مەدياتسيا بۇگىندە قوعامنىڭ بارلىق سالاسىندا قىزمەت اتقارادى. ءتىپتى وتباسىلىق ماسەلەلەردى ەرلى-زايىپتىلار ءوزارا شەشە الماسا, مەدياتورلار كومەككە كەلەدى. پارلامەنت سەناتىنىڭ دەپۋتاتى ءلاززات سۇلەيمەننىڭ باسقارۋىمەن وتكەن جيىندا مەدياتسيا ينستيتۋتىنىڭ جاي-كۇيى, ونىڭ قىلمىستىق ىستەردە پايدالانىلۋى, ارنايى كابينەتتەردىڭ ءبىلىم مەكەمەلەرىندە اشىلۋى, مەدياتسيا تاجىريبەسىنىڭ مەديتسينادا قولدانىلۋى سەكىلدى ماسەلەلەر قارالدى. اسىرەسە ماماندار ەڭبەك داۋلارىن شەشۋدە مەدياتسيانىڭ ءرولى ەرەكشە ەكەنىن ايتادى.
ادەتتەگىدەي ءار مەكەمەدە ەڭبەك داۋلارى, جۇمىسشىلار اراسىندا تۇسىنىسپەۋشىلىك تۋىنداي قالسا, بۇل ماسەلە ارنايى كوميسسيادا قارالادى. ال مەدياتسيا سالاسىنىڭ ساراپشىلارى «كوميسسيا مۇشەلەرىنىڭ ەڭبەك داۋلارىن شەشۋ ءتارتىبى, ادىستەرى جانە زاڭنامانىڭ مازمۇنى بويىنشا قۇزىرەتتەرى تومەن», دەيدى. ويتكەنى قازىر ەڭبەك داۋلارىن قارايتىن كوميسسيانىڭ بىلىكتىلىگىن راستايتىن پارامەترلەر قاراستىرىلماعان. وسى ورايدا, ساراپشىلار مەدياتسيا مەكەمەلەرىنىڭ كومەكتەسە الاتىنىن العا تارتادى.
«مەدياتسيانىڭ بىتىمگەرشىلىك كوميسسيادان ايىرماشىلىعى, مەدياتور ەكى تاراپتىڭ مۇددەسى ءۇشىن جۇمىس ىستەيدى, تاراپتاردىڭ راسىمگە قاتىسۋىن قامتاماسىز ەتەتىن بەيتاراپ, قۇزىرەتتى مامان. مەدياتوردىڭ بەيتاراپتىعىنا تەرىس اسەر ەتەتىن ءمان-جايلار بولسا, مامان مەدياتسيادان باس تارتۋعا مىندەتتى. مەدياتسيا – داۋلاردى سوتتان تىس رەتتەۋدىڭ ەڭ ءتيىمدى جولى. بۇل ءراسىم كەزىندە جانجالعا قاتىسۋشى تاراپتار مەدياتوردىڭ تاجىريبەسىنە, ءبىلىمى مەن داعدىسىنا سۇيەنە وتىرىپ, ءوزارا ءتيىمدى شەشىمگە ءوز بەتىنشە كەلە الادى. داۋدىڭ شەشىلۋى تولىعىمەن تاراپتاردىڭ وزدەرىنىڭ ەركىنە بايلانىستى», دەدى «ۇلتتىق مەدياتورلار پالاتاسى» قب شىعىس قازاقستان وبلىسى وكىلدىگىنىڭ ديرەكتورى مارياننا دياچۋك.
سونداي-اق مەدياتسيانىڭ ارتىقشىلىعى داۋعا قاتىسۋشىلاردىڭ ۋاقىتىن, اقشاسىن جانە ەموتسيونالدىق كۇشىن ۇنەمدەيدى, ءراسىمنىڭ ۇيىمداستىرىلۋى, ەرەجەلەرى مەن مازمۇنى جەكە بەلگىلەنەدى. دەسە دە, تاراپتاردىڭ ءبىرى مەملەكەتتىك ورگان بولىپ تابىلاتىن ەڭبەك قاتىناستارىنان تۋىندايتىن داۋلارعا مەدياتسيا قاتىسپايدى. سونداي-اق سىبايلاس جەمقورلىق, قىلمىس جانە مەملەكەتتىك قىزمەت پەن مەملەكەتتىك باسقارۋ مۇددەلەرىنە قارسى باسقا دا قىلمىستاردى قامتيتىن قىلمىستىق ىستەر بويىنشا مەدياتسيا ءراسىمى قولدانىلمايدى.
جيىندا ماماندار ەڭبەك داۋلارىن شەشۋدەگى مەدياتسيانىڭ قاتىسۋىن قامتاماسىز ەتۋدە بىرنەشە ۇسىنىس جاسادى. «قىزمەتكەردىڭ داۋدى شەشۋگە قاتىستى تۇسىرگەن شاعىمعا بايلانىستى شەكتەۋلەر بار. وسى ورايدا ەڭبەك كودەكسىنە ءبىرىنشى ساتىداعى تاتۋلاستىرۋ كوميسسياسىنا عانا ەمەس, كاسىبي مەدياتورعا دا بالامالى نەگىزدە جۇگىنۋ قۇقىعىن بەرەتىن نورماعا تولىقتىرۋ ەنگىزۋ ۇسىنىلادى», دەدى مەدياتور م.دياچۋك.
