سوڭعى 9 جىل بويى تالقىلانىپ كەلە جاتقان ماسەلە – وزبەكستاننىڭ 1993 جىلعى ءوزارا ساۋدادا تاۋارلاردىڭ شىعارۋ ەرەجەلەرىن قولدانۋى بويىنشا وڭ شەشىم قابىلداندى. تاۋارلاردىڭ شىعارىلعان ەلىن انىقتاۋدىڭ بىرىڭعاي ءتارتىبى تمد-داعى ەركىن ساۋدا جانە تاۋار اينالىمى رەجىمىنىڭ ءتيىمدى ارەكەت ەتۋى ءۇشىن قاجەت.
وزبەكستان پرەزيدەنتى شاۆكات ميرزيەەۆ 2022 جىلعى 14 قازاندا قازاقستاندا وتكەن تمد مەملەكەتتەرى باسشىلارى كەڭەسىنىڭ وتىرىسىندا بىرىڭعاي تارتىپكە قوسىلۋ تۋرالى تۇبەگەيلى كەلىسىمدى جاريالادى. كەزدەسۋدە ايتىلعان وزبەك تاراپىنىڭ مالىمەتىنشە, بۇل ماسەلە 2022 جىلدىڭ سوڭىنا دەيىن پىسىقتالاتىن بولادى.
سونىمەن قاتار وزبەك تاراپى وزبەكستاندا يمپورتتالاتىن جانە وندىرىلەتىن الكوگول مەن تەمەكى ونىمدەرىنە اكتسيز مولشەرلەمەسىن كەزەڭ-كەزەڭىمەن 2025 جىلعا دەيىن تەڭەستىرۋ جۇمىستارىن جۇرگىزەتىن بولادى.
كوپتەگەن ماسەلە بويىنشا وڭ شەشىم قابىلداندى:
- قازاقستاننىڭ مال ازىقتىق داقىلدارىنىڭ, جەمشوپتىڭ, جۇمىرتقانىڭ ترانزيتىنە رۇقسات بەرۋ مەرزىمىن قىسقارتۋ. بۇل ماسەلە بۇعان دەيىن «اتامەكەن» ۇكپ الاڭىندا كوتەرىلگەن بولاتىن.
- وزبەكستان تاراپىنان مامانداندىرىلعان كومپانيالار ارقىلى قازاقستاندىق كارتوپتى ەكسپورتتاۋدى جۇزەگە اسىرۋ. س.جۇمانعاريننىڭ ايتۋىنشا, قازاقستان وركەنيەتتى جاعدايدا 500 مىڭ تونناعا دەيىن كارتوپ ەكسپورتتاۋعا دايىن.
- وزبەكستانعا قازاقستاندىق المانى جەتكىزۋ ءتارتىبىن جەڭىلدەتۋ. جاۋاپتى ۆەدومستۆولار فيتوسانيتارلىق قۇجاتتاما بويىنشا ەلەكتروندىق جۇيەلەردى ينتەگراتسيالاۋ ماسەلەسىن پىسىقتايدى. بۇدان باسقا, وزبەكستان ءوزىنىڭ فيسكالدىق ورگاندارىنىڭ شىعارىلعان ەلى – قازاقستاندى راستايتىن قۇجاتتار بولعان جاعدايدا قازاقستاننان اكەلىنەتىن ءونىمنىڭ قۇنى بويىنشا تالاپتاردىڭ قولايسىزدىعى تۋرالى ەرەجەنىڭ ورىندالۋىن باقىلاۋعا الادى.
- قازاقستان مەن وزبەكستان اراسىنداعى قازىرگى جانە جاڭا باعىتتار بويىنشا اۋە رەيستەرىنىڭ سانىن كوبەيتۋ, قازاقستاندىق تاراپ ءۇشىن جاڭا باعىت رەتىندە فەرعانا, بۇحارا, قارشي قالالارىن قوسۋدى پىسىقتاۋ.
كەزدەسۋگە قاتىسۋشىلار مەملەكەتتىك ساتىپ الۋلارعا ءوزارا قاتىسۋ, ەنەرگەتيكا, قازاقستاندا دارىلىك زاتتاردى تىركەۋدى جەڭىلدەتۋ ماسەلەلەرىن تالقىلاپ, ءوزارا تۇسىنىستىككە كەلدى, «ورتالىق ازيا» حالىقارالىق ونەركاسىپتىك كووپەراتسيا ورتالىعىنىڭ جوباسىن ىسكە اسىرۋدا ودان ءارى پايىمداۋدى پىسىقتادى.
