شۇعىل قىزمەتتەردىڭ حابارلاۋىنشا, وڭتۇستىك كورەيا استاناسىندا COVID-19 پاندەمياسىنان كەيىن العاش رەت شەكتەۋسىز اتاپ وتىلگەن حەللوۋين كۇنىندە 151 ادام قازا تاۋىپ, تاعى 82 ادام زارداپ شەكتى.
وقيعا سەۋلدىڭ يتەۆون اۋدانىندا بولدى, وندا كوپتەگەن تۇنگى كلۋبتار, مەيرامحانالار مەن كافەلەر ورنالاسقان. كوۆيدتىك شەكتەۋلەر جويىلعاننان كەيىن اۋداندا ءبىرىنشى رەت ماسكاسىز جاپپاي مەرەكە ءوتتى.
«قازا تاپقانداردىڭ كوپشىلىگى كامەلەتكە تولماعاندار مەن 20 جاس شاماسىنداعى جاستار», دەپ حابارلادى ءورت ءسوندىرۋ ءبولىمىنىڭ وكىلى.
ول قازا تاپقانداردىڭ اراسىندا ەكى شەتەل ازاماتى بار, تاعى 15 شەتەلدىك جاراقات العان. كوپشىلىك جينالعان جەردە ادامدار دەنساۋلىق جاعدايلارىنا شاعىمدانا باستاعان. 50-دەن استام ادام جۇرەك پروبلەمالارىنا بايلانىستى ەسىنەن تانىپ قالعان. ءورت سوندىرۋشىلەردىڭ ايتۋىنشا, حالىق جاپپاي جينالعان ورىنداردا ادامدار ءبىر-ءبىرىن تاپتاپ وتكەن.
حەللوۋين وڭتۇستىك كورەيادا ۇلكەن مەرەكە سانالمايدى, دەگەنمەن يتەۆون - حالىقارالىق مادەني اتموسفەراسى بار ايماق - بۇل مەرەكەنى تويلايتىن ادامدار جينالاتىن ورىنعا اينالعان.
وقيعا كەزىندە اۋداندا 100 مىڭعا دەيىن ادام بولعان - نەگىزىنەن جاستار, كەيبىرەۋلەرى كوستيۋم كيگەن.
ريا نوۆوستي جازعانداي, وڭتۇستىك كورەيا پرەزيدەنتى يۋن سوك يول بارلىق زارداپ شەككەندەرگە كومەك كورسەتىلەتىنىن مالىمدەدى.
«مەن قازا تاپقان ادامدار ءۇشىن دۇعا ەتەمىن جانە زارداپ شەككەندەر تەز ساۋىعىپ كەتەدى دەپ ۇمىتتەنەمىن. قازا تاپقانداردىڭ وتباسىلارىنا كوڭىل ايتامىن, ەلدە ۇلتتىق ازا تۇتۋ كۇنىن جاريالايمىن. بۇل جاعدايدى شەشۋ ءۇشىن جانە بولاشاقتا قايتالانباۋى ءۇشىن ءتيىستى شارالار قابىلدانادى», دەدى يۋن سوك يول.
