ولار – «راقىمشىلىق جاساۋ تۋرالى» جانە «ەۋرازيالىق ەكونوميكالىق وداقتىڭ تەحنيكالىق رەگلامەنتتەرى تالاپتارىنىڭ ساقتالۋىنا مەملەكەتتىك باقىلاۋدى (قاداعالاۋدى) ەۋرازيالىق ەكونوميكالىق وداققا مۇشە مەملەكەتتەردىڭ كورسەتىلگەن سالاداعى زاڭناماسىن ۇيلەستىرۋ ماقساتىندا جۇزەگە اسىرۋ قاعيداتتارى مەن تاسىلدەرى تۋرالى كەلىسىمدى راتيفيكاتسيالاۋ تۋرالى» زاڭ جوبالارى.
سەنات توراعاسى ماۋلەن اشىمباەۆ مەملەكەت باسشىسىنىڭ قاڭتار وقيعاسىنا قاتىسۋشىلارعا راقىمشىلىق جاساۋ تۋرالى باستاماسى گۋمانيزمنىڭ جانە ىزگىلىكتىڭ جارقىن كورىنىسى ەكەنىن اتاپ ءوتتى.
«مەملەكەت باسشىسى ءوز جولداۋىندا قاڭتار وقيعاسىنا قاتىسۋشىلارعا ءبىر رەتتىك راقىمشىلىق جاريالاۋدى تاپسىردى. سوعان بايلانىستى ءبىر توپ پارلامەنت دەپۋتاتى ءتيىستى زاڭ جوباسىنا باستاماشىلدىق جاسادى. الداعى ۋاقىتتا قاجەتتى جۇمىستاردى اتقارىپ, قورىتىندىلارىن الىپ, اتالعان زاڭدى بارىنشا تەزىرەك قابىلداۋىمىز كەرەك», دەدى ماۋلەن اشىمباەۆ.
«راقىمشىلىق جاساۋ تۋرالى» زاڭ جوباسىنىڭ نورمالارى قىلمىستىق تەرىس قىلىقتار, ونشا اۋىر ەمەس جانە اۋىرلىعى ورتاشا قىلمىستار جاساعانداردى جازادان بوساتۋدى كوزدەيدى. مۇنداي قىلمىستار ءۇشىن جازاسىن وتەگەندەردەن سوتتىلىعى الىنادى. زاڭ جوباسى ارقىلى اۋىر قىلمىس جاساعاندار ءۇشىن سوت تاعايىنداعان جازا – تورتتەن ۇشكە, ال اسا اۋىر قىلمىستار ءۇشىن جارتىسىنا قىسقارتىلادى.
سونداي-اق زاڭ جوباسىندا بوساتىلاتىن ادامداردى جۇمىسقا ورنالاستىرۋ, ولارعا مەديتسينالىق كومەك كورسەتۋ جانە قۇجاتتارىن رەسىمدەۋدى كوزدەيتىن, ياعني قايتا الەۋمەتتەندىرۋدى قامتاماسىز ەتەتىن نورمالار بار. ايتا كەتۋ كەرەك, ازاپتاۋلار جاساعاندار, تەرروريستەر, ەكسترەميستەر, رەتسيديۆيستەر جانە تارتىپسىزدىكتەردى ۇيىمداستىرۋشىلار راقىمشىلىققا جاتپايدى.
«ەۋرازيالىق ەكونوميكالىق وداقتىڭ تەحنيكالىق رەگلامەنتتەرى تالاپتارىنىڭ ساقتالۋىنا مەملەكەتتىك باقىلاۋدى (قاداعالاۋدى) ەۋرازيالىق ەكونوميكالىق وداققا مۇشە مەملەكەتتەردىڭ كورسەتىلگەن سالاداعى زاڭناماسىن ۇيلەستىرۋ ماقساتىندا جۇزەگە اسىرۋ قاعيداتتارى مەن تاسىلدەرى تۋرالى كەلىسىمدى راتيفيكاتسيالاۋ تۋرالى» زاڭ جوباسى اتالعان سالادا مۇشە مەملەكەتتەردىڭ زاڭناماسىن ۇيلەستىرەدى.
كەلىسىمدە قاۋىپتى ءونىم تۋرالى اقپاراتتاندىرۋ جۇيەسىنىڭ جۇمىسىن قامتاماسىز ەتۋ قاراستىرىلعان. سول ارقىلى ەاەو-نىڭ تەحنيكالىق رەگلامەنتتەرىنىڭ تالاپتارىنا سايكەس كەلمەيتىن ءونىم تۋرالى مالىمەتتەر الماسۋ جۇرگىزىلەدى.
سونىمەن قاتار بيۋرو مۇشەلەرى ماجىلىستەن كەلىپ تۇسكەن زاڭ جوبالارىن سەناتتىڭ تۇراقتى كوميتەتتەرىنە ءبولىپ بەردى.
