باشير سولسانوۆ,
«ۆايناح» شەشەن-ينگۋش ەتنومادەني بىرلەستىگىنىڭ توراعاسى:
– رەسپۋبليكا كۇنى, تاۋەلسىزدىك كۇنى, كونستيتۋتسيا كۇنى ەل ءۇشىن, حالىق ءۇشىن ايتۋلى كۇن عانا ەمەس, ماڭىزدى, قىمبات, ىستىق ۇعىم بولۋى قاجەت. ويتكەنى, بۇل ۇعىمدار ەل تۇتاستىعىنىڭ نەگىزى.
قازىر ەلىمىزدەگى قازاقستان حالقى اسسامبلەياسى حالىقتار دوستىعىنا سەپتىگىن تيگىزىپ, قوعامدىق پىكىرلەردى تەڭ قۇقىلى جەتكىزۋگە مۇمكىندىك بەرەدى. ماسەلەن, ءبىزدىڭ «ۆايناح» شەشەن-ينگۋش ەتنومادەني بىرلەستىگىنىڭ وكىلدەرى ەلىمىزدىڭ قوعامدىق-ساياسي ومىرىنە بەلسەنە ارالاسىپ كەلەدى. ارامىزدا قوعام بەلسەندىلەرى, دەپۋتاتتار بار. حالىق الەۋەتىن ارتتىرۋعا ءوز ۇلەسىمىزدى قوسىپ ءجۇرمىز. ارينە, بۇل ەڭ الدىمەن, مەملەكەت باسشىسىنىڭ ەڭبەگى, سودان سوڭ بىرلىككە ۇمتىلعان حالىقتىڭ ارقاسى. باۋىرلاستىق, تاتۋ كورشىلىك جانە ءوزارا تۇسىنىكتىك بار جەردە مەملەكەت تە داميدى دەپ ايتار ەدىم.
يۋسۋپ كەليگوۆ,
قازاقستان حالقى اسسامبلەياسى كەڭەسىنىڭ مۇشەسى:
– رەسپۋبليكامىزدا ءبىر شاڭىراق استىندا جۇزدەن اسا ەتنوس وكىلدەرى تاتۋ-ءتاتتى ءومىر ءسۇرىپ جاتىر. بۇل – ءبىزدىڭ بىرەگەيلىگىمىز جانە ارتىقشىلىعىمىز. مادەنيەتتى دامىتۋعا, لايىقتى ءبىلىم الۋعا, ءتىل ۇيرەنۋگە بارشاعا بىردەي تەڭ قۇقىق پەن مۇمكىندىك بەرىلگەن.
قازاقستان حالقى اسسامبلەياسى رۋحاني كەلىسىم مەن ۇلتارالىق بىرلىكتى ساقتاۋدا ۇلكەن جۇمىس اتقارىپ كەلەدى. قحا وكىلدەرى, وبلىستارداعى رەسپۋبليكالىق جانە شاعىن اسسامبلەيالار, ەتنومادەني بىرلەستىكتەر رۋحاني ۇستانىمداردى نىعايتۋ, ءوزارا قولداۋ, ءبىر-بىرىنە دەگەن سىيلاستىقتى قالىپتاستىرۋدا كوپتەگەن ءىس تىندىردى.
ءبىز پرەزيدەنتىمىز ق.توقاەۆتىڭ جولداۋىندا قويىلعان مىندەتتەردى, جاڭا قازاقستاندى قۇرۋ بويىنشا باستامالاردى قولدايمىز جانە ونى ورىنداۋعا اتسالىسامىز. ەل بىرلىگى مەملەكەت بولاشاعىنىڭ تابىستى دامۋىنىڭ بىردەن-ءبىر سارا جولى. ۇلتارالىق كەلىسىمدى ساقتاۋ – مەملەكەتتىك ورگانداردىڭ عانا ەمەس, بۇكىل قوعامنىڭ, ءاربىر ازاماتتىڭ مىندەتى. ەلىمىزدەگى تۇراقتىلىق پەن وركەندەۋ ءۇشىن ءبارىمىز بىردەي جاۋاپتىمىز. قاسىم-جومارت توقاەۆ ايتقانداي, «ارقايسىمىز بىرلىكتى جان-جاقتى نىعايتىپ, ادىلەتتىلىك قاعيداتتارىن بەرىك ۇستانساق, ءبىز قۋاتتى دا تابىستى ەل بولامىز».
