Kazsports.kz-ءتىڭ حابارلاۋىنشا, ەرلەر اراسىنداعى جەكەلەي سىندا دياس جيرەنباەۆ قىسقا جانە ەركىن باعدارلامانى قوسقاندا 192,67 ۇپاي جينادى. قازاقستاندىق سپورتشى تەك گرۋزين نيكا ەگادزەگە (208,47 بالل) ەسە جىبەردى. ۇزدىك ۇشتىكتى ازەربايجاندىق ۆلاديمير ليتۆينتسەۆ (188,77) تۇيىندەدى. بۇل سىندا راحات برالين 4-ساتىدان كورىندى (181,22 ۇپاي). قالعان قازاقستاندىقتاردىڭ ناتيجەسى: ولەگ مەلنيكوۆ – 6-ورىن (162,30), ەليسەي ۆولكوۆ 8-ورىن (101,96).
ال ايەلدەر اراسىندا وڭتۇستىككورەيالىق مينچە كيم ەشكىمگە دەس بەرگەن جوق (158,84 ۇپاي). وتانداسىمىز اننا لەۆكوۆەتس قىسقا باعدارلامادان كەيىنگى ورنىن جالپى ەسەپتە دە ساقتاپ قالىپ, كۇمىس مەدالعا قول جەتكىزدى (145,43 ۇپاي). قولا جۇلدە تاعى ءبىر وڭتۇستىككورەيالىق دابين چحۆەگە بۇيىردى. ول اننادان نەبارى 0,4 ۇپاي قالىپ كەتتى (145,06). وزگە قازاقستاندىق مانەرلەپ سىرعاناۋشىلاردىڭ ناتيجەسى تومەندەگىدەي: اننا فارافونوۆا – 7-ورىن (122,51), باگدانا راحيشوۆا – 9-ورىن (111,88), ياسمين تەكيك 10-ورىن (105,70).
جۇپتىق سىندا كوپتەگەن مامان بولجاعانداي, جاپونيالىق كانا مۋراموتو مەن دايسۋكە تاكاحاسي جەكە-دارا توپ جاردى (188,30). كۇمىس جۇلدە گەرمانيالىق دجەننيفەر يانسە ۆان رەنسبۋرگ پەن بەندجامين ستەففان دۋەتىنە بۇيىرسا, قولانى ماجارستاندىق ماريا يگناتەۆا مەن دانيل شەمكو قانجىعاسىنا بايلادى. العاشقى التىلىقتا ونەر كورسەتكەن قازاقستاندىق گاۋھار ناۋرىزوۆا مەن بويسانگۋر داتيەۆ قوس باعدارلامادان سوڭ, 7-ساتىعا جايعاستى (145,12 ۇپاي).
جالپى, بيىلعى دودادا قازاقستان, جاپونيا, وڭتۇستىك كورەيا, يتاليا, فرانتسيا, گەرمانيا, يزرايل, بولگاريا, ماجارستان, ازەربايجان, مولدوۆا, ارمەنيا, گرۋزيا, ۋكراينا مەن قىرعىزستان سپورتشىلارى باق سىنادى. وتانداستارىمىز بارلىق باعدارلامادا ونەر كورسەتكەنىن ايتا كەتكەن ءجون.
ەستەرىڭىزگە سالا كەتەيىك, سوچي وليمپياداسىنىڭ قولا جۇلدەگەرى دەنيس تەندى ەسكە الۋعا ارنالعان باسەكە العاش رەت 2019 جىلى الماتىدا وتكەن. بىلتىر مارتەبەلى ءتۋرنيردى استانا قالاسى قابىلداعان. ول كەزدە 18 ەلدىڭ سپورتشىلارى ەلىمىزدىڭ باس قالاسىندا ءوزارا شەبەرلىك بايقاسقان.
Denis Ten Memorial Challenge ءتۋرنيرىن سپورتتى دامىتۋ ديرەكتسياسى مەن الماتى قالاسى اكىمدىگىنىڭ قولداۋىمەن دەنيس تەن قوعامدىق قورى ۇيىمداستىردى.
«حالىق ارەنادا» ماراپاتتاۋ راسىمىنەن كەيىن تۋرنير جەڭىمپازدارى مەن جۇلدەگەرلەرىنىڭ قاتىسۋىمەن گالا-شوۋ ءوتتى.
