان-قىتاي قاتىناستارىنىڭ جاڭا كەزەڭى ەكى ەلدىڭ عىلىمي-مادەني كەڭىستىگىنە جول اشتى. قازىر ەكى ەلدىڭ 40-تان اسا ۋنيۆەرسيتەتى اراسىندا تىعىز بايلانىس ورناعان. سونداي-اق قحر قازاق جاستارىن شاكىرتاقىمەن قامتىپ وتىر. قازىرگى ۋاقىتتا قىتايدا 18 مىڭعا جۋىق قازاقستاندىق ءبىلىم الۋدا, ال قازاقستان بويىنشا بەس كونفۋتسي ينستيتۋتى جانە قىتاي مادەنيەتى مەن ءتىلىن ناسيحاتتايتىن وقۋ ورىندارى جۇمىس ىستەيدى.
كونفۋتسي ينستيتۋتتارى, ەڭ الدىمەن, ءتۇرلى بايقاۋ مەن ءىس-شارا ارقىلى قىتايدىڭ ءتىلى مەن مادەنيەتىن ناسيحاتتاۋعا ارنالعان. ولاردىڭ نەگىزى-ندە ارنايى كۋرستار ۇيىمداستىرىلادى, قىتاي تىلىنەن (HSK) بىلىكتىلىك تەستىلەرى, قىتايعا ارنالعان عىلىمي كونفەرەنتسيالار وتكىزىلەدى. سونداي-اق قىتاي ءتىلى بويىنشا وقۋ ادەبيەتتەرىن ازىرلەپ, قىتايدا ستۋدەنتتىك جانە وقىتۋشىلىق تاعىلىمدامالار, وقىتۋ بويىنشا كونسۋلتاتسيالار ۇيىمداستىرادى. قازاقستاندا استانا, الماتى, اقتوبە جانە قاراعاندى قالالارىندا كونفۋتسي ينستيتۋتى جۇمىس ىستەيدى. استانادا ينستيتۋت ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى بازاسىندا قۇرىلسا, الماتىدا 1999 جىلى قازۇۋ-دىڭ قىتاي ءتىلى ورتالىعى بازاسىندا لانچجوۋ ۋنيۆەرسيتەتىمەن بىرلەسىپ اشىلعان. كونفۋتسي ينستيتۋتى 2010 جىلى اقتوبە مەملەكەتتىك پەداگوگيكالىق ينستيتۋتىنىڭ بازاسىندا, 2011 جىلى قاراعاندىدا تەحنيكالىق ۋنيۆەرسيتەت بازاسىندا قۇرىلدى. كونفۋتسي ينستيتۋتتارىنىڭ جۇيەسى – مادەنيەتتى كەڭەيتىپ, ءتىلدى تانىمال ەتۋدىڭ ءتيىمدى مەحانيزمى. كونفۋتسي ينستيتۋتتارىنىڭ قىزمەتى جانە قىتاي مەملەكەتىنىڭ ءتىلى مەن مادەنيەتىن تانىمال ەتۋدەگى بەلسەندىلىگى قازىرگى ۋاقىتتا قىتاي ءتىلىنىڭ 40-تان استام ەلدىڭ ۇلتتىق ءبىلىم بەرۋ جۇيەسىنە ەنۋىنە اكەلدى.
ال 2015-2017 جىلدار ارالىعىندا شانحاي, بەيجىڭ, داليان جانە سيان ۋنيۆەرسيتەتتەرىندە ءتورت «قازاقستان ورتالىعى» اشىلىپ, جۇمىس ىستەپ كەلەدى. ورتالىقتار قازاق ءتىلىن, قازاق مادەنيەتى مەن ونەرىن ۇيرەنۋگە كومەك كورسەتىپ, ستۋدەنتتەر مەن وقىتۋشىلاردى قازاقستاننىڭ تاريحى مەن قازىرگى ءومىرى تۋرالى حاباردار ەتەدى.