دامير سۋلتانوۆ,
«تاڭ» تاتار-باشقۇرت مادەني ورتالىعىنىڭ باسشىسى:
– حالىق بىرلىگى – ءوزارا سىيلاستىقتان, مادەنيەتتى, سالت-ءداستۇردى, ادەت-عۇرىپتى قاستەرلەي بىلۋدەن, بەيبىتشىلىك پەن تىنىشتىقتى قاستەرلەي بىلۋدەن تۇراتىن سان قىرلى تۇسىنىك. مۇنىڭ ءبارى وتە ماڭىزدى جانە وتباسىنان باستاۋ الادى, جەكە تۇلعانىڭ قالىپتاسۋى مەن دامۋىنىڭ بارلىق كەزەڭدەرىندە تاربيەلەنەدى. نەگىزى حالىق پەن ەلدىڭ ىنتىماعى – بىرلىكتە. حالىق بىرلىگى, ونىڭ ۇستانىمدارى مەن ماقساتتارى كەز كەلگەن مەملەكەتتىڭ باستى كۇشى.
ەلدىڭ بىرلىگى سياقتى جالپىۇلتتىق قۇندىلىقتى ءبىز ءاربىر جاستىڭ بويىنا سىڭىرە بىلۋگە ءتيىسپىز. ەلدىڭ تۇتاستىعى مەن بىرلىگى, تاتۋلىعى مەن تىنىشتىعى ەڭ باستى نازاردا بولۋى قاجەت.
ولگا اندريەۆسكايا,
«زلاتا» بولگار ەتنومادەني ورتالىعىنىڭ باسشىسى:
– حالىق بىرلىگى دەگەن ۇعىم مەنىڭ وتانىممەن, ۇلكەن وتباسى بولىپ ءومىر ءسۇرىپ جاتقان قازاقستانىمىزبەن بايلانىستى. مەملەكەتىمىزدىڭ دامۋ جولىندا, رەسپۋبليكا كۇنى ءتارىزدى ايتۋلى مەرەكەلەرىندە تاتۋلىقتىڭ تۋىن اسقاقتاتىپ, بەيبىتشىلىكتىڭ قانات جايۋىنا ارقايسىمىز ءوز ۇلەسىمىزدى قوسىپ كەلەمىز. ءبىر داستارقان باسىندا جينالىپ, ورتاق ءان ايتامىز, سالت-ءداستۇرىمىز بەن ادەت-عۇرپىمىز تۋرالى اڭگىمەلەيمىز, انا ءتىلىمىز ءارتۇرلى بولعانىمەن, ءبىر-ءبىرىمىزدى تەرەڭ تۇسىنەمىز. ويتكەنى ەڭ باستى ءتىل – دوستىق پەن بىرلىك ءتىلى.
كوپۇلتتى ەل بولۋىمىز – ءبىزدىڭ بايلىعىمىز, ماقتانىشىمىز. ال اسسامبلەيا بولسا – بىرلىك پەن كەلىسىمنىڭ كيەلى بەسىگى, تۇتاستىق پەن تۇراقتىلىقتىڭ قۇتتى شاڭىراعى. ۇلتارالىق تاتۋلىق پەن كەلىسىم – قازاقستاندىق ۇلتتىق يدەيانىڭ باستى وزەگى. ۇلتتار اراسىنداعى سەنىم مەن بىرلىك – ءادىل الەمدىك ءتارتىپتىڭ نەگىزى.
دايىنداعان
گۇلنار جولجان,
«Egemen Qazaqstan»
